তিনি বছৰ আগতে বন্দে ভাৰত এক্সপ্ৰেছ ৰেল নিৰ্মাণ কৰাৰ সময়ত প্ৰতিটো ৰেকৰ ব্যয় আছিল প্ৰায় ১০৬ কোটি টকা। এতিয়া, ৰে’লৱেই জনাইছে যে উন্নত প্ৰযুক্তিৰ ৰে’লখন (১৬টা ডবা) নিৰ্মাণৰ ব্যয় কম বেছি পৰিমাণে ১১৫ কোটি টকা হ’ব পাৰে।
ইয়াৰ অৰ্থ হৈছে যে নতুন বন্দে ভাৰত এক্সপ্ৰেছ নিৰ্মাণৰ বাবে প্ৰতিটো ৰেকৰ ব্যয় প্ৰায় ন কোটি টকা বৃদ্ধি পাইছে। অৱশ্যে, ৰে’ল বিষয়াসকলৰ মতে, যদি ৰেকৰ উৎপাদন বৃহৎ সংখ্যাত আৰম্ভ হয় তেন্তে ব্যয় অলপ হ্ৰাস হ’ব পাৰে।
অহা আগষ্টত পৰীক্ষা নিৰীক্ষাৰ বাবে এযোৰ বন্দে ভাৰত এক্সপ্ৰেছ ট্ৰেইনৰ অনুশীলন আৰম্ভ হ’ব । যদি অনুশীলন সন্তোষজনক হয়, পৰৱৰ্তী পৰ্যায়ত অধিক সংখ্যক ৰেলৰ উৎপাদন ত্বৰান্বিত কৰা হ’ব। এতিয়া নতুন দিল্লী আৰু বাৰাণসী আৰু কাটৰাৰ মাজত দুখন বন্দে ভাৰত এক্সপ্ৰেছ ৰেল চলি আছে।
অনুশীলনৰ বাবে নিৰ্মাণ কৰা দুটা ৰেকৰ চকা যুদ্ধবিধ্বস্ত ইউক্ৰেইনৰ পৰা ৰোমানিয়ালৈ স্থলপথেৰে পৰিবহন কৰা হৈছিল। তাৰ পৰা, চকাটো বিমানেৰে ভাৰতলৈ অনা হৈছিল। ৰেল বিষয়াসকলে দাবী কৰিছে যে নতুন ৰেকবোৰ প্ৰযুক্তিগতভাৱে আগৰ তুলনাত ভাল।
দুৰ্ঘটনা পৰিহাৰ কৰিবলৈ, ইয়াত ‘ৰেলৰ সংঘৰ্ষ পৰিহাৰ প্ৰণালী’ বা সংঘৰ্ষ পৰিহাৰ কৰা ৰক্ষা কৱচ আছে। ঠিক বিমানৰ দৰে। যদি কৰবাত সংকেত উপেক্ষা কৰাৰ পৰিস্থিতি হয়, ৰেলখন সেই প্ৰণালীত নিজে ৰ’ব। ইয়াৰ উপৰিও, ৰেলখনত এক কেন্দ্ৰীভূত কোচ নিৰীক্ষণ প্ৰণালী থাকিব।
স্মাৰ্ট কোচ হোৱাৰ ফলস্বৰূপে, যদি এটা অঙ্গ বিফল হয়, নিৰ্দিষ্ট চেন্সৰে ইয়াক লগে লগে অৱগত কৰিব। ইয়াৰ বাহিৰেও, চালকৰ কেবিনৰ পৰা কোচৰ তাপমাত্ৰা স্বয়ংক্ৰিয়ভাৱে নিয়ন্ত্ৰণ কৰিব পাৰি। যদি জুই জ্বলাৰ দৰে পৰিস্থিতি সৃষ্টি হয়, ইয়াক আগতীয়াকৈ চিনাক্ত কৰা হ’ব।
বৈদ্যুতিক কেবল বা বতানুকূল নিয়ন্ত্ৰিত সঁজুলিৰ পৰা জুই বিয়পা প্ৰতিহত কৰাৰ ব্যৱস্থাও থাকিব। প্ৰতিটো কোঠাত স্বয়ংক্ৰিয় দুৱাৰ, ভেষ্টিবিউলত গ্লাছ স্লাইডিং দুৱাৰৰ উপৰিও, এইবাৰ জৰুৰীকালীন লাইট থাকিব ।
জৰুৰী কালীন অৱস্থাত, যাত্ৰীসকলে কম্পাৰ্টমেণ্টত থকা বিশেষ বুটামটো হেঁচি চালকৰ স’তে পোনপটীয়াকৈ কথা পাতিব পাৰিব । ইয়াৰ উপৰিও, প্ৰতিটো কোঠাত দুখনৰ পৰিৱৰ্তে চাৰিখন জৰুৰী কালীন দুৱাৰ থাকিব।
ৰে’লৱে সূত্ৰৰ মতে, যাত্ৰীসকলৰ অভিজ্ঞতাৰ পৰা জানিব পৰাৰ পাছত, পূৰ্বৰ আসনবোৰৰ পৰিৱৰ্তে বন্দে ভাৰতত বিমানৰ দৰে আসন স্থাপন কৰা হৈছে। ৰে’লৰ ভিৰ হ্ৰাস কৰাৰ উপৰিও, যাত্ৰীসকলৰ লাগেজ ৰখাৰ ব্যৱস্থাও আগৰ তুলনাত উন্নত কৰা হৈছে।
নতুন ৰেকৰ অনুশীলন সম্পূৰ্ণ হোৱাৰ পাছত, ৰে’লৱেই চেন্নাই, ৰায়বৰেলী আৰু কাপুৰথালাৰ কাৰখানাবোৰত মাহে ১০ টা বন্দে ভাৰত ৰেক প্ৰস্তুত কৰিব বিচাৰে। প্ৰথম পৰ্যায়ত ৭৫ খন ৰে’লৰ উৎপাদন সম্পূৰ্ণ হোৱাৰ পাছত, আন ৪০০ ৰেকৰ উৎপাদন পাছত আৰম্ভ কৰা হ’ব।
