অহা ন এপ্রিলত ভোটগ্রহণ হ’ব লগা বিধানসভা নির্বাচনত যুৱ ভোটাৰে নিৰ্ণায়ক ভূমিকা পালন কৰাটো একপ্ৰকাৰ নিশ্চিত হৈছে। ইয়াৰ আভাস পূর্বে পাই শাসক-বিৰোধী উভয়ে নৱ প্রজন্মৰ ভোটাৰসকলৰ মন আকৰ্ষণৰ চেষ্টা অব্যাহত ৰাখিছে। শাসকীয় বিজেপিৰ অভিভাৱক সংগঠন আৰএছএছেও কিছুমাহ পূর্বে গুৱাহাটীত যুব সম্মিলন অনুষ্ঠিত কৰিছে।
যোৱা ১৯ নবেম্বৰত গুৱাহাটীত সংগঠনটোৱে আয়োজন কৰা যুব নেতৃত্ব সম্মিলনত আৰএছএছৰ মুৰব্বী মোহন ভাগবতেও অংশগ্রহণ কৰে। একেদৰে অলপতে কেন্দ্রীয় গৃহ মন্ত্রী অমিত শাহেও গুৱাহাটীত এখন যুব সম্মিলনত অংশ লৈ বিজেপিৰ ডাবল ইঞ্জিন চৰকাৰৰ কৃতিত্বৰ খতিয়ান দাঙি ধৰে। বিজেপি নেতৃত্বাধীন ৰাজ্য চৰকাৰে বিগত পাঁচবছৰীয়া কার্যকালত এপইচাও ঘোচ নিদিয়াকৈ ডেৰ লক্ষাধিক যুৱক-যুৱতীয়ে চৰকাৰী চাকৰি লাভ কৰিবলৈ সক্ষম হোৱা বুলি মুখ্যমন্ত্রী ড০ হিমন্ত বিশ্ব শর্মাই দাবী কৰি আহিছে। একেদৰে প্রদেশ কংগ্ৰেছৰ সভাপতি গৌৰৱ গগৈৰ মুখতো যুৱ প্ৰজন্মৰ কথা সঘনে উচ্চাৰণ হৈ আহিছে।
আনকি গগৈয়ে অভিযোগ উত্থাপন কৰি আহিছে যে হিমন্ত বিশ্ব শৰ্মা চৰকাৰে গাঁৱে গাঁৱে মদৰ দোকান খুলি যুব প্ৰজন্মক মদ্যপানৰ অভ্যাস গঢ়ি তুলিবলৈ উৎসাহিত কৰিছে। চৰকাৰৰ নিষ্ক্রিয়তাত ৰাজ্যত ড্ৰাগছৰ অবাধ প্রচলন ঘটা বুলিও গগৈয়ে অভিযোগ উত্থাপন কৰি আহিছে। তদুপৰি সংস্থাপনৰ অভাৱত ৰাজ্যৰ বাহিৰলৈ গৈ অনেক যুৱক-যুৱতী বিগত সময়ত মৃত্যুমুখত পৰাৰ ঘটনাও তেওঁ ৰাজহুৱা সভা-সমাবেশত উল্লেখ কৰি আহিছে। এনেদৰে মূলতঃ শাসক-বিৰোধীয়ে যুৱ প্ৰজন্মৰ ভোটাৰসকলক আকৰ্ষণৰ চেষ্টা কৰি আহিছে।
