২০১৯ ৰ অন্তিমভাগৰ পৰা কৰ’নাৰ আতংকত কঁপি আছে সমগ্র বিশ্ব। প্রথম আৰু দ্বিতীয় লহৰত কৰ’নাৰ গ্ৰাসত পৰিল অসংখ্য লােক ।
আক্রান্ত হােৱাৰ উপৰি অগণন ক’ভিড ৰােগীয়ে প্রাণ হেৰুৱায়। পৃথিৱীৰ সকলাে উন্নত দেশেই কৰ’নাৰ আঘাতত কাহিল হৈ পৰিছে।
বিগত দুটা বছৰত সলনি হৈ পৰিছে পৃথিৱীৰ স্বাস্থ্যসেৱাৰ পৰিস্থিতি, প্রভাৱ পৰিছে বিশ্ব অর্থনীতিতো। অথচ এইবােৰৰ পৰা একেবাৰে দূৰত আছিল দক্ষিণ প্রশান্ত মহাসাগৰৰ বুকুত থকা এখন প্রায় অপৰিচিত ক্ষুদ্র দ্বীপ ৰাষ্ট্র।
ইমানদিনে কুক আইলেণ্ড নামৰ এই ক্ষুদ্র দেশখনে কৰ’নাৰ বাবে দুর্ভেদ্য প্রাচীৰ থিয় কৰি ৰাখিছিল। যদিও শেষ ৰক্ষা নহ’ল। প্রায় দুবছৰৰ মূৰত কুক আইলেণ্ডৰ সেই দুর্ভেদ্য প্রাচীৰ লংঘন কৰি দ্বীপ ৰাষ্ট্ৰখনত প্ৰৱেশ কৰিলে কৰ’না ভাইৰাছে।
কুক আইলেণ্ডৰ প্রধানমন্ত্রী মার্ক ব্রাউনে দেওবাৰে সদৰী কৰে যে যােৱা বৃহস্পতিবাৰে নিউজিলেণ্ডৰ পৰা অহা এটি ১০ বছৰীয়া শিশুৰ শৰীৰত সংক্রমণ ধৰা পৰিছে।
বিমানকোঠতে কৰা পৰীক্ষাত সংক্রমণ ধৰা পৰাত শিশুটিক লগে লগে নিভৃতবাসলৈ প্রেৰণ কৰা হয়। উল্লেখ্য যে ক’ভিডে অতিমাৰীৰ ৰূপ ল’বলৈ আৰম্ভ কৰাৰ সময়তে তাৎক্ষণিক তৎপৰতাৰে নিউজিলেণ্ডৰ প্রতিবেশী দেশখনে পদক্ষেপ গ্রহণ কৰিছিল।
পর্যটকৰ আগমন নিষিদ্ধ কৰি দিয়া হয়। বহিঃবিশ্বৰ পৰা দ্বীপ ৰাষ্ট্ৰখন বিচ্ছিন্ন হৈ পৰিছিল। অন্যান্য পদক্ষেপে গ্রহণ কৰাত ইমানদিনে কৰ’নাই দেশখনত আক্রমণ কৰিব পৰা নাছিল।
বছৰৰ আৰম্ভণিৰ পৰা ক’ভিডৰ প্রকোপ হ্রাস পাবলৈ ধৰাত দেশখনৰ সীমান্ত খুলি দিয়া হৈছিল। যােৱা ১৪ জানুৱাৰীৰ পৰা কেৱল নিউজিলেণ্ডৰ পৰা যােৱা যাত্রীসকলক কুক আইলেণ্ডত প্রৱেশৰ অনুমতি দিয়া হৈছিল।
কোনাে নিভৃতবাসৰাে নিয়ম নাছিল। শেহতীয়াকৈ বিভিন্ন দেশৰ পৰ্যটকৰ বাবে দুৱাৰ খুলি দিয়াৰ সুযােগতে দক্ষিণ প্রশান্ত মহাসাগৰৰ মাজৰ প্রায় অকলশৰীয়া দ্বীপটোতাে প্রৱেশ কৰিলে কৰ’না ভাইৰাছে।
এই সন্দৰ্ভত কুক আইলেণ্ডৰ প্রধানমন্ত্রী ব্রাউনে কয়, ‘যি দিনাৰ পৰাই সীমান্ত খােলাৰ সিদ্ধান্ত লােৱা হৈছিল, সেই দিনাৰ পৰাই সংক্রমণ ৰােধৰ বাবে সম্পূর্ণ ব্যৱস্থা কৰা হৈছিল। সীমান্ততে যাতে সংক্রমিত লােকসকলক আবদ্ধ কৰিব পাৰি,তাৰ ব্যৱস্থাও কৰা হৈছিল। ‘অথচ তাৰ পাছতাে সংক্রমণ ৰােধ কৰিব নােৱাৰিলে কুক আইলেণ্ডে।
মাত্র ১৭ হেজাৰ জনসংখ্যাবিশিষ্ট দেশখনত এই পর্যন্ত বিশ্বৰ ভিতৰতে সর্বাধিক টিকাকৰণ হৈছে। বহু উন্নত দেশৰ তুলনাত কুক আইলেণ্ডৰ ৯৬ শতাংশ নাগৰিকেই ইতিমধ্যে প্রতিষেধকৰ দুটা পালি গ্ৰহণ কৰিছে।
দুবছৰ সংক্রমণ ৰােধ কৰিলেও অৱশেষত কৰ’নাৰ প্রথম সংক্রমণ ধৰা পৰাৰ পাছত এতিয়া দেশখনৰ প্রশাসন চিন্তিত হৈ পৰিছে।