বিশ্ব ঐতিহ্যক্ষেত্ৰ মানাহ ৰাষ্ট্ৰীয় উদ্যানত পুনৰ মুকলি কৰি দিয়া হ’ল চাৰিটাকৈ দুষ্প্ৰাপ্য নল গাহৰি ৷ নল গাহৰি সংৰক্ষণ প্ৰজেক্টৰ অধীনত ৰাষ্ট্ৰীয় উদ্যানখনৰ ভূঞাপাৰা ৰেঞ্জৰ ৰূপহী অঞ্চলত মুকলি কৰি দিয়া হয় নল গাহৰিকেইটা ৷
উল্লেখ্য যে নল গাহৰি হৈছে বিশ্বৰ বন্য জীৱকুলৰ ভিতৰত বনগাহৰিৰ দুষ্প্ৰাপ্য তথা পৃথিৱীৰ ভিতৰতে ক্ষুদ্ৰতম গাহৰিৰ প্ৰজাতি৷ যি বিলুপ্তপ্ৰায় নল গাহৰিৰ পৃথিৱীৰ ভিতৰতে অন্যতম উপযুক্ত বসতিস্থল মানাহ ৰাষ্ট্ৰীয় উদ্যান৷ নল গাহৰি সংৰক্ষণ প্ৰজেক্টৰ অধীনত যোৱা ২২ জুনতো মানাহত আঠটা নল গাহৰি মুকলি কৰি দিয়া হৈছিল ৷
আনহাতে আজি চাৰিটা নল গাহৰি মুকলি কৰি দিয়াৰ পাছত পৰৱৰ্তী পৰ্যায়ত আঁচনিখনৰ অধীনত মানাহত ২০২৪ চনৰ ভিতৰত সৰ্বমুঠ ৬০ টা নল গাহৰি মুকলি কৰি দিয়াৰ লক্ষ্য হাতত লোৱা হৈছে ৷
বিগত বৰ্ষত ১৪ টা আৰু এই বৰ্ষত ১২ টা সহ মানাহত দুটা বছৰত মুঠ ২৬ টা নল গাহৰি মুকলি কৰি দিয়া হ’ল৷ এই বিষয়ে উদ্যানখনৰ ক্ষেত্ৰ সঞ্চালক অমল চন্দ্ৰ শৰ্মাই সাংবাদিকক সম্বোধন কৰি কয় যে,২২ জুনত আঠটা আৰু আজি চাৰিটাসহ ১২ টা নল গাহৰি মুকলি কৰি দিয়া হ’ল মানাহত ৷
বিগত বৰ্ষতো ১৪ টা নল গাহৰি মানাহলৈ স্থানান্তৰ কৰা হৈছিল ৷ দুবছৰত ২৬ টা অনা হ’ল ৷ ২০২০ৰ পৰা ২০২৪ চনৰ ভিতৰত ৬০ টা নল গাহৰি অনা হ’ব নল গাহৰি সংৰক্ষণ প্ৰজেক্টৰ আধাৰত ৷
এইটো মানাহ কৰ্তৃপক্ষৰ ভাল প্ৰচেষ্টা ৷নল গাহৰিৰ সংৰক্ষণ আৰু বৃদ্ধিৰ যি কাৰ্যসূচী তাত গৌতম নাৰায়ণ,পৰাগ ডেকা,ধৃতিমান দাস আদিয়ে নিৰন্তৰভাবে লাগি আছে৷তাৰ উপৰিও বন বিভাগৰ উপ ক্ষেত্ৰ সঞ্চালক ৰঘুনাথ বড়ো,বাঁহবাৰী আৰু ভূঞাপাৰা বন শিবিৰৰ বিষয়া ক্ৰমে বাবুল ব্ৰহ্ম আৰু কামেশ্বৰ বড়ো,বনকৰ্মীসকল আদিও অহৰ্নিশে কাম কৰি গৈ আছে ৷
পৃথিৱীৰ ভিতৰত মানাহতে নল গাহৰি পায় বুলি পৰ্যটকে শুনিছিল যদিও বিগত বৰ্ষৰপৰাহে এই নল গাহৰি মানাহৰ ভূঞাপাৰা বন শিবিৰৰ ৰূপহী অঞ্চলৰ আশেপাশে পৰ্যটকে দেখিবলৈ পাইছিল ৷
আগতে নল গাহৰিৰ বসতিস্থল মানাহ বুলি পৰ্যটকে শুনিবলৈ পাইছিল কিন্তু এটা সময়ত সংখ্যা কমি যোৱা বাবে তেনেকৈ দেখিবলৈ পোৱা নাছিল ৷ পূৰ্বৰপৰাই মানাহত নলগাহৰি আছিল৷ ১৯৯৬ ৰপৰা ২০১৩ৰ ভিতৰত দহটা নল গাহৰি মানাহৰ পৰা নামেৰিলৈ স্থানান্তৰ কৰা হৈছিল যাতে কমি যোৱা সংখ্যা বৃদ্ধি পায় ৷
তাৰ পাছত নামেৰিৰ পৰা বৰনদী,ওৰাং আদিত নল গাহৰি মুকলি কৰি দিব পৰা হৈছিল আৰু এতিয়া পুনৰ মানাহলৈ নল গাহৰি উভতাই আনিব পৰা হৈছোঁ৷ ইয়াৰ জৰিয়তে আমি আশা কৰিব পাৰোঁ যে মানাহলৈ নিশ্চিতভাবে পূৰ্বতকৈ পৰ্যটকৰ সংখ্যা বৃদ্ধি পাব ৷
