বাগ্সাৰ শালবাৰীৰ গামাৰিগুৰিত আজি আবেলি সংঘটিত হোৱা এক ভয়ংকৰ অগ্নিকাণ্ডৰ ফলত আঠটাকৈ পৰিয়ালৰ বাসগৃহ সম্পূৰ্ণভাৱে জ্বলি ছাই হৈ যায় ৷ গামাৰিগুৰি গাঁৱৰ এটা পৰিয়ালৰ বিদ্যুৎ মিটাৰৰ পৰা জুইৰ সূত্ৰপাত হোৱাত ওচৰ চুবুৰীয়া লোকে পানী, বালি আদিৰে জুই নুমুৱাবলৈ চেষ্টা কৰিও অসফল হয় । পৰৱৰ্তী সময়ত বৰপেটা ৰোডৰ পৰা অহা অগ্নি নিৰ্বাপক বাহিনীয়ে জুই নুমুৱাবলৈ সক্ষম হয় যদিও কোনো সামগ্ৰী ৰক্ষা কৰিবলৈ সক্ষম নহ’ল ৷
অগ্নিকাণ্ডৰ ফলত আঠটাকৈ পৰিয়ালৰ লাখ লাখ টকাৰ সা সম্পত্তি ধ্বংস হোৱাৰ লগতে বহু লাগতিয়াল নথিপত্ৰ জুইত জাহ যায় ৷ এই ঘটনাত দিন হাজিৰা কৰি পৰিয়াল চলোৱা পৰিয়ালবোৰৰ এতিয়া জীৱনলৈ নামি আহিছে ঘোৰ অমানিশা ৷ কেমেৰাৰ সমুখত হুকহুকাই কান্দি পৰিয়ালৰ লোকসকলে কৈ গ’ল, ‘আমাৰ সকলো শেষ হৈ গ’ল ৷’
অগ্নিকাণ্ডৰ ফলত গাঁওখনৰ ৰবি আলী, বানিছ খা, ইছমাইল হুছেইন, কাদেৰ আলী, মফিজ উদ্দিন, চুলতান খা, ভিক্কু আলী আদি লোকসকলৰ বাসগৃহ সম্পূৰ্ণৰূপে জুইত জাহ যায় ৷
