ঐতিহাসিক অসম চুক্তিৰ ফচল নুমলীগড় শোধনাগাৰৰ বহু প্ৰত্যাশিত প্ৰকল্প সম্প্ৰসাৰণৰ কাম আৰম্ভ হোৱালৈ মাজত আৰু কেইটামান মাহ বাকী আছে। তেনে সময়তে শোধনাগাৰৰ সম্প্ৰসাৰণৰ নিমিত্তে প্ৰয়োজনীয় কিছুমান অত্যাধিক গধুৰ সামগ্ৰীসমূহ জলমাৰ্গেৰে অনাৰ উদ্দেশ্যে আজি নুমলীগড় শোধনাগাৰৰ কুঞ্জ-কাননত বন্দৰ, জাহাজ আৰু জলপথ বিভাগৰ মন্ত্ৰী কেন্দ্ৰীয় মন্ত্ৰী সৰ্বানন্দ সোণোৱালৰ উপস্থিতিত এক গুৰুত্বপূৰ্ণ দ্বি-পাক্ষিক চুক্তি স্বাক্ষৰিত হয়।
ভাৰতৰ আভ্যন্তৰীণ জল-পৰিবহন প্ৰাধিকৰণ আৰু নুমলীগড় শোধনাগাৰৰ মাজত অনুষ্ঠিত হোৱা এই বুজাবুজি চুক্তিয়ে অনাগত সময়ত এন আৰ এলৰ সম্প্ৰসাৰণৰ বাবে প্ৰয়োজনীয় সামগ্ৰী জাহাজেৰে পশ্চিমবংগৰ হালদিয়াৰ পৰা নুমলীগড় হৈ ধনশিৰি নদীৰে পোনপটীয়াকৈ নুমলীগড় শোধনাগাৰলৈ অনাৰ লক্ষ্য নিৰ্ধাৰণ কৰা হৈছে।
অনুষ্ঠানত উপস্থিত কেন্দ্ৰীয় মন্ত্ৰী সোনোৱালে কয় যে প্ৰধানমন্ত্ৰী নৰেন্দ্ৰ মোদীৰ নেতৃত্বত অসম তথা উত্তৰ-পূৰ্বাঞ্চলৰ ব্যাপক উন্নয়ন সাধন হ’ব। প্ৰথমে এক্ট ইষ্ট প’লিচি আৰু এতিয়া লোক ইষ্ট প’লিচিৰে অসম তথা পূৰ্বাঞ্চলৰ আঠোটাকৈ ৰাজ্যৰ বিকাশ কৰা হ’ব।
ইংৰাজ শাসন কালত অসমৰ এক সুকীয়া সুনাম আছিল আৰু পুনৰ এই সুনাম ঘূৰাই আনিব লাগিব বুলিও মন্ত্ৰী গৰাকীয়ে মন্তব্য প্ৰকাশ কৰে। অনুষ্ঠানত কৃষিমন্ত্ৰী অতুল বৰাই কয় যে এই জলমাৰ্গ স্থায়ী কৰি তুলিব লাগে আৰু অসমত উৎপাদিত সামগ্ৰী সমূহ সহজতে বিদেশলৈ ৰপ্তানি কৰিব পৰা যাব বুলিও আশা প্ৰকাশ কৰে।
উল্লেখ্য যে ৫০ মিটাৰ দীঘল আৰু ১২ মিটাৰ পৰ্যন্ত উচ্চতাৰ এহেজাৰ টন ভৰৰ সামগ্ৰী কঢ়িয়াই অনাৰ বাবে জলপথেই আটাইতকৈ সুবিধাজনক হয়। সেয়েহে, হালদিয়াৰ পৰা নুমলীগড় পৰ্যন্ত মুঠ এহেজাৰ কিলোমিটাৰ জলমাৰ্গ সুচল কৰি তোলাৰ আঁচনি গ্ৰহণ কৰা হয়।
আজি ভাৰতীয় আভ্যন্তৰীণ জল-পৰিবহন প্ৰাধিকৰণ(আই ডব্লিউ এ আই)ৰ কাৰিকৰী সদস্য আশুতোষ গৌতম উপস্থিত থাকি জাহাজ পৰিবহনৰ উপযোগী কৰি তোলাৰ বাবে ব্ৰহ্মপুত্ৰৰ ৫৩৫ কিলোমিটাৰ আৰু ধনশিৰি নদীৰ ৩৬ কিলোমিটাৰ খনন কৰিব লাগিব বুলি প্ৰকাশ কৰে।
ধনশিৰিত একৰ পৰা ডেৰ মিটাৰ খনন চলাই ২.২ৰ পৰা ২.৫ মিটাৰ দ কৰিব লাগিব। ছয়-সাত কুবিক মিটাৰ খনন কৰা হ’ব বুলিও তেওঁ জনায়। তেওঁ জনোৱা মতে ২০২২ৰ ছেপ্টেম্বৰ মাহত প্ৰথমটো জাহাজ অনাৰ লক্ষ্যৰে ইয়াৰ ছয় মাহৰ আগত কাম আৰম্ভ কৰা হ’ব বুলিও প্ৰকাশ কৰে আৰু এই প্ৰক্ৰিয়াত মুঠ দহৰ পৰা বাৰ কোটিটকাৰ ব্যয় হ’ব বুলিও সদৰী কৰে।