উল্লেখ্য যে আসন্ন নির্বাচনৰ ৰাজ্যৰ ভোটাৰ তালিকা অনুসৰি ভোটাৰসকলৰ ৭২.৮৩ লাখ হৈছে যুৱ ভোটাৰ। এই যুৱ ভোটাৰসকলৰ বয়স ১৮ৰ পৰা ২৯ বছৰৰ ভিতৰত। ২০২১ৰ তুলনাত ৰাজ্যত যুৱ ভোটাৰৰ সংখ্যা ৫.০২ শতাংশ বৃদ্ধি পায়। ফলত তেতিয়াৰ ৬৯.৩৫ লাখৰ পৰা সম্প্রতি যুৱ ভোটাৰৰ সংখ্যা ৭২.৮৩ লাখলৈ বৃদ্ধি পাইছে। এই বৃহৎ সংখ্যক ভোটাৰৰ মন আকৰ্ষণৰ উদ্দেশ্যে শাসক-বিৰোধীয়ে যিসমূহ ‘অস্ত্র’ প্রয়োগ কৰিছে সেইসমূহে কাৰ পক্ষে ফল দিব সেয়া সময়তহে নিশ্চিত হ’ব।
আনহাতে, যুৱ ভোটাৰসকলে যিহেতু নিৰ্ণায়ক ভূমিকা পালন কৰিব, গতিকে তেওঁলোকৰ মন আকৰ্ষণৰ চেষ্টা শাসক-বিৰোধীয়ে অব্যাহত ৰখাটোৱে স্বাভাবিক। উল্লেখ্য যে ৰাজ্যৰ ভোটাৰসকলৰ ভিতৰত ১৮-১৯ বছৰীয়া ভোটাৰৰ সংখ্যা অধিক বৃদ্ধি পাইছে। এনে বয়সৰ ভোটাৰৰ সংখ্যা বৃদ্ধি ২৪.১৬ শতাংশ হৈছে। ফলত ২০২১ত এনে বয়সৰ ভোটাৰৰ সংখ্যা ৫.০৫ লাখ হোৱাৰ বিপৰীতে এইবাৰ ৬.২৮ লাখ হৈছে। উল্লেখ্য যে এইবাৰ ৰাজ্যৰ মুঠ ভোটাৰৰ সংখ্যা হৈছে ২.৫ কোটি। ইয়াৰে ৬.২৮ লাখেই হৈছে ১৮-১৯ বছৰীয়া। আনহাতে, ৬৬.৫৬ লাখ হৈছে ২০ৰ পৰা ২৯ বছৰ বয়সীয়া। লক্ষ্যণীয়ভাৱে ৰাজ্যৰ মুঠ ভোটাৰৰ ৮৫ বা ততোধিক বয়সৰ ভোটাৰৰ সংখ্যা হৈছে ১.০২ লাখ।
যুৱ ভোটাৰৰ সংখ্যা এনেদৰে বৃদ্ধিৰ বাবে বিজেপিয়ে এই ভোটাৰসকলক নিৰ্বাচনৰ ৰাজহাড় বুলি আখ্যা দিছে। এই ভোটাৰসকলৰ মন আকৰ্ষণ কৰিবলৈ সক্ষম হোৱা বুলি দাবী কৰি দলৰ এজন জ্যেষ্ঠ নেতাই কয়, ‘বিজেপি চৰকাৰে ভৱিষ্যতলৈ লক্ষ্য ৰাখি যুৱ প্ৰজন্মক সবলীকৰণৰ উদ্দেশ্যে এলানি আঁচনি ৰূপায়ণ কৰিছে। যুৱ প্ৰজন্মই বিজেপি চৰকাৰৰ একেৰাহে অগ্রাধিকাৰ লাভ কৰি আহিছে। ২৭ হেজাৰ কোটিটকীয়া ছেমি কণ্ডাক্টৰ উদ্যোগ স্থাপন হৈছে চৰকাৰৰ বৃহৎ সফলতা। এনেবোৰ আঁচনিয়ে যুৱ প্রজন্মক বিজেপিৰ প্ৰতি আকৰ্ষণ কৰিছে।’ একেদৰে এজন জ্যেষ্ঠ কংগ্রেছ নেতাই কয়, ‘হিমন্ত বিশ্ব শর্মা নেতৃত্বাধীন বিজেপি চৰকাৰে প্ৰতিশ্রুতি পূৰণ নকৰাক লৈ যুৱ সমাজ ক্ষুব্ধ হৈ আছে। যুৱ সমাজ কংগ্ৰেছৰ প্ৰতি আকৰ্ষিত হৈছে।’ অৱশ্যে এই অংকত কোনে শেষ হাঁহি মাৰিব সেয়া সময়তহে নিশ্চিত হ’ব।
