কংগ্রেছ সভাপতি নির্বাচনত প্রতিদ্বন্দ্বিতা কৰাৰ পৰা পিছুৱাই নাহে বুলি শুকুৰবাৰে জনায় প্রাক্তন কেন্দ্রীয় মন্ত্রী তথা তিৰুঅনন্তপুৰমৰ কংগ্রেছ সাংসদ শশী থাৰুৰে । সম্ভাব্য প্রতিদ্বন্দ্বী মল্লিকার্জুন খড়্গেক উদ্দেশ্যি শুভেচ্ছা জনাই তেওঁ কয়, ‘‘মল্লিকার্জুনজি কংগ্রেছৰ ভীষ্ম পিতামহ । তেওঁৰ মনোনয়ন দাখিলক আদৰণি জনাইছো । দলৰ স্বার্থতেই একাধিক প্রার্থীৰ প্রয়োজন । মই কংগ্রেছ সভাপতি নির্বাচনৰ পৰা পিছুৱাই নাহো, কাৰণ মই কর্মীসকলক নিৰুৎসাহিত নকৰো ।’’
কংগ্রেছ সভাপতি নির্বাচনত প্রতিদ্বন্দ্বিতাৰ বাবে শুকুৰবাৰে মনোনয়ন দাখিল কৰে খড়্গেয়ে । তেওঁ গান্ধী পৰিয়াল অনুমোদিত প্রার্থী হ’ব বুলি দলৰ এটা সূত্রে জানিব পৰা গৈছে । আনহাতে, ৰাজস্থানৰ মুখ্যমন্ত্রী অশোক গহলৌতৰ পাছত কংগ্রেছৰ সভাপতি নির্বাচনত প্রতিদ্বন্দ্বিতা নকৰাৰ কথা শুকুৰবাৰে ঘোষণা কৰে মধ্যপ্রদেশৰ প্রাক্তন মুখ্যমন্ত্রী দিগ্বিজয় সিঙে । মনোনয়নপত্র দাখিল কৰাৰ শেষ দিনত দিগ্বিজয়ে জনায়, তেওঁ খড়্গেকেই সমর্থন কৰিব ।
এনে পৰিস্থিতিত অহা ১৭ অক্টোবৰত কংগ্রেছৰ সভাপতি নির্বাচনত গান্ধী পৰিয়ালৰ ঘনিষ্ঠ খড়্গেৰ স’তে ‘জি-২৩’ গোষ্ঠীৰ সদস্য শশী থাৰুৰক প্রতিদ্বন্দ্বিতা কৰা দেখা যাব পাৰে বুলি ধাৰণা কৰা হৈছে । যদিও দলৰ এটা সূত্রই জনাইছে, আঠ অক্টোবৰ পর্যন্ত মনোনয়ন প্রত্যাহাৰৰ সময় আছে । তাৰ পূৰ্বে গান্ধী পৰিয়ালৰ পছন্দৰ প্রার্থীৰ বাহিৰে অন্যান্যসকলে (অর্থাৎ থাৰুৰ) মনোনয়ন প্ৰত্যাহাৰ কৰিব পাৰে ।
কংগ্রেছত ‘বিক্ষুব্ধ গোষ্ঠী’ হিচাপে পৰিচিত জি-২৩ গোষ্ঠীৰ নেতা মণীশ তিৱাৰি, ভূপিন্দৰ সিং হুডা, পৃথ্বীৰাজ চহ্বাণে বৃহস্পতিবাৰে দিল্লীত আনন্দ শর্মাৰ বাসগৃহত বৈঠকত মিলিত হয় । শৰ্মাই সেই বৈঠকৰ পাছত দিল্লীৰ জোধপুৰ হাউছত গহলৌতক লগ কৰিবলৈ যায় । সূত্রৰ খবৰ, জি-২৩-ল এজন নেতাই নির্বাচনত প্ৰতিদ্বন্দিতা কৰিব পাৰে । তেওঁ থাৰুৰ হয় নে নহয়, সেয়াও শুকুৰবাৰে স্পষ্ট হোৱাৰ সম্ভাৱনা ।
প্রসংগত, ২০২০-ৰ আগষ্টত কংগ্রেছৰ ভিতৰতে ‘সুনেতৃত্বৰ অভাৱ আৰু সাংগঠনিক সমস্যা’ দাঙি ধৰি অন্তর্বর্তী সভানেত্রী ছোনিয়াক পত্ৰ প্ৰেৰণ কৰিছিল ২৩ জন নবীন আৰু প্রবীণ নেতাই । দাবী উত্থাপন কৰিছিল, দলত স্থায়ী সভাপতি নির্বাচনৰ ।
লগতে, ‘হাইকমাণ্ডৰ’ কর্মপদ্ধতিকলৈও প্রশ্ন উত্থাপন কৰিছিল তেওঁলোকে । দলৰ ভিতৰত সেই ‘বিদ্রোহী ২৩’ (যিসকল গ্রুপ-২৩ বা জি-২৩ নামে পৰিচিত)–ৰ ভিতৰতেই আছে থাৰুৰ । গুলাম নবি আজাদ, কপিল ছিব্বল, জিতিন প্রসাদৰ দৰে জি-২৩-ৰ নেতাসকলৰ কিছুসংখ্যকে ইতিমধ্যে কংগ্রেছ ত্যাগ কৰিছে ।
