অসমত গৰুৰ চোৰাং সৰবৰাহ ৰোধৰ বাবে ৰাজ্য চৰকাৰে প্ৰণয়ন কৰা অসম পশুধন সংৰক্ষণ আইনখন কেবিনেট বৈঠকে সংশোধনৰ সিদ্ধান্ত ল’লেও আন্তঃৰাজ্যিক সীমাত সংলগ্ন হৈ থকা জিলাকেইখনত এনে নিষেধাজ্ঞা বাহাল থাকিব । বিশেষকৈ বাংলাদেশ সীমান্তৰ লগত যুক্ত হৈ থকা চাৰিখন জিলাত কোনো কাৰণতে আইনখন শিথিল কৰিবলৈ চৰকাৰ আগ্ৰহী নহয় ।
যোৱা জুলাইত বলৱৎ হোৱাৰ পূৰ্বৰ পৰাই আইনখনক লৈ ৰাজ্যত বিতৰ্কৰ সূত্ৰপাত হয় । কাৰণ আইনখনত থকা নিষেধাজ্ঞাৰ বাবে গৰুৰ আন্তঃজিলা সৰবৰাহ বন্ধ হৈ পৰে । ইয়াৰ ফলত গো-পালক, খেতিয়ক আৰু বৈধ ব্যৱসায়ীসকল যথেষ্ট ক্ষতিগ্ৰস্ত হয় । সেয়েহে আইনখন বাতিল অথবা সংশোধনৰ দাবী উত্থাপন হয় । শুকুৰবাৰে মুখ্যমন্ত্ৰী ড° হিমন্ত বিশ্ব শৰ্মাৰ অধ্যক্ষতাত অনুষ্ঠিত ৰাজ্যিক কেবিনেটৰ বৈঠকে আইনখনত সংশোধনৰ সিদ্ধান্ত গ্ৰহণ কৰে যদিও আন্তৰ্জাতিক সীমাত সংলগ্ন জিলাকেইখনৰ ক্ষেত্ৰত শিথিলতা এৰাই চলাৰ সিদ্ধান্ত লয় ।
অসম বাংলাদেশ আৰু ভূটানৰ লগত আন্তৰ্জাতিক সীমা আছে আৰু এই সীমাত থকা জিলাৰ সংখ্যা আঠখন । অৱশ্যে চৰকাৰে সংশোধনৰ সিদ্ধান্ত গ্ৰহণৰ ক্ষেত্ৰত বাংলাদেশ সীমান্তত থকা জিলা চৰকাৰখনকহে মূল লক্ষ্য কৰি লৈছে । উক্ত জিলাকেইখন হ’ল ক্ৰমে ধুবুৰী, দক্ষিণ শালমাৰা-মানকাচাৰ, কাছাৰ আৰু কৰিমগঞ্জ । আনহাতে, ভূটানৰ লগত সংলগ্ন হৈ থকা জিলা চাৰিখন হ’ল ক্ৰমে কোকৰাঝাৰ, চিৰাং, বাগ্সা আৰু ওদালগুৰি ।
লক্ষ্যণীয় যে চৰকাৰে ‘কঠোৰ’ আইন বলৱৎ কৰা স্বত্ত্বেও ৰাজ্যত গৰুৰ চোৰাং সৰবৰাহ ৰোধ হোৱা নাই । অসমৰ কথা বাদেই বহিঃৰাজ্যৰ পৰা অনা চোৰাং গৰুও অসম সীমান্তৰে বাংলাদেশ সৰবৰাহ অব্যাহত আছে । ইয়াৰ ফলত চলিত আইনখনৰ কাৰ্যকৰিতাক লৈও প্ৰশ্ন উত্থাপিত নোহোৱাকৈ থকা নাই । ফলত আইনখনত সংশোধনৰ শ আনিবলৈ চৰকাৰ বাধ্য হয় বুলি দিছপুৰৰ সূত্ৰত প্ৰকাশ ।
