ভোট গণনাক লৈ উত্তেজনা বৃদ্ধি পোৱাৰ মাজতে অসম প্ৰদেশ কংগ্ৰেছৰ এটি ছয় জনীয়া দলে হঠাৎ নলবাৰীত উপস্থিত হৈ ষ্ট্ৰংৰুম পৰিদৰ্শন কৰে। প্ৰদেশ কংগ্ৰেছৰ সভাপতি গৌৰৱ গগৈৰ নিৰ্দেশত এই পৰিদৰ্শন কাৰ্যসূচী সম্পন্ন কৰা হয়।
দলটোত কংগ্ৰেছৰ জ্যেষ্ঠ নেতা সত্যব্ৰত কলিতা আৰু প্ৰাক্তন বিধায়িকা শিৱামনি বৰাৰ লগতে আন কেইবাগৰাকী নেতা উপস্থিত থাকে। তেওঁলোকে নলবাৰী মহাবিদ্যালয়ত স্থাপন কৰা ষ্ট্ৰংৰুম পৰিদৰ্শন কৰি পৰিস্থিতিৰ বিৱৰণ লয়।
ইয়াৰ পূৰ্বে, কংগ্ৰেছৰ দলটো নলবাৰীস্থিত ৰাজীৱ ভৱনত মিলিত হৈ নলবাৰীৰ তিনিজন প্ৰাৰ্থী—দিগন্ত বৰ্মন, ৰাতুল পাটোৱাৰী আৰু অশোক শৰ্মাৰ সৈতে আলোচনা কৰে।
পৰিদৰ্শনৰ পাছত কংগ্ৰেছ নেতাসকলে ষ্ট্ৰংৰুমৰ সুৰক্ষাক লৈ আশ্বস্ত হোৱা বুলি কয় যদিও ভোট গণনাৰ সময়ত কোনো ধৰণৰ অনিয়ম যাতে নহয় তাৰ বাবে দলীয় কৰ্মীসকলক সজাগ আৰু সাৱধান থাকিবলৈ আহ্বান জনায়।
ইয়াৰ লগতে নেতা সত্যব্ৰত কলিতাই আত্মবিশ্বাস প্ৰকাশ কৰি কয় যে, এইবাৰ কংগ্ৰেছে ৰাইজৰ দল, অজাপ আৰু চিপিআই(এম)-ৰ স’তে মিত্ৰতা কৰি প্ৰায় ৬৫খন আসন লাভ কৰি চৰকাৰ গঠন কৰিব।