ৰাজ্যৰ নাট্য জগতখনত শেহতীয়াভাৱে ভুমুকি মাৰি নিজৰ স্বকীয় প্ৰতিভাৰে উজলি উঠিবলৈ সক্ষম হৈছে গোলাঘাটৰ উদীয়মান নাট্যকাৰ-পৰিচালক স্ৰোতস্বিনী তামূলী । বৌদ্ধিক জগতখনৰ সৈতে একাত্ম হোৱাৰ পাচত আধুনিক নাট্য সাহিত্যৰ বিশাল ক্ষেত্ৰখনত খোজ দিয়েই প্ৰতিভাৰ স্বাক্ষৰ বহন কৰিবলৈ সক্ষম হৈছে সম্ভাৱনাময় নাট্যকাৰ -পৰিচালকগৰাকী । বিশেষকৈ ৰচনা কৰা নাটক সমূহত সমাজৰ বাস্তৱ প্ৰতিচ্ছবি, বুৰঞ্জী-ইহিহাসৰ সমাহাৰেৰে ব্যতিক্ৰমী ৰূপত উপস্থাপনৰ জৰিয়তে সমাজত এক বাৰ্তা দিয়াৰ প্ৰয়াস কৰিছে নাট্যকাৰ স্ৰোতস্বিনী তামূলীয়ে ।
অলপতে গোলাঘাটৰ বীৰঙ্গণা সতী সাধনী ক্ষেত্ৰৰ চৌহদৰ মুকলি আকাশৰ তলত ককা-আইতাৰ সাধু কথাৰ পটভূমিত ন-ৰূপত সজাই পৰাই ৰচনা কৰি মঞ্চস্থ কৰে ‘ হুৰ হুৰ বতা চৰাই’ নাটখনি । নাটকখনৰ উপস্থাপন শৈলীত ব্যৱহাৰ কৰা হোৱা নাছিল কোনোধৰণৰ কৃতিম আলোকসজ্জা । যুগ-যুগ ধৰি আমাৰ অসমীয়া গ্ৰাম্য সমাজত চলি অহা ককা-আইতাৰ সেই সোণসেৰীয়া সাধুকথা সমূহ বৰ্তমান যেন নোহোৱা হ’ল ।
সাধুকথাৰ মাজেৰে কণ-কণ শিশুক নীতি শিক্ষাৰ বাৰ্তাৰে মানসিক উত্তৰণৰ আগৰ দিনৰ সেই চৰ্চাও যেন নোহোৱা হ’ল । নৱ-প্ৰজন্মৰ এগৰাকী উদীয়মান নাট্যকাৰ-পৰিচালক গোলাঘাটৰ স্ৰোতস্বিনী তামুলী আন্তৰিক প্ৰয়াসত বৰ্তি হৈ পুৰণীকলীয়া ককা-আইতাৰ এটা জনপ্ৰিয় সাধুক ন-ৰূপত সজাই-পৰাই ৰচনা কৰি নৱ-প্ৰজন্মৰ দ্বাৰা হুৰ হুৰ বতা চৰাই মুকলি আকাশৰ তলত মঞ্চস্থ কৰা পৰিলক্ষিত হ’ল । ‘চম্পাৱতীৰ সাধু’ ৰ আধাৰত নাটকখনৰ জৰিয়তে সমাজলৈ এক বাৰ্তা দিয়াৰ প্ৰয়াস কৰিলে নাট্যকাৰ-পৰিচালক,শিল্পী, কলা-কুশলীসকলে ।
সাধুকথাৰ দুটা চৰিত্ৰক কেন্দ্ৰ কৰিয়েই উক্ত নাটকৰ ৰচনা । বিশেষকৈ আমাৰ সমাজ ব্যৱস্থাটো বহু সময়ত কেনেকৈ এডাল অজগৰ সাপৰ দৰে হৈ পৰে আৰু অগজৰৰ গ্ৰাসৰ পৰা কঠোৰ সংগ্ৰামৰ মাজেৰে ওলাই আহি নিজৰ অস্তিত্বক প্ৰতিপন্ন কৰিবলৈ সক্ষম হয়, তেনে এক বাৰ্তাই নাটখনৰ জৰিয়তে সমাজত দিব বিচৰা হৈছে । নাটকখন ‘চম্পাৱতীৰ সাধু’ৰ আধাৰত বিশিষ্ট গল্পকাৰ ৰশ্মিৰেখা বৰাই ৰচনা কৰা ‘হুৰ হুৰ বতা চৰাই’ গল্পটোৰ আলম লৈ স্ৰোতস্বিনী তামুলীয়ে ৰচনা আৰু পৰিচালনা কৰিছে ।
নাটকখনত অভিনয় কৰা কলা-কুশলীসকল আছিল নীলাক্ষি হাজৰিকা, প্ৰতীক্ষা বৰগোহাঁই, তন্ময়ী দাস, আস্থা প্ৰিয়া দুৱৰা, নিকি বৰুৱা, পাৰ্দিতা দাস আৰু কস্তুৰী প্ৰিয়া দুৱৰা। নাটখনৰ সংগীত পৰিচালনাও নাট্যকাৰ স্ৰোতস্বিনী তামুলীৰ। মুকলি আকাশৰ তলত প্ৰদৰ্শিত নাটকৰ সাৱলীল অভিনয় প্ৰতিভা আৰু অকৃতিম আলোকসজ্জাই দৰ্শকক মন্ত্ৰমুগ্ধ কৰি ৰাখিবলৈ সক্ষম হয় । প্ৰায় পঞ্চাশ মিনিট দৈৰ্ঘ্যৰ এই ‘হুৰ হুৰ বতা চৰাই অসমৰ নাটকৰ জগতখনত এক নৱতম সংযোজন ।’
ইয়াৰ উপৰি স্ৰোতস্বিনী তামূলীয়ে বুৰঞ্জী আৰু বৰ্তমানৰ মাজত মাজত যোগসুত্ৰ স্থাপন কৰি নাৰীৰ সমস্যা আৰু মানসিক দ্বন্দ সমূহৰ ওপৰত ভিত্তি কৰি ‘মৃগতৃষ্ণা’ নামেৰে আন এখন নাটক ৰচনা কৰি নিজা পৰিচালনাৰে গোলাঘাট এমেচাৰ হলৰ প্ৰেক্ষাগৃহত মঞ্চস্থ কৰাই দৰ্শকৰ দ্বাৰা সমাদৃত হৈছে । আগন্তক দিনত স্ৰোতস্বিনী তামূলীৰ নাট্য প্ৰতিভা অধিক উজলি উঠক, দৈনিক অগ্ৰদূতৰ তৰফৰা শুভাশীষ জ্ঞাপন কৰিলোঁ ।
