প্রধানমন্ত্রী নৰেন্দ্ৰ মোদীয়ে সততে বিদেশ ভ্ৰমণ কৰি ফুৰিলেও দেশলৈ পর্যটক আকৰ্ষণত একপ্ৰকাৰ বিফল হৈছে। কাৰণ শেহতীয়াকৈ প্রকাশিত এক তালিকা অনুসৰি বিশ্বৰ সৰ্বাধিক সংখ্যক পর্যটকে পদার্পণ কৰা ১০ খন মহানগৰৰ মাজত ভাৰতৰ এখনো চহৰে স্থান লাভ কৰা নাই।
গতিকে প্রাচীন সভ্যতাৰ দেশ হ’লেও পর্যটক আকৰ্ষণৰ ক্ষেত্ৰত ভাৰত বাৰুকৈয়ে পিছ পৰি ৰোৱাটো প্রতিপন্ন হৈছে। লক্ষ্যণীয় যে এখন দেশৰ অর্থনীতিলৈ পর্যটনেও বিপুল বৰঙণি যোগায়।
আনকি থাইলেণ্ড, ছুইজাৰলেণ্ডৰ দৰে চহকী দেশৰ অর্থনীতি ঘাইকৈ পর্যটন নিৰ্ভৰশীল। সেয়া যিয়েই নহওক, উক্ত তালিকাত বিশ্বৰ সৰ্বাধিক পর্যটকে ভ্ৰমণ কৰা ১০ মহানগৰ হ’ল:
বেংকক: বৈপৰীত্য-প্ৰাণ প্ৰাচুৰ্যৰ চহৰ
বিগত বছৰত তিনি কোটি ২০ লাখ পর্যটকে থাইলেণ্ডৰ ৰাজধানী বেংকক ভ্রমণ কৰে। দৃষ্টিনন্দন মঠ-প্রাণোচ্ছল বাট-পথে সদায়ে মন্দিৰ-সদাপ্ৰসাৰিত বজাৰ আৰু পর্যটকক আকর্ষণ কৰি আহিছে। একে সময়তে বেংককত শান্ত-সমাহিত এক পৰিৱেশো বিৰাজ কৰে। গতিকে মহানগৰখনক বৈপৰীত্য আৰু প্ৰাণ প্ৰাচুৰ্যৰ চহৰ আখ্যা দিয়া হয়।
ইষ্টানবুল: এছিয়া-ইউৰোপৰ মিলনস্থলী উক্ত তালিকা অনুসৰি যোৱা বছৰ দুই কোটি ৩০ লাখৰো অধিক পর্যটকে তুৰস্কৰ ইষ্টানবুল চহৰ ভ্রমণ কৰে। এই চহৰ হৈছে এছিয়া আৰু ইউৰোপৰ সংযোগস্থলী। বক্ষ’ৰাছ প্ৰণালীৰ জৰিয়তে এই দুই মহাদেশৰ সংযোগ স্থাপন হৈছে। ইষ্টানবুল চহৰৰ মূল পর্যটক আকর্ষণ কেন্দ্রসমূহ হ’ল মছজিদ আৰু বজাৰসমূহ। এইসমূহৰ সমান্তৰালভাৱে অত্যাধুনিক কাফে আৰু কলা কেন্দ্র ও আছে।
লণ্ডন: পৰম্পৰা আৰু অত্যাধুনিক জীৱনশৈলীৰ মিশ্রণ লণ্ডনক পৰম্পৰা আৰু অত্যাধুনিক জীৱন শৈলীৰ মিলনস্থলী বুলি কোৱা হয়। বাকিংহাম পেলেচ আৰু বিগ বেনৰ দৰে দৃষ্টিনন্দন কাৰুকাৰ্যৰ বাবে সর্বদা বিদেশী পর্যটকক আকৰ্ষণ কৰি আহিছে লণ্ডনে। বছৰি দুই কোটিৰো অধিক পর্যটকে লণ্ডন ভ্রমণ কৰে।
