বিগত ছমাহৰো অধিক সময় ধৰি চলি থকা নতুন কৃষি আইনৰ বিৰুদ্ধে হোৱা আন্দোলনক লৈ পোনপটীয়া সতৰ্কবাণী জাৰি কৰিছে হাৰিয়ানাৰ মুখ্যমন্ত্ৰী মনোহৰ লাল খট্টৰে । বুধবাৰে তেওঁ কয়, “কৃষকৰ বিক্ষোভ প্ৰতিবাদৰ সন্মুখত ৰাজনৈতিক নেতাসকল নীৰৱ হৈ আছে ঠিকেই, কিন্তু সীমা অতিক্ৰম কৰাটো ভাল নহ’ব ।”
বুধবাৰে গাজীপুৰৰ কাষত দিল্লী উত্তৰপ্ৰদেশ-দিল্লী সীমান্তত থকা প্ৰতিবাদী কৃষকসকলৰ লগত স্থানীয় বিজেপি নেতাসকলৰ সংঘৰ্ষ হয় ।
এই সন্দৰ্ভত খট্টৰে এইদৰে কয়, “কিষাণ শব্দটো অতি পৱিত্ৰ । কিন্তু কিছুমান দুৰ্ভাগ্যজনক ঘটনাৰ বাবে, শব্দটোৰ অৰ্থ আজি সলনি হৈছে । মাতৃ আৰু ভগ্নীসকলক হাৰাশাস্তি কৰা হৈছে । হত্যা কৰা হৈছে । পথ অৱৰোধ কৰা । মই এনে অগণতান্ত্ৰিক ঘটনাৰ তীব্ৰ বিৰোধিতা কৰিছো ।”
কৃষক আন্দোলনৰ বাবে হাৰিয়ানাত খট্টৰ চৰকাৰ যথেষ্ট চাপত আছে । বিজেপি নেতাসকলক গাঁৱত প্ৰৱেশ কৰাত বাধা দিয়াৰ বাতৰিও আগতে প্ৰকাশ পাইছে । সেই সন্দৰ্ভত খট্টৰে কয়, “আমি শান্তি অটুট ৰাখিছো । তথাপিও তেওঁলোকে আমাক ভাবুকি দি আছে । মুখ্যমন্ত্ৰী, উপ মুখ্যমন্ত্ৰীয়ে ক’তো যাব পৰা নাই । তেওঁলোকে আমাক সৈমান কৰিছিল কিন্তু আমি নীৰৱ কাৰণ তেওঁলোকো এই ৰাজ্যৰ মানুহ । কিন্তু যদি কোনোবাই সীমা অতিক্ৰম কৰে তেন্তে ভাল নহ’ব ।”
