অ’মিক্ৰ’নৰ সংক্ৰমণ প্ৰতিৰোধ কৰিবলৈ বংগ আৰু কেন্দ্ৰীয় শাসিত অঞ্চলসমূহক অধিক সতৰ্ক হ’বলৈ ক’লে কেন্দ্ৰই ।যাৰ প্ৰথম পদক্ষেপ হিচাপে, তৎক্ষণাৎ ক’ভিড পৰীক্ষা বৃদ্ধি কৰিবলৈ কোৱা হৈছে। কেন্দ্ৰই শেহতীয়াকৈ কৰ’না সংক্ৰমণ ধৰা পৰা অঞ্চলবোৰত নিৰীক্ষণ বৃদ্ধি কৰিবলৈও নিৰ্দেশ দিছে।
দেওবাৰে কেন্দ্ৰীয় স্বাস্থ্য সচিব ৰাজেশ ভূষণে এই সন্দৰ্ভত ৰাজ্য আৰু কেন্দ্ৰীয় শাসিত অঞ্চলৰ মুখ্য সচিবসকললৈ চিঠি লিখে। পত্ৰখনত বিদেশৰ পৰা এই দেশৰ বিমানবন্দৰত অৱতৰণ কৰা যাত্ৰীসকলৰ ওপৰত গুৰুত্ব দিয়া হৈছে।
কেন্দ্ৰই কয় ,কোন কোন দেশৰ পৰা বিপদ আহিব পাৰে তাৰ এখন তালিকা ইতিমধ্যে প্ৰস্তুত কৰা হৈছে । ৰাজ্য প্ৰশাসনে সেই তালিকাখন মনত ৰাখি কঠোৰ ব্যৱস্থা লোৱা উচিত। আনকি বিদেশৰ পৰা অহা বিমানযাত্ৰীসকল ভাৰতত অৱতৰণ কৰাৰ আগতে আৰু কোন কোন দেশত গৈছে,তাৰো নথিপত্ৰ পৰীক্ষা কৰিবলৈ প্ৰশাসনক কোৱা হৈছে।
কৰ’না ভাইৰাছৰ নতুন প্ৰকাৰৰ বিষয়ে, বিশ্ব স্বাস্থ্য সংস্থাৰ (হু) জনাইছে,এই নতুন ৰূপ দ্ৰুততাৰে সংক্ৰমণ বিয়পাব পাৰে। কেৱল সেয়াই নহয়, অ’মিক্ৰ’নৰ শৰীৰৰ ৰোগ প্ৰতিৰোধ প্ৰণালী দুৰ্বল কৰাৰ ক্ষমতাও অধিক ।
অ’মিক্ৰ’ন ইতিমধ্যে , হংকং, দক্ষিণ আফ্ৰিকা, ব্ৰিটেইন, অষ্ট্ৰেলিয়া, ইটালী, জাৰ্মানী, ইজৰাইল আৰু নেডাৰলেণ্ডত পোৱা গৈছে।
কেন্দ্ৰই এই দেশসমূহক ‘বিপদজনক দেশ’ হিচাপে চিনাক্ত কৰিছে। দেওবাৰে মুখ্য সচিবসকললৈ জাৰি কৰা এক কেন্দ্ৰীয় নিৰ্দেশনাত কেন্দ্ৰীয় স্বাস্থ্য সচিব ৰাজেশে কয় যে দেশত কৰ’না সংক্ৰমণৰ বিষয়টো নিৰীক্ষণ কৰা সকলে এতিয়াৰ পৰা সতৰ্ক হোৱা উচিত। নিৰ্দেশত তেওঁলোকক বিপদাশংকা থকা দেশবোৰৰ পৰা অহা যাত্ৰীসকলৰ বিৰুদ্ধে উপযুক্ত ব্যৱস্থা ল’বলৈও কৈছিল।
কেন্দ্ৰই কৰ’নাৰ পৰিৱৰ্তনশীল ৰূপৰ নিৰন্তৰ নিৰীক্ষণ কৰিবলৈ এটা কনচৰ্টিয়াম স্থাপন কৰিছিল। নাম হৈছে ‘ইণ্ডিয়ান চাৰ্চ-ক’ভ-2 জিনোমিক কনচৰ্টিয়াম’, চমুকৈ ‘ইনচাকগ’। কেন্দ্ৰই ৰাজ্যসমূহক কৰ’না পৰীক্ষাৰ নমুনাৰ সংগ্ৰহ বৃদ্ধি কৰিবলৈ কৈছে যাতে ইনচাকগে কৰ’নাৰ ৰূপৰ পৰিৱৰ্তনৰ ওপৰত তীক্ষ্ণ নজৰ ৰাখিব পাৰে।
কেন্দ্ৰই ৰাজ্যসমূহক সংক্ৰমণৰ ইতিবাচকতাৰ হাৰ অৰ্থাৎ মুঠ পৰীক্ষাৰ ক্ষেত্ৰত সংক্ৰমণৰ হাৰ পাঁচ শতাংশৰ তলত ৰখাৰ লক্ষ্য নিৰ্ধাৰণ কৰিবলৈও কৈছে।
স্বাস্থ্য আন্তঃগাঁথনিও বৃদ্ধি কৰিবলৈ কোৱা হৈছে। কেন্দ্ৰই কয় যে ৰাজ্যসমূহে প্ৰয়োজন হ’লে আন্তঃগাঁথনি অধিক উন্নত কৰাৰ বাবে কেন্দ্ৰই প্ৰদান কৰা পুঁজিৰ সৰ্বশ্ৰেষ্ঠ ব্যৱহাৰ কৰা উচিত।