হংকং: প্রকৃতি-গগনচুম্বী অট্টালিকাৰ সহবাস বিগত বছৰত দুই কোটিৰো অধিক পৰ্যটকে ভ্রমণ কৰে চীনৰ হংকং মহানগৰ। প্ৰকৃতিৰ কোলাত অৱস্থিত এই চহৰৰ গগনচুম্বী অট্টালিকাসমূহেও পর্যটকক আকৰ্ষণ কৰি আহিছে। চহৰখন দ্বীপত অৱস্থিত হোৱাটোও পৰ্যটকৰ আকৰ্ষণস্থলীত পৰিণত হৈছে।
মক্কা: ধর্মীয় বিশ্বাসৰ কেন্দ্ৰ বহু যুগ ধৰি ছৌডি আৰবৰ মক্কা বিশ্বৰ অন্যতম পর্যটক আকৰ্ষণস্থলীত পৰিণত হৈ আছে। বছৰি মুছলমানসকলে হজ আৰু ওমৰাহৰ বাবে মক্কা ভ্রমণ কৰে। সেই সূত্রে বছৰি কমেও এক কোটি ন লাখ পর্যটকে মক্কা ভ্রমণ কৰে।
এন্টালিয়া: ইতিহাসৰ স’তে ভূমধ্য সাগৰৰ সৌন্দৰ্যৰ মিলন তুৰস্কৰ অন্যতম চহৰ এন্টালিয়াও বিশ্বৰ এক বিখ্যাত পর্যটন আকর্ষণস্থলী। সমুদ্রতীৰ আৰু ৰিজ’ৰ্টৰ বাবে বিখ্যাত এন্টালিয়া চহৰ প্ৰতি বছৰে এক কোটি ন লাখৰো অধিক পর্যটকে ভ্রমণ কৰে। এই চহৰত ঐতিহাসিক স্থানো আছে। গতিকে চহৰখনক ইতিহাসৰ স’তে ভূমধ্য সাগৰীয় সৌন্দৰ্যৰ মিলনস্থলীও আখ্যা দিয়া হয়।
ডুবাই: বিলাসিতা আৰু উদ্ভাৱনৰ কেন্দ্র ডুবাইৰ নাম নুশুনা মানুহ নাই বুলিলেই হয়। সাম্প্রতিক কালত বিলাসিতা আৰু উদ্ভাৱনৰ বাবেও বিখ্যাত হৈ উঠা ডুবায়ো বছৰি এক কোটি আঠ লাখ পর্যটকে ভ্রমণ কৰে।
মাকাও: পূব আৰু পশ্চিমৰ সংস্কৃতিৰ মিলন চীনৰ মাকাও চহৰক পূব আৰু পশ্চিমৰ সংস্কৃতিৰ মিলনস্থলী আখ্যা দিয়া হয়। লাছ ভেগাছৰ লেখীয়াকৈ মাকাও চহৰো কেছিন’ৰ বাবে বিখ্যাত। এই চহৰ বছৰি এক কোটি আঠ লাখৰো অধিক পর্যটকে ভ্রমণ কৰে।
পেৰিছ: কালোত্তীর্ণ মোহনীয়তা-জীৱনশৈলী ঘাইকৈ আইফেল টাৱাৰৰ বাবে বিশ্বজুৰি বিখ্যাত পেৰিছেও বছৰি এক কোটি সাত লাখৰো অধিক পর্যটকক আকৰ্ষণ কৰি আহিছে। পেৰিছক কালোত্তীর্ণ মোহনীয়তা আৰু কলাত্মক জীৱনশৈলী চহৰ বুলি আখ্যা দিয়া হয়।
কুৱালালামপুৰ : সংস্কৃতি আৰু পথৰ খাদ্যৰ বাবে বিখ্যাত চহৰ মালয়েছিয়াৰ ৰাজধানী কুৱালালামপুৰেও বছৰি কোটিৰো অধিক পর্যটকক আকৰ্ষণ কৰি আহিছে। কুৱালালামপুৰ চহৰ সাংস্কৃতিক বৈচিত্র্য আৰু পথৰ খাদ্যৰ বাবে বিখ্যাত। ভাৰতীয় সংস্কৃতিৰ প্ৰভাৱো কুৱালালামপুৰত আছে। তদুপৰি চীনা সংস্কৃতিৰ প্ৰভাৱেও চহৰখনক উজ্জীৱিত কৰি ৰাখিছে।