কৰ’নাত আক্রান্ত ৮০ বছৰৰ বৃদ্ধ পিতৃৰ বাবে একোৱেই কৰিব পৰা নাছিল কোটিপতি পুত্রই । ব্যৱস্থা কৰিব পৰা নাছিল হাস্পতালৰ বিছনাৰ, পােৱা নাছিল অক্সিজেন চিলিণ্ডাৰ। হাতত অগণন টকা, অথচ একোৱেই নাপায় অসহায় হৈ পৰিছিল পুত্র।
পৰিস্থিতি এনে হৈ পৰিছিল যে অত্যধিক টকা দিবলৈ ৰাজি হলেও সহায়ৰ বাবে কাষত কাকো তেওঁ পােৱা নাছিল। অগত্যা অশীতিপৰ পিতৃৰ প্ৰাণৰক্ষাৰ বাবে তেওঁ নিজ গৃহতেই এখন হাস্পতাল তৈয়াৰ কৰিলে।
ইয়াৰ পাছতে লাহে লাহে তেওঁৰ পিতৃ সুস্থ হৈ উঠে। পিতৃৰ বয়সৰ ৰােগীসকলৰ বাবে তথা নিজৰ দৰে পৰিয়ালৰ অসহায় লােকসকলৰ কথা ভাবিয়েই বিশাল সিং নামৰ এই কোটিপতিজনে নিজৰ আবাসনৰ এটা ফ্লেটতে ঔষধ, অক্সিজেন, বিছনা সহ সকলাে সুবিধা উপলব্ধ কৰি তৈয়াৰ কৰিলে ক’ভিড সেৱা কেন্দ্র।
গুৰুগ্ৰামৰ ছেক্টৰ ২৮ৰ নিবাসী ৪৭ বছৰীয়া বিশাল দিল্লী আৰু উত্তৰপ্ৰদেশৰ বহুতাে স্কুলৰ স্বত্ত্বাধিকাৰী। বিত্তবান এই লােকজন যথেষ্ট প্রভাৱশালীও। সৎসত্ত্বেও পিতৃৰ বাবে একো ব্যৱস্থা কৰিব নােৱাৰি তেওঁ অসহায় হৈ পৰিছিল।
সেই অভিজ্ঞতাৰ পৰা শিক্ষা লৈয়েই নিজৰ কমপ্লেক্সত থকা সকলাে পৰিয়ালৰ বাবে এই ক’ভিড কেন্দ্ৰ গঢ়ি তােলাত তেওঁ উদ্যোগী হয়। অৱশ্যে ৰােগীৰ চিকিৎসাৰ বাবে বিছনা, নাৰ্ছ, ঔষধ আৰু অক্সিজেনৰ যােগাৰ কৰাটো বৰ সহজ কথা নাছিল।
বহু টকাৰাে প্রয়ােজন আছিল। সেয়ে প্রথমে তেওঁ নিজৰ কমপ্লেক্সত বাস কৰা সকলাে পৰিয়ালৰে স’তে এই বিষয়ত আলােচনা কৰে; কিন্তু ধনৰ পৰিমাণ শুনিয়েই বহুতে পিছুৱাই যায়। শেষত নিজৰ গাঁঠিৰ ২০ লাখ টকা ব্যয় কৰি বিশালে ক’ভিড কেন্দ্ৰটো গঢ়ি তােলে।
অতিমাৰীৰ আৰম্ভণিৰে পৰা পৰিত্যক্ত অৱস্থাত থকা কমপ্লেক্স ক্লাব হাউছতে তেওঁ সকলােবােৰ ব্যৱস্থা কৰে। দূৰত্ব বজাই ৰাখি তেওঁ পাঁচখন বিছনা আৰু প্ৰতিখন বিছনাতে অক্সিজেনৰ ব্যৱস্থা কৰে। ৰােগীৰ চোৱা-চিতাৰ বাবে দুগৰাকী প্রশিক্ষণপ্রাপ্ত নাৰ্ছ আৰু তিনিজন ভিন্ন কর্মচাৰী নিয়ােজিত কৰা হয়।
নাছসকলে যিদৰে ৰােগীৰ চোৱা- চিতা কৰে, সেইদৰে অক্সিজেনৰ পৰা ঔষধ ক্রয়ৰ বাবে বাকী তিনিজনে অন্যান্য দায়িত্ব পালন কৰে। ইয়াৰ উপৰি এই মিনি হাস্পতালত পিপিই কিট, পাল অক্সিমিটাৰ, অক্সিজেন কনচেটেৰ আদিও উপলবদ্ধ আছে। দুগৰাকী নাৰ্ছক তেওঁ দৈনিক চাৰি হেজাৰ টকাকৈ পাৰিশ্রমিক দিয়ে।
উল্লেখ্য যে হাউছিং কমপ্লেক্সটোত দুশ লােকে বাস কৰে। সম্প্রতি ৬০জন লােক কৰ’নাত আক্রান্ত । সকলােকে উক্ত ক’ভিড কেন্দ্ৰত সেৱা কৰাটো সম্ভৱ নহয়।গতিকে আক্রান্তসকলৰ ভিতৰত যিসকলৰ অক্সিজেনৰ মাত্রা ৯০ৰ তললৈ নামিছে, একমাত্র তেওঁলােককহে এই কেন্দ্ৰলৈ অনা হৈছে ।
মাত্র পাঁচখন বিছনা থকাৰ বাবে পাঁচজন কৰ’না ৰােগীয়েহে চিকিৎসা লাভ কৰিব। তেওঁলােকৰ ভিতৰত অক্সিজেনৰ মাত্রা ৯০ৰ ওপৰলৈ উঠাসকলক নিজগৃহত আছুতীয়াকৈ থকাৰ বাবে প্ৰেৰণ কৰা হয়। সেই স্থানত আন এজন ৰােগীক সেৱা কৰা হয়।
উল্লেখ্য যে এই ক্ষেত্ৰত বিশালে উক্ত কমপ্লেক্সতে বাস কৰা চিকিৎসকসকলকো কাষত পাইছে। ৰােগীক কেতিয়া কি ঔষধ দিয়া হ’ব, সেইবােৰৰ প্রতি দিনে-নিশাই দৃষ্টি ৰাখি সহযােগ কৰিছে চিকিৎসকসকলে।
