চিৰাঙৰ ডাংতল খাগ্ৰাবাৰীত হিন্দুস্তান পেট্ৰলিয়াম কৰ্পোৰেচন লিমিটেডৰ প্ৰস্তাৱিত প্ৰেট্ৰলিয়াম ইন্ধন মজুত ভাণ্ডাৰৰ ক্ষেত্ৰ পৰিদৰ্শন হিন্দুস্তান পেট্ৰলিয়াম কৰ্পোৰেচন লিমিটেডৰ কাৰ্য্যবাহী সঞ্চালক শ্ৰীধৰ গৌড় আৰু বিটিআৰ প্ৰধান প্ৰমোদ বড়োৰ ।
প্ৰায় দুশ কোটি টকা ব্যয় সাপেক্ষে নিৰ্মাণ হ’ব হিন্দুস্তান পেট্ৰলিয়াম কৰ্পোৰেচন লিমিটেড চমুকৈ এইচপিচিএল-ৰ এই ইন্ধন মজুত ভাণ্ডাৰৰ বাবে জিলাখনৰ ডাংতল আৰু বাসুগাঁও চহৰৰ সমীপৰ খাগ্ৰাবাৰী গাঁৱত ২৬০ বিঘা ভূমি অধিগ্ৰহণ ঠাইত আজি এইচপিচিএল-ৰ কাৰ্য্যবাহী সঞ্চালক শ্ৰীধৰ গৌড় আৰু বিটিআৰ প্ৰধান প্ৰমোদ বড়োয়ে ভূমিৰ স্বত্বাধিকাৰীসকলৰ স’তে মত বিনিময় কৰে ।
আজিৰ এই অনুষ্ঠানত চিদলীৰ বিধায়ক জয়ন্ত বসুমতাৰী, ইউপিপিএল দলৰ কাৰ্য্যকৰী সভাপতি ৰৌণগৌৰা নাৰ্জাৰী, বিটিআৰৰ কাৰ্য্যবাহী সদস্য উইলচন হাচদা, পাৰিষদ মাধৱ ছেত্ৰী, চিৰাং জিলা আৰক্ষী অধীক্ষক প্ৰাঞ্জিত বৰাসহ এইচপিচিএল-ৰ বিষয়া-কৰ্মচাৰী উপস্থিত থাকে ।
এইচপিচিএল-ৰ এই ইন্ধন মজুত ভাণ্ডাৰৰ স্থাপন হোৱাৰ পাছত এই অঞ্চলত প্ৰত্যক্ষ-পৰোক্ষভাৱে বহু নিবনুৱাৰ কৰ্ম সংস্থান লাভ কৰিব বুলি বিটিআৰ প্ৰধান প্ৰমোদ বড়ো আৰু এইচপিচিএল-ৰ কাৰ্য্যবাহী সঞ্চালক শ্ৰীধৰ গৌড়ে মন্তব্য কৰে ।
এইচপিচিএল-ৰ দৰে এটা কোম্পানীৰ প্ৰকল্প বিটিআৰ অঞ্চলত স্থাপন কৰাৰ সিদ্ধান্ত গ্ৰহণ কৰাৰ বাবে অসমৰ মুখ্যমন্ত্ৰী ড° হিমন্ত বিশ্ব শৰ্মা আৰু দেশৰ পেট্ৰলিয়াম বিভাগৰ ৰাজ্যিক মন্ত্ৰী ৰামেশ্বৰ তেলীক ধন্যবাদ জ্ঞাপন কৰে প্ৰমোদ বড়োই ।
বিটিআৰ এলেকা এটা সময়ত অশান্ত অঞ্চল আছিল যাৰ কাৰণে এই অঞ্চলত এনেধৰণৰ অনুষ্ঠান অহা নাছিল এতিয়া সময় সলনি হৈছে , শান্তিৰ পৰিৱেশ ঘূৰি আহিছে যাৰ কাৰণে আমি এনেধৰণৰ প্ৰকল্প পাবলৈ সক্ষম হৈছো ।
এনেধৰণৰ প্ৰকল্প স্থাপন হ’লে কেৱল নিবনুৱা সমস্যা সমাধান নহয় লগে লগে এলেকাৰ পৰিৱেশ উন্নত হয় বুলি মন্তব্য কৰে বিটিআৰ প্ৰধান প্ৰমোদ বড়োয়ে ।
প্ৰমোদ বড়োয়ে বিটিআৰত পৌৰসভাৰ নিৰ্ব্বাচন আৰু কোকৰাঝাৰৰ শ্ৰীৰামপুৰৰ ব্ৰইলাৰ ছিণ্ডিকেট সন্দৰ্ভতো মন্তব্য কৰে ।
আজিৰ এই অনুষ্ঠানতে বিটিচি প্ৰধান বড়োয়ে এইচপিচিএল কৰ্তৃপক্ষই যোগান ধৰা কেক কাটি ৪৭ সংখ্যক জন্মদিন পালন কৰে ।