বৰপেটাৰ সৰুক্ষেত্ৰী সমষ্টিৰ পাকা বেতবাৰী গাঁৱত চাঞ্চল্য ৷ পাকা বেতবাৰী গাঁৱৰ ৰূপচান্দ আলীৰ পত্নী জেছমিনা পাৰবীনে জন্ম দিলে দুই মূৰ সংলগ্ন হৈ থকা দুটি কন্যা সন্তানৰ ৷ ২৭ অক্টোবৰৰ মাজ নিশা গাঁওখনৰে এগৰাকী চিকিৎসকৰ ঘৰত শিশু দুটা স্বাভাৱিকভাৱে জন্ম হয় ৷
অৱশ্যে শিশু দুটিৰ মূৰ দুটা সংলগ্ন হৈ থকাৰ ঘটনাক লৈ গভীৰ সংকটত পৰিছে দুখীয়া পৰিয়ালতো ৷ আজি দুটা মূৰ সংলগ্ন যমজ কন্যা সন্তান দুটিক গুৱাহাটীলৈ প্ৰেৰণ কৰা হয় ৷
ইপিনে, শিশু দুটাৰ মূৰ দুটা সংলগ্ন হৈ জন্ম পোৱা ঘটনাটোৰ বিষয়ে জানিব পাৰি কালি সৰুক্ষেত্ৰী সমষ্টিৰ বিধায়ক জাকিৰ হুছেইন শিকদাৰ, বৰপেটাৰ অতিৰিক্ত উপায়ুক্ত নৱজিৎ পাঠক আৰু বৰপেটাৰ যুটীয়া স্বাস্থ্য সঞ্চালক ডাঃ তীৰ্থনাথ শৰ্মা প্ৰসূতিগৰাকীৰ গৃহত উপস্থিত হৈ শিশু আৰু প্ৰসূতি মাতৃগৰাকীৰ অৱস্থাৰ বুজ লয় ৷
শিশু দুটিৰ অৱস্থাৰ বুজ লৈ বৰপেটাৰ যুটীয়া স্বাস্থ্য সঞ্চালক ডাঃ তীৰ্থনাথ শৰ্মাই শিশু দুটিৰ মূৰ বিচ্চিন্ন কৰি দুয়োটা শিশুৰ স্বাভাৱিক জীৱন ঘূৰাই দিবৰ বাবে অস্ত্ৰোপচাৰৰ ব্যৱস্থা গ্ৰহণ কৰিব লাগিব বুলি সদৰী কৰে ৷ আনহাতে, অস্ত্ৰোপচাৰৰ ক্ষেত্ৰত স্বাস্থ্য বিভাগে প্ৰয়োজনীয় ব্যৱস্থা গ্ৰহণ কৰিব বুলিও প্ৰকাশ কৰে ৷ দুখীয়া পৰিয়ালটোক এনে সংকটৰ পৰা মুক্ত কৰাৰ বাবে সৰুক্ষেত্ৰীৰ বিধায়ক জাকিৰ হুছেইন শিকদাৰে গুৱাহাটী আৰু বৰপেটা মেডিকেল কলেজ হাস্পাতালৰ অধ্যক্ষৰ স’তে টেলিফোন যোগে আলোচনা কৰে ৷
বিষয়টো সন্দৰ্ভত দুয়োখন মেডিকেল কলেজ হাস্পাতাল কৰ্তৃপক্ষই বিশেষজ্ঞ চিকিৎসকৰ স’তে পৰৱৰ্তী সময়ত অস্ত্ৰোপচাৰ সম্পৰ্কে সিদ্ধান্ত ল’ব বুলি জানিবলৈ দিয়ে ৷
