আমেৰিকাৰ ‘দ্য চেণ্টাৰ ফৰ ডিজিজ কণ্ট্ৰ’ল এণ্ড প্ৰিভেন্সন’এ বিগত সপ্তাহত জনায় যে, টিকাকৰণ হৈ যোৱাৰ পাছত সকলোৱে মাস্ক পৰিধান নকৰাকৈ বাহিৰত ওলাব পাৰে । সম্প্ৰতি এই ঘটনাই বিতৰ্কৰ সৃষ্টি কৰিছে । এই বিষয়ত ভাৰতীয় গৱেষকে জনায় যে, এই ঘোষণা সম্পূৰ্ণ অবৈজ্ঞানিক । ভাৰতত এনেধৰণৰ ঘোষণা কৰা সম্ভৱ নহয় ।
১৭ মে’ পৰ্যন্ত আমেৰিকাত ১৮ বছৰৰ ঊৰ্ধ্বৰ ৪৭.৪ শতাংশ লোকৰ টিকাকৰণ সম্পূৰ্ণ হৈছে । এই সন্দৰ্ভত ইণ্ডিয়ান মেডিকেল এছোছিয়েছন (আইএমএ)ৰ সভাপতি জে এ জয়লালে কয়, ‘কোনো দেশৰ অন্ততঃ ৭০ শতাংশ নাগৰিকক প্ৰতিষেধক প্ৰদান কৰাৰ পাছতহে হাৰ্ড ইমিউনিটী প্ৰস্তুত হয় । সেয়ে ভাৰতত এনেধৰণৰ কোনো ঘোষণা সম্ভৱ নহয় । কাৰণ, এই সিদ্ধান্তৰ কোনো বৈজ্ঞানীক ব্যাখ্যা নাই ।’
ভাৰতত সম্প্ৰতি ভাইৰাছৰ অধিক সংক্ৰামক প্ৰজাতিৰ সংক্ৰমণ হৈছে বুলি জনায় জয়লালে । তেওঁ কয়, ‘ভাৰতত পৰিলক্ষিত হোৱা কৰ’নাৰ প্ৰজাতি অতি শক্তিশালী । সম্প্ৰতি যি প্ৰতিষেধক প্ৰদান কৰা হৈছে ই পূৰ্বৰ প্ৰজাতিৰ ক্ষেত্ৰত ৭০-৮০ শতাংশ কাৰ্যকৰী আছিল আৰু বৰ্তমানৰ প্ৰজাতিৰ ক্ষেত্ৰত ৪০-৫০ শতাংশ কাৰ্যকৰী । সেয়ে দুপালি প্ৰতিষেধক গ্ৰহণ কৰাৰ অৰ্থ ভাইৰাছৰ সংক্ৰমণৰ পৰা সম্পূৰ্ণ সুৰক্ষিত নহয় ।’
সংক্ৰমণ আৰু টিকাকৰণৰ ক্ষেত্ৰত ভাৰত আৰু আমেৰিকাৰ তুলনা কৰা সম্ভৱ নহয় জনায় আইএমএ । তেওঁলোকে জনায় যে, দুয়োখন দেশৰ জনসংখ্যা, ভাইৰাছ আৰু প্ৰতিষেধকৰ প্ৰকৃতি, জনসাধাৰণৰ ৰোগ প্ৰতিৰোধ ক্ষমতা একেই নহয় । সেয়ে দুয়োখন দেশত একেই ধৰণৰ নিয়ম কাৰ্যকৰী নোহোৱাটো স্বাভাৱিক ।
