ছেৰাম ইনষ্টিটিউটৰ দ্বাৰা তৈয়াৰী প্রতিষেধক ল’লে সামান্য পৰিমাণে হলেও কিছু লােক শৰীৰত তেজ গােট মাৰে বুলি অৱশেষত স্বীকাৰ কৰিলে কেন্দ্রীয় চৰকাৰে ।
কেন্দ্রই গঠন কৰা এক কমিটীয়ে সম্প্রতি এক বিবৃতিৰ মাধ্যমেৰে এই কথা সদৰী কৰে । ছেৰামৰ কভিশ্বিল্ড প্রতিষেধকক কেন্দ্ৰ কৰি আৰম্ভণিৰে পৰাই এই অভিযােগ উঠি আহিছিল ।
ব্রিটেইন, জার্মানী, কানাডাসহ একাংশ দেশত ক’ভিশ্বিল্ড লােৱাৰ পাছত প্রতিষেধক প্রাপকৰ শৰীৰৰ ছিটা লােৱা স্থানৰ পৰা তেজ ওলােৱা অথবা সিৰা বা ধমনীত তেজ গােট মৰাৰ ঘটনা পােহৰলৈ আহে।
ইয়াৰ ফলত একাংশ লােকৰ মৃত্যুও হয়। ফলত একাংশ দেশত ক’ভিশ্বিল্ড প্রদানৰ কাম সাময়িকভাৱে বন্ধ ৰখা হৈছে। আয়াৰলেণ্ড, ডেনমার্ক, নৰৱে, আইচলেণ্ড, নেদাৰলেণ্ডছ, অষ্ট্রিয়া আদি বহু দেশত ক’ভিশ্বিল্ডক নিষিদ্ধও কৰা হৈছে।
তথাপি ভাৰতৰ ক্ষেত্ৰত আৰম্ভণিৰে পৰাই তেজ ওলােৱা বা গােট মৰাৰ তত্ত্বটো অস্বীকাৰ কৰি আহিছিল প্রতিষেধক প্রস্তুতকাৰী কোম্পানীটোৱে। অৱশ্যে সােমবাৰে কেন্দ্ৰৰ তৰফৰ পৰা যি বিবৃতি দিয়া হ’ল, তাত স্বীকাৰ কৰি লােৱা হ’ল যে আঙুলিৰ মূৰত লেখিবপৰা হ’লেও তেজ গােট মৰাৰ ঘটনা সংঘটিত হৈছে।
সম্প্রতি কেন্দ্রীয় স্বাস্থ্য মন্ত্রণালয়ক নিজৰ সমীক্ষাৰ প্রতিবেদন জমা দিছে ‘দ্য নেচনেল এডভাৰ্ছ ইভেন্ট ফল’য়িং ইম্যিউনাইজেচন’ (এনআইএফআই) নামৰ কমিটীখনে। উক্ত প্রতিবেদনৰ ভিত্তিতে কেন্দ্ৰৰ তৰফৰ পৰা কোৱা হৈছে যে যােৱা তিনি এপ্রিল পর্যন্ত সাত কোটি ৫৪ লাখ ৩৫ হেজাৰ ৩৮১জন ভাৰতীয়ক প্রতিষেধক প্রদান কৰা হৈছে।
তেওঁলােকৰ ভিতৰত ছয় কোটি ৮৬ লাখ ৫০ হেজাৰ ৮১৯জনে গ্ৰহণ কৰিছে ক’ভিশ্বিল্ড আৰু ৬৭ লাখ ৮৪ হেজাৰ ৫৬২জনে গ্ৰহণ কৰিছে ক’ভেক্সিন। ইয়াৰ ভিতৰত সিৰা বা ধমনীত তেজ গােট মৰা অর্থাৎ থ্রম্বােলিক হৈছে মাত্র ২৬জন লােকৰ।
প্রতি ১০ লাখৰ ভিতৰ ০.৬১জনৰ এই সমস্যা হৈছে। জার্মানী আৰু আমেৰিকাৰ ক্ষেত্ৰত এই সংখ্যা ক্রমে ১০ আৰু চাৰি। এই তথ্য সদৰী কৰাৰ লগতে কেন্দ্ৰৰ তৰফৰ পৰা তেজ গােট মৰাৰ প্ৰসংগত এক সতর্কতামূলক নির্দেশিকাও জাৰি কৰা হৈছে।
স্বাস্থ্যকর্মী আৰু প্ৰতিষেধক কেন্দ্ৰৰ সকলােকে কোৱা হৈছে যে তেওঁলােকে যাতে এই বিষয়ত প্রতিষেধক গ্রহণকাৰীক সচেতন কৰে। নির্দেশিকাত কোৱা হৈছে যে প্রতিষেধক গ্ৰহণৰ ২০ দিনৰ ভিতৰতে যদি কাৰােবাৰ শ্বাস লােৱাত সমস্যা হয়, বুকুৰ বিষ হয়,হাত বা মাংসপেশীত বিষ হয় বা ফুলি উঠে, প্রতিষেধক লােৱা স্থান বা ওচৰত ৰঙা দাগ দেখা যায়, বমি সহ বা অবিহনেই যদি পেটত প্রচণ্ড বিষ হয়; এই ধৰণৰ মুঠ ১২টা উপসর্গ দেখা দিলে ততালিকে স্বাস্থ্যকেন্দ্ৰত যােগাযােগ কৰিবলৈ পৰামর্শ দিয়া হৈছে।
