অসম আৰু মেঘালয় সীমান্তৰ ছটা বিবাদমান অঞ্চলৰ সমস্যা সমাধানৰ চুক্তি স্বাক্ষৰিত হোৱাৰ পাছত ভাৰতীয় জৰীপ বিভাগে দুই ৰাজ্যৰ নতুন সীমান্ত নিৰ্ধাৰণ প্ৰক্ৰিয়া আৰম্ভ কৰিছে । যোৱা ২৯ মাৰ্চত কেন্দ্ৰীয় গৃহমন্ত্ৰী অমিত শ্বাহৰ উপস্থিতিত দুয়োখন ৰাজ্যৰ মুখ্যমন্ত্ৰীদ্বয়ে উক্ত চুক্তিত স্বাক্ষৰ কৰে । তাৰ পাছতে জৰীপ বিভাগৰ কে’বাটাও দলে চুক্তি সম্পাদিত হোৱা পিলিংৰাট, ৰাতাচেৰা, বক্লাপাৰা, গিজাং হাহিম আৰু তাৰাবাৰীত উপস্থিত হৈ জৰীপ প্ৰক্ৰিয়া আৰম্ভ কৰে ।
এই ক্ষেত্ৰত অসম চৰকাৰে জৰীপ বিভাগৰ দলক সহযোগিতা আগবঢ়াইছে । চুক্তি অনুসৰি ৩৬.৭৯ বৰ্গ কিলোমিটাৰ অঞ্চলৰ বাবে এই চুক্তি স্বাক্ষৰ কৰা হয় । ইয়াৰে অসমৰ ভাগত পৰিছে ১৮.৪৬ বৰ্গ কিলোমিটাৰ আৰু মেঘালয়ৰ ভাগত পৰিছে ১৮.৩৩ বৰ্গ কিলোমিটাৰ ।
দুয়োখন ৰাজ্যৰ দুয়োপাৰৰ পৰা চলা সীমা পুনৰ নিৰ্ধাৰণৰ কাম সম্পন্ন হোৱাৰ পাছতে সংসদত এই সম্পৰ্কীয় বিধেয়ক চৰকাৰে উত্থাপন কৰিব । অৱশ্যে পুনৰ সীমা নিৰ্ধাৰণ কৰি খুঁটা পোতালৈ কিছুসময়ৰ প্ৰয়োজন হ’ব বুলি বিষয়টোৰ লগত জড়িত অসম চৰকাৰৰ বিষয়াৰ সূত্ৰই জনায় । তদুপৰি চৰকাৰে চুক্তি কৰিলেও নতুন সীমা নিৰ্ধাৰণ ব্যৱস্থাটো স্পৰ্শকাতৰ হৈ থকা বুলি সূত্ৰটোৱে উল্লেখ কৰে । কিয়নো সীমা নিৰ্ধাৰণ কাগজে-কলমে কৰাৰ পাছত জৰীপ বিভাগৰ দলে ক্ষেত্ৰভিত্তিক হিচাপ-নিকাচেৰে খুঁটা পোতাৰ কাম আৰম্ভ কৰিছে । অথচ নতুন সীমাক লৈ অসম আৰু মেঘালয়ৰ দুয়োখন ৰাজ্যৰ সীমান্তৰ বহু লোকৰ মাজত ক্ষোভ বিয়পি আছে ।
এতিয়াও বহু লোকে নাজানে তেওঁলোক বাস কৰা অঞ্চলটো কোনখন ৰাজ্যৰ অন্তৰ্ভুক্ত হ’ব । সূত্ৰটোৰ মতে গোটেই বিষয়টোত স্থানীয় লোকৰ মাজত আবেগে অগ্ৰাধিকাৰ পায় আহিছে । সেয়েহে জৰীপ বিভাগৰ দলে যথেষ্ট স্পৰ্শকাতৰ পৰিৱেশৰ মাজেৰে কাম আগবঢ়াবলগীয়া হৈছে ।
ইপিনে, ৰাজ্য দুখনৰ মাজত থকা আন দুটা স্থানৰ বিবাদ মীমাংসাৰ প্ৰক্ৰিয়া অহা জুলাইত আৰম্ভ হোৱাৰ সম্ভাৱনা আছে । তাৰ বাবে অসম চৰকাৰে প্ৰস্তুতি আৰম্ভ কৰিছে । এই ছটা স্থান যথেষ্ট স্পৰ্শকাতৰ । এই স্থানকেইটা হ’ল লাম্পি, বৰদুৱাৰ, নংৱাহ, মাতামূৰ, দেচদেম’ৰে আৰু খাণ্ডুলি ।
