বাক্সা জিলাৰ শালবাৰীত আজি ‘এগ্ৰিকালচাৰ ফাৰ্মাৰ কোম্পেনী’ নামৰ এটা নেমু টেঙা উৎপাদনকাৰী উদ্যোগত আহি উপস্থিত হয় আলফাৰ প্ৰাক্তন সম্পাদক অনুপ চেতিয়া। উল্লেখ্য যে, সমগ্ৰ নামনি অসমতে উদ্যোগখনে নেমু টেঙা উৎপাদনৰ ক্ষেত্ৰত সুনাম অৰ্জন কৰিবলৈ সক্ষম হৈছে ৷ আনহাতে প্ৰাক্তন সম্পাদকজনে সাংবাদিকক জানিবলৈ দিয়ে যে, উক্ত কোম্পানীটোৰ স’তে জড়িত থকাৰ বাবেই অঞ্চলটোলৈ আহিছে । আলফাৰ প্ৰাক্তন সম্পাদকজনে গণ সুৰক্ষা দলৰ ২১ নং শালবাৰী পৰিষদীয় সমষ্টিৰ মনোনীত প্ৰাৰ্থী চক্ৰধৰ দাসৰ লগতে ভালেসংখ্যক স্থানীয় লোকৰ স’তে বি টি চিৰ ভাষা, ভূমি আদি নানা বিষয় লৈ মতবিনিময় কৰাৰ কৰে। আলফাৰ প্ৰাক্তন সম্পাদকজনে বি পি এফ দলত যোগদান কৰিব নেকি বুলি সোধা সাংবাদিকৰ প্ৰশ্নৰ উত্তৰত তেওঁ কয়, ‘ব্যক্তিগতভাৱে কোনো ৰাজনৈতিক দলতেই নাই, ভৱিষ্যতেও নাথাকো ।
বি টি চিত বড়ো ৰাইজৰ স’তে সকলো খিলঞ্জীয়া ৰাইজৰ প্ৰভূত্ব অটুত থকাটো বিচাৰো। আগন্তুক নিৰ্বাচনত বি টি চিবাসী ৰাইজে যাকেই উপযুক্ত বিবেচনা কৰে, নিজ বিবেকেৰে তেওঁকেই ভোট দিব । আলফাৰ স’তে নিৰাপত্তা বাহিনীৰ সংঘৰ্ষত নিহতসকলৰ বহুতকেই বি পি এফ মূৰব্বী হাগ্ৰামা মহিলাৰীয়ে এক লাখকৈ আৰ্থিক সাহায্য প্ৰদানৰ কৰিছিল। অৱশ্যে,হাগ্ৰামা মহিলাৰী শাসনত থাকোতে ‘ডেথ চাৰ্টিফিকেট’ৰ প্ৰয়োজন নাছিল । বৰ্তমান প্ৰশাসনীয় অসুবিধাৰ বাবে ‘ডেথ চাৰ্টিফিকেট’ৰ প্ৰয়োজন হোৱাত সাহায্য দান প্ৰক্ৰিয়াত বিলম্ব হৈছে ৷’ নিহতসকলৰ অধিকাংশই অত্যন্ত দুখীয়া পৰিয়ালৰ হোৱা বাবে তেওঁ এইক্ষেত্ৰত শুভাকাংক্ষী ৰাইজৰ সহায় সহযোগিতাও কামনা কৰে।