বৰপেটা জিলাৰ উপায়ুক্ত তেজ প্ৰসাদ ভূষালৰ নিৰ্দেশ মৰ্মে আজি ৰাজহুৱা বিতৰণ ব্যৱস্থাৰ চাউল বিতৰণত অনিয়ম কৰাৰ অভিযোগত সৰুক্ষেত্ৰী সমষ্টিৰ কয়াকুছিৰ এজন দোকানীক গ্ৰেপ্তাৰ কৰা হয় । উপায়ুক্তৰ নিৰ্দেশ মৰ্মে আজি অতিৰিক্ত উপায়ুক্ত নৱজিৎ পাঠকৰ নেতৃত্বত যোৱা যোগান বিভাগৰ এটা দলে কয়াকুছি বজাৰত অভিযান চলাই সুলভ মূল্যৰ দোকানী মংগল আলীৰ দোকানত গুৰুতৰ বিসংগতি ধৰা পেলায় ।
উল্লেখ্য যে উক্ত দোকানীজনৰ বিৰুদ্ধে গ্ৰাহকক ৰাজহুৱা বিতৰণ ব্যৱস্থাৰ চাউল আৰু অন্যান্য সামগ্ৰী কমকৈ দিয়াৰ অভিযোগ উত্থাপন হৈ আহিছিল । তদন্তৰ সময়ত দোকানীজনে তদন্তকাৰী দলটোক কোনো নথিপত্ৰ দেখুৱাব পৰা নাছিল । ৰাইজৰ অভিযোগ আৰু তদন্তৰ সময়ত গুৰুতৰ বিসংগতি পৰিলক্ষিত হোৱাত দোকানীজনৰ বিৰুদ্ধে কয়াকুছি আৰক্ষী চকীত এখন এজাহাৰ দাখিল কৰা হয় । সেই মৰ্মে বৰপেটা থানাৰ অন্তৰ্গত কয়াকুছি আৰক্ষী চকীৰ আৰক্ষীয়ে ইতিমধ্যে দোকানীজনক গ্ৰেপ্তাৰ কৰিছে । দোকানখনৰ পৰা ৰাজহুৱা বিতৰণ ব্যৱস্থাৰ অধীনৰ ২.৫ কুইন্টল চাউল আৰু ৪০০ লিটাৰ কেৰাচিন জব্দ কৰিছে ।