অনুষ্ঠানত ভাৰ্চুৱেলি অংশগ্ৰহন কৰে কেন্দ্ৰীয় পেট্ৰ’লিয়াম আৰু প্ৰাকৃতিক গেছ বিভাগৰ ৰাজ্যিক মন্ত্ৰী ৰামেশ্বৰ তেলীয়ে ৷ ইপিনে, অনুষ্ঠানত সৰুপথাৰ সমষ্টিৰ বিধায়ক বিশ্বজিৎ ফুকন, দেৰগাওঁ সমষ্টিৰ বিধায়ক ভবেন্দ্ৰ নাথ ভৰালী, নুমলীগড় শোধনাগাৰৰ পৰিচালন সঞ্চালক সৌমেন্দ্ৰ কুমাৰ বৰুৱা, কাৰিকৰী সঞ্চালক ভাস্কৰ জ্যোতি ফুকন আৰু শোধনাগাৰটোৰ বিত্তীয় সঞ্চালক আই মিত্ৰা উপস্থিত থাকে৷ নুমলীগড় শোধনাগাৰে বৰ্তমানৰ বছৰি তিনি নিযুত মেট্ৰিক টন শোধন ক্ষমতাৰ তিনিগুণ বৃদ্ধি কৰি ন নিযুত মেট্ৰিক টন কৰিবলৈ শোধনাগাৰ সম্প্ৰসাৰণ প্ৰকল্পৰ কাম আৰম্ভ কৰিব।
এই সম্প্ৰসাৰিত প্ৰকল্পটোৰ বাবে সমগ্ৰ দেশ আৰু বিদেশৰ পৰা এহেজাৰৰো অধিক বৃহৎ সঁজুলি জল পথেৰে শোধনাগাৰটোলৈ অনা হ’ব । এই সঁজুলিবোৰৰ কে’বাটাও সঁজুলি অভাৰ ডাইমেনশ্যনেল কনচাইনমেণ্ট আৰু অত্যাধিক ওজন কনচাইনমেণ্ট শ্ৰেণীৰ। ইয়াৰ বাবে এই সঁজুলিসমূহ আনিবৰ বাবে নুমলীগড় শোধনাগাৰে ব্ৰহ্মপুত্ৰ আৰু ধনশিৰি নদীৰ জলপথ ব্যৱহাৰ কৰিব। ইয়াৰ বাবে আনকি দেশৰ পশ্চিমাঞ্চলৰ মুখ্য বন্দৰবোৰক উত্তৰ-পূব অঞ্চলক সংযোগ কৰিবলৈ সাগৰ আৰু নদীৰ পথবোৰ ব্যৱহাৰ কৰিব বুলি নুমলীগড় শোধনাগাৰ কৰ্তৃপক্ষই জানিবলৈ দিয়ে ৷
অনুষ্ঠানৰ আৰম্ভণিতে বন্তি প্ৰজ্বলন কৰে কেন্দ্ৰীয় মন্ত্ৰী সৰ্বানন্দ সোণোৱালে। ইয়াৰ পাছতে শোধনাগাৰ কৰ্তৃপক্ষ আৰু আভ্যন্তৰীণ জল পথ প্ৰাধিকৰণৰ দ্বাৰা একোটাকৈ তথ্য-চিত্ৰ উপস্থাপনেৰে এই জল-পথৰ সবিশেষ তথ্য দাঙি ধৰে। অনুষ্ঠানৰ প্ৰাকক্ষণত নুমলীগড় ৰৌদুৱাৰ গাওঁত ধনশিৰি নদীত থকা নুমলীগড় শোধনাগাৰৰ নদী বন্দৰটোও কেন্দ্ৰীয় মন্ত্ৰী সৰ্বানন্দ সোনোৱালে পৰিদৰ্শন কৰে।
প্ৰেক্ষাগৃহ আৰু শীতলিকৰণ ভঁৰাল নিৰ্মাণ কৰাৰ ঘোষণা : কেন্দ্ৰীয় মন্ত্ৰী সৰ্বানন্দ সোণোৱাল আৰু কৃষিমন্ত্ৰী অতুল বৰাৰ আহ্বানৰ প্ৰতি লক্ষ্য ৰাখি নুমলীগড় শোধনাগাৰে অতি শীঘ্ৰেই গোলাঘাট জিলাৰ পাঁচোটা বিধানসভা সমষ্টি ক্ৰমে সৰুপথাৰ, বোকাখাত, গোলাঘাট, দেৰগাঁও আৰু খুমটাই সমষ্টিত ৰাইজৰ সুবিধা হোৱাকৈ একোখনকৈ সুন্দৰ প্ৰেক্ষাগৃহ নিৰ্মাণ কৰিব বুলি আজি পৰিচালন সঞ্চালক এছ কে বৰুৱাই ঘোষণা কৰে। তদুপৰি, এন আৰ এলৰ সমীপৱৰ্তী লৱনঘাটৰ ৩৯ নম্বৰ ৰাষ্ট্ৰীয় পথৰ দাঁতিত আনাৰসকে আদি কৰি কৃষকৰ উৎপাদিত ফচল সংৰক্ষণৰ নিমিত্তে এটা শীতলিকৰণ ভঁৰালো নিৰ্মান কৰা হ’ব বুলিও ঘোষণা কৰে।
