আজি কোচ ৰাজবংশী জাতীয় মহাসভাৰ চিৰাং জিলা সমিতি ভংগ হয়৷ চিৰাং জিলাৰ কদমতলিত আয়োজিত এক সংবাদ মেলত চিৰাং জিলা সমিতি কোচ ৰাজবংশী জাতীয় মভাসভাৰ সভাপতি নিৰ্মল কুমাৰ ৰায়ে ভংগ কৰি দিয়ে জিলা সমিতিৰ লগতে তিনিখনকৈ আঞ্চলিক সমিতি ।
এই সন্দৰ্ভত জিলা সভাপতিজনে কয় “কেন্দ্ৰীয় সমিতিৰ সাধাৰণ সম্পাদক বিশ্বজিত ৰায়ে কেতিয়া কি কৰে জিলা সমিতিয়ে একো নাজানে । সেয়ে কাঠ পুতুলা হৈ থকাৰ ইচ্ছা নাই । ” তেওঁ লগতে কেতবোৰ বিস্ফোৰক মন্তব্য কৰি কয় যে অৰাজনৈতিক সংগঠন কোচ ৰাজবংশী জাতীয় মহাসভা কিন্তু সম্পাদক বিশ্বজিত ৰায়ে কেতিয়াবা যদি হাগ্ৰামা মহিলাৰীৰ তাত কেতিয়াবা ইউপিপিএল দলৰ প্ৰমোদ বড়োৰ তাত আকৌ কেতিয়াবা বিজেপিৰ তাত গৈ দৰদাম কৰে।
বিশ্বজিত ৰায়ৰ কোনো স্থায়িত্বই নাই । য’তেই যায় মাথো সম্পাদক আৰু লগত দুই এজনক লৈ যায়।” সেয়ে এই সংগঠনত কাঠৰ পুতলা হৈ থকাৰ কোনো যুক্তি নাই বুলিয়ে আজি চুড়ান্ত সিদ্ধান্ত লৈ চিৰাং জিলা সমিতিখন ভংগ কৰি দিয়ে সভাপতি নিৰ্মল কুমাৰ ৰায়ে ৷লগতে আজিৰে পৰা চিৰাং জিলাত কোচ ৰাজবংশী জাতীয় মহাসভা বুলি একো নাথাকিব বুলিও তেওঁ সদৰী কৰে ৷
সংবাদ মেলত ৰায়ে কেন্দ্ৰীয় সমিতিৰ কোনো কাৰ্যকৰী সভাও অনুষ্ঠিত নকৰাৰ অভিযোগ কৰে বিশ্বজিত ৰায়ৰ বিৰুদ্ধে। এনে ধৰণৰ নেতাৰ পৰা ৰাইজক আতৰি থকাৰ আহ্বান জনায় নেতাজনে । জাতীয় চিন্তা দূৰত ৰাখি বিক্ৰী হৈ যোৱা দেখা পোৱা বুলিও কয় সংবাদ মেলত। বহু আশাৰে কোচ ৰাজবংশী জাতীয় মহাসভাৰ নেতাজনক আদৰি আনি জিলা সমিতি গঠন কৰিছিল যদিও বাস্তৱত একো নাপালে বুলিও কয়। অৱশ্যে এই কমিটী ভংগ কৰি তেওঁলোক কোন দল বা সংগঠনত যোগ দিব সেয়া এতিয়াও ঠিক কৰা নাই যদিও যিয়ে আদৰণি জনাব তাতে যাব বুলিও কয়।
বিশ্বজিত ৰায়ৰ দালালি ৰাইজে প্ৰত্যক্ষ কৰি আছে বুলিও কয় জিলা সভাপতি জনে । হাগ্ৰামা মহিলাৰীৰ সৈতে বহি ছেটিং নহ’ল তাৰ পিচত ইউপিপিএল দলৰ প্ৰমোদ বড়োৰ সৈতে বহিল এতিয়া আকৌ বিজেপি দলৰ সৈতে । বিশ্বজিত ৰায় আচলতে কংগ্ৰেছৰহে মানুহ । গতিকে তেওঁৰ স্থিতি কি বুলিও প্ৰশ্ন কৰে নিৰ্মল কুমাৰ ৰায়ে । স্থিতি নথকা নেতাৰ সংগঠনৰ জিলা সভাপতি হৈ থকাৰ ইচ্ছা নথকাত জিলা সমিতি ভংগ কৰাৰ কথা কয়। অৰাজনৈতিক জাতীয় সংগঠন হৈ অৰাজনৈতিক স্থিতিত নাথাকি ৰাজনৈতিক দলৰ সৈতে হলিগলিৰ অভিযোগ কৰে বিশ্বজিত ৰায়ৰ বিৰুদ্ধে ।
সাংগঠনিকভাৱে কোনো দলক সমৰ্থন নকৰি বিবেক ভোট দিয়াৰ আহ্বান জনোৱাৰ পক্ষপাতি আছিল যদিও বিশ্বজিত ৰায়ে তেনে নকৰি পোনে পোনে ৰাজনৈতিক দলত যোৱা বুলি অভিযোগ কৰে ৰায়ে ৷ কাৰণ বিটিচিত বাস কৰিলে বড়ো জনগোষ্ঠীৰ লোকসকলৰ সৈতে ভাতৃত্ববোধেৰে মিলিজুলি জীয়াই থাকিব লাগিব বুলি কয়। উন্নয়ণৰ বাবে আগবাঢ়ি অহা দল সংগঠনক সমৰ্থন জনাই থকাৰ কথাও সংবাদ মেলত সদৰী কৰে নিৰ্মল কুমাৰ ৰায়ে ৷সংবাদ মেলত কেন্দ্ৰীয় সদস্য ভবেশ ৰায়ৰ লগতে কেবাজনো আঞ্চলিক আৰু জিলা সমিতিৰ সদস্য উপস্থিত আছিল ।
