ৰাছিয়া আৰু ইউক্রেইনৰ মাজত যুদ্ধ অব্যাহত থকাৰ সময়তে ৰাছিয়াৰ বিৰুদ্ধে পশ্চিম বিশ্বৰ কে’বাখনো দেশে কঠোৰ নিষেধাজ্ঞা আৰোপ কৰিছে । দেওবাৰে মেকড’নাল্ডছে ৰাছিয়াত থকা প্ৰতিষ্ঠানটোৰ ৮৫০ খন ৰেস্তোৰাঁ বন্ধ কৰিলে । আমেৰিকাৰ বিখ্যাত ৰেস্তোৰাঁ প্ৰতিষ্ঠানটোৱে অলপতে যুদ্ধৰ পৰিপ্ৰেক্ষিতত ৰাছিয়াত ব্যৱসায় বন্ধ কৰাৰ সিদ্ধান্ত লৈছিল ।
মেকড’নাল্ডছৰ এইসমূহ প্ৰতিষ্ঠান বন্ধ হোৱাৰ পূৰ্বে দেওবাৰে অভূতপূৰ্ব সংখ্যক গ্ৰাহকে ৰেস্তোৰাঁসমূহত ভিৰ কৰিছিল । মেকড’নাল্ডছৰ বিখ্যাত বাৰ্গাৰসহ আন্যান্য খাদ্যৰ জুতি ল’বলৈ এইসকল গ্ৰাহকে প্ৰতিষ্ঠানটোৰ বিপণীৰ বাহিৰত দীঘল শাৰী পাতি থিয় দিছিল ।
উল্লেখ্য যে মেকড’নাল্ডছৰ লগতে ষ্টাৰ বাক্স, কোকাক’লা, পেপ্ছি, কেএফচি, বাৰ্গাৰ কিং আদি আন্তৰ্জাতিক ৰেস্তোৰাঁ প্ৰতিষ্ঠানেও ৰাছিয়াত ব্যৱসায় বন্ধ কৰিলে । ষ্টাৰ বাক্সে ১৩০, বাৰ্গাৰ কিঙে ৮০০, কে এফ চিয়ে ৭০ আৰু পিজ্জা হাটে ৫০খন ৰেস্তোৰাঁ ইতিমধ্যে ৰাছিয়াৰ বিভিন্ন অঞ্চলত বন্ধ কৰিলে ।
মেকড’নাল্ডছে ঘোষণা কৰা অনুসৰি তেওঁলোকে ৰাছিয়াত সম্প্ৰতি সকলোবোৰ ৰেস্তোৰাঁ বন্ধ কৰিলে যদিও এইসমূহ বিপণীত কৰ্মৰত ৬২,০০০জন কৰ্মচাৰীক বেতন প্ৰদান কৰি যাব । স্মৰ্তব্য যে ১৯৯০ৰ ৩১ জানুৱাৰীত ৰাছিয়াত মেকড’নাল্ডছে প্ৰথমখন ৰেস্তোৰাঁ মুকলি কৰিছিল ।