উপত্যকাত কাশ্মীৰি পণ্ডিত হত্যাক লৈ কেন্দ্রৰ বিজেপি চৰকাৰক তীব্র আক্রমণ কৰিলে নেছনেল কনফাৰেন্সৰ নেতা তথা জম্মু-কাশ্মীৰৰ প্রাক্তন মুখ্যমন্ত্রী ফাৰুক আবদুল্লাই । শনিবাৰে তেওঁ কয়, কাশ্মীৰি পণ্ডিতসকলৰ ওপৰত প্রতিটো আক্রমণ প্ৰকৃততে ‘উপত্যকাৰ আত্মাকেই’ আক্রমণ । লগতে উপত্যকাত স্বাভাৱিক অবস্থা ঘূৰি আহিছে বুলি কেন্দ্রৰ যি দাবী, পৰিস্থিতি তাৰ বিপৰীত বুলিও তেওঁ দাবী কৰে ।
নেছনেল কনফাৰেন্সৰ মুখপাত্রই জনাইছে, শ্রীনগৰৰ সাংসদ ফাৰুকে শনিবাৰে দলৰ সংখ্যালঘু শাখাৰ নেতা অমিত কউল-ৰ নেতৃত্বত কাশ্মীৰি পণ্ডিতসকলৰ এটা প্রতিনিধি দলৰ স’তে আলোচনা কৰে । সেই সময়ত ফাৰুকে কয়, ‘‘আমাৰ পণ্ডিত ভাতৃসকলৰ ওপৰত প্রতিটো আক্রমণ প্ৰকৃততে উপত্যকাৰ আত্মাৰ ওপৰতেই আক্রমণ । মই দীর্ঘদিন ধৰি দেখি আহিছো, কাশ্মীৰি মুছলমান আৰু কাশ্মীৰি পণ্ডিতসকলে একজোঁট হৈ বাস কৰে । বর্তমান চৰকাৰ কেৱল প্রচাৰ আৰু দেখুৱাত ব্যস্ত । বাস্তৱ হ’ল, (কাশ্মীৰি পণ্ডিতসকল) নিৰাপদে আৰু স্থায়ীভাৱে উপত্যকাত উভতি অহাৰ বিষয়ত কোনো ব্যৱস্থাই লোৱা হোৱা নাই ।’’
মুখপাত্রজনে জনায়, ভ্ৰমণকাৰী দলটোৱে ফাৰুকৰ স’তে উপত্যকাত বসবাসকাৰী পণ্ডিতসকলৰ বিষয়ত উদ্বেগসহ নানা বিষয় লৈ আলোচনা কৰিছে । প্রতিনিধি দলৰ স’তে ফাৰুকৰ আলোচনাৰ পাছত তেওঁলোকৰ স’তে আলোচনা কৰি এই মুখপাত্রজনে কয়, ‘‘যিসকলে পুনর্বাসনৰ প্রথম পদক্ষেপ হিচাপে চৰকাৰী চাকৰি গ্রহণ কৰিছিল, এতিয়া তেওঁলোকে সময় মতে বেতন, ভাতা, কর্মস্থলত উন্নতি, সুস্থ জীৱন পাবৰ বাবে যুঁজ দিবলগীয়া হৈছে ।’’
মুখপাত্রজনে আৰু কয়, ‘‘কাশ্মীৰি পণ্ডিতসকলৰ প্রতিনিধি দলটোৱে জনাইছে, বর্তমান চৰকাৰে ৰাজনৈতিক প্রচাৰ চলালেও প্ৰকৃততে তেওঁলোকক কাশ্মীৰত নিৰাপদ আৰু সুৰক্ষিত কৰিবলৈ একো কৰা নাই ।’’
ফাৰুকে প্রতিনিধি দলটোৰ সদস্যসকলক আশ্বাস দিছে যে তিনি বিষয়সমূহ লৈ উপত্যকাৰ উপৰাজ্যপাল আৰু কেন্দ্রৰ স’তে আলোচনা কৰিব । ফাৰুকে জনাইছে, কেৱল কাশ্মীৰি পণ্ডিতসকলেই নহয়, উপত্যকাত বসবাসকাৰী শিখ আৰু অন্য সংখ্যালঘুসকলো উপত্যকাৰ সংস্কৃতি আৰু জীৱনযাপনৰ অংগ ।
কিছুদিন আগতে সন্ত্ৰাসবাদীৰ গুলিত উপত্যকাৰ এজন চৰকাৰী কর্মচাৰী কাশ্মীৰি পণ্ডিত আৰু এজন আৰক্ষীৰ মৃত্যুৰ পৰিপ্রেক্ষিতত ফাৰুক আবদুল্লাৰ স’তে পণ্ডিতসকলৰ প্রতিনিধি দলৰ এই আলোচনা বিশেষ তাৎপর্যপূর্ণ ।
যোৱা বৃহস্পতিবাৰে সন্ত্ৰাসবাদীসকলে চাদোৰায় তহছিল কাৰ্যালয়ত আক্ৰমণ কৰে আৰু ৰাহুল ভট্ট নামে এজন কাশ্মীৰি পণ্ডিতক গুলি কৰি হত্যা কৰে । ইয়াৰ এদিন পাছতেই আৰক্ষীৰ কনিষ্টবল ৰিয়াজ আহমেদ ঠোকাৰক গুলি কৰা হয় গুডোৰা জিলাত । পাছত তেওঁৰ মৃত্যু হয় ।
