উত্তৰপ্রদেশৰ আসন্ন বিধানসভা নির্বাচনত কংগ্রেছৰ প্রার্থীসকলৰ ৪০ শতাংশই মহিলা হ’ব, মঙলবাৰে লখনৌত এই ঘোষণা কৰিলে প্রিয়ংকা গান্ধীয়ে । যদিও তেওঁ নিৰ্বাচনত প্ৰতিদ্বন্দিতা কৰিব নে নাই সেয়া এই পৰ্যন্ত স্পষ্ট কৰা নাই । সাংবাদিক বৈঠকত জনাইছে, ৪০৩টা আসনৰ প্রার্থী পদৰ বাবে পৃথককৈ আবেদনপত্র গ্রহণ কৰা হ’ব ১৫ নৱেম্বৰ পর্যন্ত ।
লখনৌত সাংবাদিক বৈঠকত প্রিয়ংকাই কয়, ‘‘আপোনালোকক (মহিলাসকলক) ৰক্ষা কৰিবলৈ কোনো নাই । যিসকলে আপোনালোকক ৰক্ষা কৰাৰ কথা কৈছে, তেওঁলোকে নিজৰ নিৰাপত্তা পায়, আপোনালোকৰ নাপায় ।’’ মঙলবাৰে তেওঁ মহিলাসকলক আগুৱাই আহি খোজত খোজ মিলাই যুঁজ দিয়াৰ কথা কয় । তেওঁ কয়, ‘‘আপোনালোকক দুহেজাৰ টকা আৰু গেছ চিলিণ্ডাৰ দি সন্তুষ্ট কৰিব বিচাৰিছে চৰকাৰে, কিন্তু নিৰাপত্তাৰ ক্ষেত্ৰত ধ্যান নাই । আমি শক্তিশালী মহিলা প্রার্থী বিচাৰো, দলীয়ভাৱে আমি মহিলাসকলক পৃথক প্রাধান্য দিম ।’’
সাংবাদিক বৈঠকত উত্তৰপ্রদেশৰ মুখ্যমন্ত্রী যোগী আদিত্যানাথকো কটাক্ষ কৰে প্রিয়ংকাই । তেওঁ লখিমপুৰ খেৰিৰ সাম্প্রতিক প্রসংগ দাঙি ধৰিছে । কেন্দ্রীয় মন্ত্রীৰ গাড়ী ব্যৱহাৰৰ কথাও তেওঁ উত্থাপন কৰে । উন্নাও, হাথৰছ, সোনভদ্রৰ আদিবাসী মহিলাৰ ওপৰত নির্যাতন, এনে ধৰণৰ নানা প্রসংগ দাঙি ধৰি প্রিয়ংকাই কয়, ‘‘এই সিদ্ধান্ত এইসকল নির্যাতনৰ বিৰুদ্ধে বার্তা ।’’