উচ্চতম ন্যায়ালয়ৰ দ্বাৰস্থ হ’ল পেগাছাছৰ জৰিয়তে সম্ভাব্য নিৰীক্ষণৰ তালিকাত থকা পাঁচ সাংবাদিক । এইয়ে প্ৰথম সম্ভাব্য নিৰীক্ষণৰ তালিকাত থকা ব্যক্তি ন্যায়ালয়ৰ দ্বাৰস্থ হ’ল ।
পেগাছাছৰ জৰিয়তে সম্ভাব্য নিৰীক্ষণ সম্পৰ্কে তদন্ত বিচাৰি ইতিমধ্যে উচ্চতম ন্যায়ালয়ত গোচৰ ৰুজু কৰিছে প্ৰবীণ সাংবাদিক এন ৰাম আৰু শশী কুমাৰ, অধিবক্তা এম এল শৰ্মা আৰু ৰাজ্যসভাৰ সদস্য জন ব্ৰিট্টাছে । বৃহস্পতিবাৰে এই আবেদনবোৰৰ শুনানি হ’ব ।
আজি শীৰ্ষ ন্যায়ালয়ত আবেদন কৰিছে পৰঞ্জয় গুহ ঠাকুৰতা, এছ এন এম আবদি, প্ৰেমশংকৰ ঝা, ৰূপেশকুমাৰ সিং আৰু ইপসা শতাক্ষীয়ে । এই পাঁচগৰাকীয়ে আবেদনত জনাইছিল, পেগাছাছৰ সন্দৰ্ভত তথ্য ফাদিল হোৱাৰ পাছত তেওঁলোকে তদন্তকাৰী সংবাদ মাধ্যমবোৰৰ প্ৰতিনিধিক নিজৰ ফোন দিছিল । এমনেষ্টি ইণ্টাৰনেচনেলৰ পৰীক্ষাগাৰত ডিজিটেল ফৰেন্সিক পৰীক্ষাৰ জৰিয়তে জনা যায় যে, পেগাছাছৰ জৰিয়তে তেওঁলোকৰ ফোনত নিৰীক্ষণ কৰা হৈছিল ।
আবেদনকাৰীসকলে জনায় যে, তেওঁলোকৰ ফোন ভাৰত চৰকাৰ বা কোনো তৃতীয় পক্ষই নিৰীক্ষণ কৰিছে বা হেক কৰিছে বুলি সন্দেহ কৰাৰ যথেষ্ট কাৰণ আছে । ভাৰত চৰকাৰে এতিয়াও পেগাছাছ স্পাইৱেৰ ক্ৰয় কৰাৰ কথা অস্বীকাৰ কৰা নাই ।
আবেদনকাৰীসকলৰ মতে, এনেদৰে আধুনিক স্পাইৱেৰৰ জৰিয়তে নিৰীক্ষণ কৰাই বাকস্বাধীনতা খৰ্ব কৰিব । এইটো ব্যক্তিপৰিসৰৰ অধিকাৰৰো পৰিপন্থী । ইয়াৰ ফলত চৰকাৰৰ বিভিন্ন স্তৰত অনিয়মক লৈ যিসকলে তথ্য সৰবৰাহ কৰে তেওঁলোক আগবাঢ়ি নাহিব । ফলত সমগ্ৰ দেশত প্ৰশাসনৰ স্বচ্ছতাৰ ওপৰত বিৰূপ প্ৰভাৱ পৰিব ।
আবেদনকাৰীসকলে উচ্চতম ন্যায়ালয়ত পাঁচটা নিৰ্দিষ্ট বিষয়ত নিৰ্দেশ দিয়াৰ আবেদন জনাইছে । প্ৰথমতে, পেগাছাছৰ দৰে স্পাইৱেৰ ব্যৱহাৰক বেআইনী ঘোষণা কৰা । দ্বিতীয়তে, আবেদনকাৰীসকলৰ বিৰুদ্ধে পেগাছাছ ব্যৱহাৰৰ নিৰ্দেশ বা সেই বিষয়ে তদন্ত সংক্ৰান্ত সকলো তথ্য উচ্চতম ন্যায়ালয় আৰু আবেদনকাৰীসকলক জনাব লাগে । তৃতীয়তে, পেগাছাছৰ দৰে চাইবাৰ অস্ত্ৰৰ পৰা ভাৰতীয় নাগৰিকসকলক ৰক্ষা কৰিবলৈ চৰকাৰৰ তৰফৰ পৰা উপযুক্ত পদক্ষেপ গ্ৰহণ কৰা । চতুৰ্থতে, বেআইনী চোৰাংচোৱা বা হেকিঙৰ স’তে জড়িত বিষয়াসকলক শাস্তি প্ৰদান কৰিবৰ বাবে বিচাৰবিভাগীয় ব্যৱস্থা তৈয়াৰ কৰা । পঞ্চমতে, ন্যায়বিচাৰৰ স্বাৰ্থত প্ৰয়োজনীয় যিকোনো নিৰ্দেশ প্ৰদান কৰা ।
ইপিনে, আজি পেগাছাছ কাণ্ডৰ তদন্তৰ দাবীত সৰৱ হৈছে বিহাৰৰ মুখ্যমন্ত্ৰী নীতিশ কুমাৰো । এই অভিযোগৰ তদন্তক লৈ নৰেন্দ্ৰ মোদী চৰকাৰৰ স’তে বিৰোধীসকলৰ বাক বিতৰ্কৰ ফলত বৰ্ষাকালীন অধিবেশন স্থগিত কৰিবলৈ বাধ্য হয় ।
এই সন্দৰ্ভত মুখ্যমন্ত্ৰী নীতিশে কয়, ‘বহুদিশ ধৰি ফোনত চোৰাংচোৱা কৰাৰ কথা শুনিবলৈ পোৱা গৈছে । বিষয়টো সংসদত উত্থাপন কৰা হৈছে । সংবাদ মাধ্যমত প্ৰতিবেদন প্ৰকাশিত হৈছে । সেয়ে বিষয়টো পৰ্যবেক্ষণ কৰা উচিত । যি তথ্য পোৱা যায় সেয়া দেশবাসীক জনোৱা উচিত ।’
তেওঁ লগতে কয়, ‘এতিয়া এইবোৰ ঘটনা কোনে, ক’ত ঘটায় সেয়া বোজা কঠিন । সেয়ে পৰ্যবেক্ষণ কৰি বিষয়টো দেশবাসীক জনোৱা উচিত ।’
