প্রায় চাৰি দিন ধৰি আবদ্ধ হৈ থকাৰ পাছত কুঁৱাৰ টৰা উদ্ধাৰ কৰা হ’ল ১১ বছৰীয়া ৰাহুল সাহুক । শুকুৰবাৰে চত্তীছগঢ়ৰ পিহৰিদ গাঁৱত ৮০ ফুট গভীৰ এটা কুঁৱাত পৰি যায় ল’ৰাজন । ইয়াৰ পাছৰ পৰাই কিশোৰটিক উদ্ধাৰ কৰিবৰ বাবে উঠি পৰি লাগে উদ্ধাৰকর্মীসকল । প্ৰায় ১১০ ঘণ্টা অভিযান চলাই কিশোৰটিক মঙলবাৰে নিশা উদ্ধাৰ কৰা হয় ।
স্থানীয় সূত্রে খবৰ, শুকুৰবাৰে খেলি থাকোতে মালখাৰোদা ব্লকৰ পিহৰিদ গাঁৱত ঘৰৰ পাছফালৰ এটা কুঁৱাত পৰি যায় ৰাহুল । কিশোৰটিক জীয়াই ৰাখিবলৈ শীঘ্রে অক্সিজেন সৰবৰাহৰ বাবে এটা পাইপলাইন তৈয়াৰ কৰি কুঁৱাৰ গভীৰলৈকে দিয়া হৈছিল ।
ৰাষ্ট্ৰীয় দুৰ্যোগ প্ৰশমন বিভাগ (এনডিআৰএফ), সেনাবাহিনী আৰু স্থানীয় আৰক্ষীসহ প্রায় পাঁচশজনে শুকুৰবাৰে সন্ধিয়াৰ পৰা উদ্ধাৰ কাৰ্য আৰম্ভ কৰে । মঙলবাৰে সন্ধিয়া কিশোৰটিক উদ্ধাৰ কৰা হয় ।
চত্তীছগঢ়ৰ মুখ্যমন্ত্রী ভূপেশ বাঘেলে টুইট কৰি জনায়, ‘সকলোৰে প্রার্থনা আৰু উদ্ধাৰকর্মীসকলৰ নিৰলস প্রচেষ্টাত ৰাহুলক নিৰাপদে কুঁৱাৰ পৰা ওলিয়াই অনা হৈছে । তেওঁ যেন শীঘ্ৰে সম্পূর্ণভাৱে সুস্থ হৈ উঠে সেয়াই কামনা কৰিলো ।’