আজিৰ আধুনিক জীবন শৈলীত অভ্যস্ত লােকসকল সহজে কিছুমান গভীৰ ৰােগত আক্রান্ত হােৱা দেখা যায়। কিছুমান জটিল ৰােগ ইমানে আজৱ যে এই ৰােগৰ কথা শুনিলে বহুতৰে বিশ্বাস নহয়।
এনে এটা অতি আচহুৱা ৰােগ হৈছে গেষ্ট্র’প’ৰেছিছ। এই ৰােগত আক্রান্ত এগৰাকী মহিলাই শেহতীয়াভাৱে সংবাদ শিৰােনাম দখল কৰিছে ।
গেষ্ট্র’প’ৰেছিছত আক্রান্ত এই মহিলা সম্প্রতি ঘৰতে আৱদ্ধ হৈ থাকিব লগা হৈছে, কিয়নাে তেওঁ দিনটোত সঘনে বমি কৰি থাকে।
ইংলণ্ডৰ ব’ল্টন নিবাসী ৩৯ বছৰীয়া লীন বিলিয়ন। এগৰাকী গেষ্ট্র’পৰেছিছ আক্রান্ত ৰােগী। এই ৰােগত আক্রান্ত হােৱাৰ ফলত লীনে খাদ্য গ্রহণ কৰাৰ পাছত শৰীৰে প্ৰাকৃতিক পদ্ধতিৰে সেই খাদ্য হজম কৰিব নােৱাৰে আৰু শৌচকর্মৰ জৰিয়তে অনাবশ্যকীয় খাদ্য বাহিৰ হৈ নাযায়।
সেয়েহে পেটত জমা হৈ থকা হজম নােহােহাৱা পচা খাদ্য লীনৰ শৰীৰৰ পৰা বমি হৈ ওলাই যায়। ২০০৮ ত লীনৰ শৰীৰত এই ৰােগটো প্রথম ধৰা পৰিছিল৷
লীনে হঠাতে বাৰে বাৰে বমি কৰিবলৈ ধৰিছিল আৰু তেওঁ চিকিৎসকৰ কাষ চাপিছিল। চিকিৎসকে পৰীক্ষা কৰি লীনৰ শৰীৰত উক্ত বর্ষতে এটা গেষ্ট্ৰিক পেচমেকাৰ সংস্থাপন কৰিছিল।
এই পেচমেকাৰ সংস্থাপনৰ পাছত লীনৰ বমি আৰু উকালি অহা প্ৰৱণতা কিছু নিয়ন্ত্রিত হৈছিল। দুবছৰ পূর্বে ২০১৯ত এই পেচমেকাৰটোৰ বেটাৰী শেষ হৈছিল। লগে লগে লীন পুনৰ পূৰ্বৰ সমস্যাত আক্রান্ত হ’ল আৰু সঘনে বমি হ’বলৈ ধৰিলে।
বহু সন্ধান চলায়াে চিকিৎসকে পেচমেকাৰৰ নতুন বেটাৰী লাভ কৰিব নােৱাৰিলে। চিকিৎসকে লীনক জনােৱা অনুসৰি, তেওঁৰ শৰীৰত নতুন গেষ্ট্ৰিক পেচমেকাৰ লগাব লাগিব আৰু ইয়াৰ বাবদ কমেও ১০ লাখ টকা ব্যয় হ’ব।
লীনে প্রকাশ কৰা মতে, তেওঁ সৰুৰে পৰা ৰুগীয়া আছিল। অৱশ্যে সৰুতে এই ৰােগটো ধৰা পৰা নাছিল। লীনে যিকোনাে গােটা বা জুলীয়া খাদ্য গ্রহণ কৰিলে সেয়া বমি হৈ ওলাই যায়।
লীনে কয় যে তেওঁ এদিনত সর্বাধিক ৭০ বাৰলৈকে বমি কৰিছিল। বমিৰ এই ৰােগৰ ফলতে তেওঁ চাকৰি ত্যাগ কৰিবলৈকো বাধ্য হৈছিল। এতিয়া লীনে নিজকে ঘৰতে আৱদ্ধ কৰি ৰাখিছে।
লীনে আনকি বন্ধু আৰু আত্মীয়কো সাক্ষাৎ কৰিব নােৱাৰা হৈছে। লীনে সম্প্রতি এটা নতুন পেচমেকাৰৰ বাবে ধন সংগ্ৰহৰ চেষ্টা অব্যাহত ৰাখিছে।
