বাগসাৰ শালবাৰীত ফেচবুকত দেশবিৰোধী আপত্তিজনক প’ষ্ট কৰি আৰক্ষীৰ হাতত গ্ৰেপ্তাৰ হয় এজন যুৱক। গ্ৰেপ্তাৰ হোৱা যুৱকজন ৰফিকুল ইছলাম ওৰফে পাখী ৷
পাখী “পপুলাৰ ফ্ৰন্ট অৱ ইণ্ডিয়া” নামৰ সংগঠন এটাৰ সদস্য বুলি আৰক্ষী সূত্ৰই সদৰী কৰিছে ৷ ৰফিকুল ইছলাম ওৰফে পাখীৰ ঘৰ শালবাৰীৰ আনন্দ বজাৰ আৰক্ষী চকীৰ অন্তৰ্গত ভকুৱামাৰীত । কে’বাদিন ধৰি সামাজিক মাধ্যম ফেচবুকত বহু দেশবিৰোধী আপত্তিজনক প’ষ্ট দি মন্তব্য কৰি আহিছিল ধৃত ৰফিকুল ইছলামে । তাৰ পাছতেই যোৱা নিশা শালবাৰী মহকুমা আৰক্ষী বিষয়া সমীৰণ বৈশ্যৰ নেতৃত্বত আৰক্ষীয়ে নিজ গৃহৰ পৰাই গ্ৰেপ্তাৰ কৰিবলৈ সক্ষম হয় ৰফিকুল ইছলামক ৷
শালবাৰী আৰক্ষী থানাত ৬৯/২০২১ নম্বৰত গোচৰ ৰুজু কৰি ইউএছ/১২৪ (ক) /১৫৩ (ক) /১৫৩ (খ) / ২৯৮/ ৫০৫ আইপিচি আৰ/ডব্লিউ শাখা ৬৬-এফ আইটি এক্টৰ অধীনত শালবাৰী আৰক্ষীয়ে আটক কৰে ৰফিকুলক । শালবাৰী আৰক্ষী থানাত ৰফিকুল ইছলামক সোধ-পোচ কৰি আজি বাগসা জিলাৰ সদৰ মুছলপুৰলৈ প্ৰেৰণ কৰা হয় ৷
ইপিনে, শালবাৰী আৰক্ষীয়ে ৰফিকুল ইছলামক গ্ৰেপ্তাৰ কৰা সন্দৰ্ভত সংবাদ মাধ্যমৰ আগত বিশেষ কোনো মন্তব্য দিয়াৰ পৰা বিৰত থাকে ।