বাগসা জিলাৰ শালবাৰী মহকুমাৰ অন্তৰ্গত বাঁহবাৰীস্থিত মানাহ ৰাষ্ট্ৰীয় উদ্যানৰ পৰিদৰ্শন বঙলাত বুধবাৰে আবেলি শালবাৰী জিলা ইউপিপিএলৰ এখন গুৰুত্বপূৰ্ণ সভা অনুষ্ঠিত হয় ৷
সভাত বিটিআৰৰ কাৰ্যবাহী সদস্য ৰাকেশ ব্ৰহ্মই অংশগ্রহণ কৰি কয় যে বিগত সময়ছোৱাত বিটিচি আৰু বিধানসভা দুটাকৈ নিৰ্বাচন সম্পন্ন কৰাৰ পাছত শালবাৰী মহকুমাৰ উন্নয়ন সম্পৰ্কে আলোচনাৰ্থে দলৰ চি ডব্লিউ চি পৰ্যায়ত গঠিত “টিম ২০”ৰ সভাখন আয়োজন কৰা হৈছে৷
সম্প্ৰতি নতুন বিটিআৰ চৰকাৰখনে পূৰ্বৰ বিপিএফ চৰকাৰে আমোলা বিষয়া সকলক নিয়ন্ত্ৰণৰ আওতাৰ বাহিৰত থৈ দুই হেজাৰ ৬০০ কোটি টকা ধাৰ লগাই থৈ যোৱাৰ ওপৰত মন্থন চলোৱাৰ উপৰি বিটিআৰ চুক্তিৰ কাৰ্যকৰীৰ কাম বৰ্তমান ধুম ধামেৰে চলি আছে৷
বিপিএফ দলৰ স’তে জৰিত থকা প্ৰাক্তন এনডিএফবি সদস্য সকলে বিপিএফ দলৰ হৈ কাম কৰি আছে বুলি উল্লেখ কৰি কাৰ্যবাহী সদস্য ৰাকেশ ব্ৰহ্মই বিপিএফ দলৰ লগত জৰিত এনডিএফবি সদস্য সকলে সমাজত বিভ্রান্তি অনাৰ কাৰণে বিভিন্ন কথা কৈ আছে বুলি উল্লেখ কৰে৷
তেওঁ কয়, ড্ৰাগছ বিৰোধী স্থিতিৰ ক্ষেত্ৰত বিটিআৰৰ চাৰিওখন জিলাৰ প্ৰশাসনে তীব্র নজৰ ৰাখি কাম কৰি আছে।বৰ্তমান ৰাজ্যত মূল্যবৃদ্ধি হোৱা বুলি আমি ভবা নাই৷ বজাৰত ভাৰসাম্যহীন পদ্ধতি চলাৰ বাবে দুই এখন খুচুৰা দোকানত দামৰ কিছু ইফাল সিফাল হৈছে যদিও সেইয়া নিৰীক্ষণ কৰি থকা হৈছে৷
আমাৰ চৰকাৰক বিৰোধী দল সমূহে এনকাউন্টাৰ কৰা বুলি অভিযোগ কৰিব বিচাৰিছে। কিন্তু নিৰাপত্তাৰক্ষীৰ হাতৰ পৰা বন্দুক কাঢ়ি নিব বিচৰা লোক জনক নিয়মানুসাৰে আত্মৰক্ষাৰ খাতিৰত আঠুৰ তলতহে গুলীওৱা হৈছে যিটো সৰ্বজনবিদিত৷
ইউপিপিএল দলটোৰ মাজত সময়ে সময়ে বিসম্বাদৰ সৃষ্টি হোৱা বিষয়টোক লৈ সাংবাদিকে সোধা প্ৰশ্নৰ উত্তৰত ব্ৰহ্মই কয়-“দলৰ মাজত বিসম্বাদ থাকিবই৷গিৰিয়েক-ঘৈণীয়েকৰ মাজত যেনেকৈ কাজিয়া পেচাল লাগে দলৰ মাজতো হ’ব পাৰে৷
য’ত মৰম বেছি হয় তাত বিসম্বাদো বেছি হয়৷ ইয়াত নতুনত্ব একো নাই৷ দল থকালৈকে এইবোৰ চলি থাকিব৷” বিটিআৰ চৰকাৰখনে সম্প্ৰতি বিটিআৰৰ উন্নয়নৰ কাম তীব্র গতিৰে কৰি আছে বুলিও কাৰ্যবাহী সদস্য ৰাকেশ ব্ৰহ্মই মন্তব্য কৰে।
