Andhra Pradesh :
বিদ্যালয়ত মধ্যাহ্ন ভোজন খায় অসুস্থ ২৫ জন শিক্ষাৰ্থী । পেট বিষ আৰু বমি হোৱাত তেওঁলোকক চিকিৎসালয়ত ভৰ্তি কৰোৱা হয় । ঘটনাটো অন্ধ্ৰ প্ৰদেশৰ কাদিৰী চহৰৰ এখন প্ৰাথমিক বিদ্যালয়ত সংঘটিত হৈছে ।
প্ৰাপ্ত তথ্য অনুসৰি, জিলাখনৰ সংশ্লিষ্ট বিষয়াসকলে মধ্যাহ্ন ভোজনৰ আহাৰত পৰিৱৰ্তন কৰাৰ পৰিকল্পনা কৰিছিল যাতে শিক্ষাৰ্থীসকলে পৰ্যাপ্ত আৰু সঠিক খাদ্য লাভ কৰে।
২১ নৱেম্বৰৰ পৰা, নতুন আহাৰত চাউল, মাহজাতীয় শস্য, পাচলি, কণীৰ আঞ্জা, চাটনি যোগ দিয়া হয় নতুন খাদ্যতালিকাত। এই তালিকা অনুসৰি বিদ্যালয়ত খাদ্য প্ৰস্তুত কৰা হয় ।
সূত্ৰ অনুসৰি, বিদ্যালয়খনত মুঠ শিক্ষাৰ্থীৰ সংখ্যা হৈছে ১৪৮ গৰাকী। কিন্তু শুক্ৰবাৰে, ১২১ গৰাকী শিক্ষাৰ্থী উপস্থিত আছিল। খাদ্য গ্ৰহণ কৰাৰ পাছত, কিছুমান শিক্ষাৰ্থীয়ে অধ্যক্ষৰ ওচৰত অভিযোগ কৰিছিল যে তেওঁলোকক নিম্ন মানদণ্ডৰ খাদ্য দিয়া হৈছিল।
অধ্যক্ষই লগে লগে পুনৰ ৰান্ধিবলৈ আদেশ দিলে। কিন্তু তেতিয়ালৈকে, ২৫ জন শিক্ষাৰ্থীয়ে খাদ্য খাই । ইয়াৰ পাছত , তেওঁলোকৰ পেটৰ বিষ আৰম্ভ হয় আৰু লগতে বমি কৰিবলৈ আৰম্ভ কৰে ।
প্ৰথমতে, আঠজন শিক্ষাৰ্থীক চিকিৎসালয়লৈ লৈ যোৱা হয় । পাছত, বাকী ১৭ জন ছাত্ৰ ছাত্ৰীকো চিকিৎসালয়ত ভৰ্তি কৰোৱা হয় । চিকিৎসালয়ৰ মতে, কাৰো অৱস্থা সংকটজনক নহয়।
বেয়া মানদণ্ডৰ খাদ্য খোৱাৰ পাছত তেওঁলোক অসুস্থ হৈ পৰিছে। এজন জিলা বিষয়াই জনাই যে ঘটনাটোৰ বাবে কোন দায়ী সেইটো বিচাৰি উলিওৱাৰ বাবে তদন্ত কৰা হ’ব।