SC Holds Abrogation On Article 370:
সকলো উৎকণ্ঠা অন্ত পেলাই জম্মু-কাশ্মীৰৰ সৈতে জড়িত সংবিধানৰ ৩৭০ অনুচ্ছেদ সন্দৰ্ভত আজি দেশৰ সৰ্বোচ্চ ন্যায়ালয়ে অনুচ্ছেদ ৩৭০ বাতিলৰ সপক্ষে ৰায় প্ৰদান কৰে।
উচ্চতম ন্যায়ালয়ে ৩৭০ অনুচ্ছেদ বাতিল বৈধ আৰু সাংবিধানিক বুলি অভিহিত কৰি উল্লেখ কৰে যে ৰাষ্ট্ৰপতিয়ে ৩৭০ অনুচ্ছেদ বাতিল কৰিব পাৰে ৷ আনহাতে ৩৭০ প্ৰত্যাহাৰ ৰাষ্ট্ৰপতিৰ উদ্দেশ্য প্রণোদিত নাছিল ৷ বৰং অনুচ্ছেদ ৩৭০ সাময়িক ব্যৱস্থা আছিল ৷
একেদৰে ন্যায়ালয়ৰ বিচাৰপীঠে আৰু উল্লেখ কৰে যে জম্মু-কাশ্মীৰৰ সুকীয়া সার্বভৌমত্ব নাছিল জম্মু-কাশ্মীৰৰ সংবিধান ভাৰতৰ সংবিধানৰ অধীন ৷
জম্মু-কাশ্মীৰৰ দ্বিখণ্ডিতকৰণক বৈধত ঘোষণা কৰে ৷ ন্যায়ালয়ে ৰায়টোত কয় যে,জম্মু-কাশ্মীৰত ২০২৪ৰ ছেপ্টেম্বৰৰ ভিতৰত নিৰ্বাচন অনুষ্ঠিত কৰিব লাগিব ৷
উল্লেখ্য যে,সোমবাৰে মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত ন্যায়াধীশ এছ কে কৌল, ন্যায়াধীশ সঞ্জীৱ খান্না, ন্যায়াধীশ বি আৰ গাৱৈ আৰু ন্যায়াধীশ সূৰ্য কান্ত পাঁচজনীয়া বিচাৰপীঠে সংবিধানৰ ৩৭০ অনুচ্ছেদ বাতিলৰ সিদ্ধান্ত বাহাল ৰখাৰ ৰায় ঘোষণা কৰে।
দীঘলীয়া শুনানিৰ অন্তত সোমবাৰে প্ৰদান কৰা চুড়ান্ত ৰায়টোত মুখ্য ন্যায়াধীশ ডি ৱাই চন্দ্ৰচূড়ে কয় যে, জম্মু-কাশ্মীৰৰ পৰা ৩৭০ অনুচ্ছেদ আঁতৰোৱাৰ কেন্দ্ৰীয় চৰকাৰে লোৱা সিদ্ধান্ত সম্পূৰ্ণ বৈধ আছিল ৷ ইয়াৰ লগে লগে ৩৭০ অনুচ্ছেদৰ সপক্ষে আবেদনকাৰীয়ে উপস্থাপন কৰা যুক্তিক নাকচ কৰা হয় ৰায়টোত ৷
স্মতব্য যে, ২০১৯ চনৰ ৫ আগষ্টত কেন্দ্ৰীয় চৰকাৰে জম্মু-কাশ্মীৰৰ বাবে থকা সংবিধানৰ ৩৭০ নং অনুচ্ছেদ নিষ্ক্ৰিয় কৰিছিল ৷ তাৰ পাছতে কেন্দ্ৰীয় চৰকাৰৰ এই পদক্ষেপৰ বিৰুদ্ধে গৰজি উঠে জম্মু-কাশ্মীৰৰ বহু কেইটা দল- সংগঠন ৷ পৰৱৰ্তী সময়ত কেন্দ্ৰীয় চৰকাৰৰ লোৱা সিদ্ধান্তৰ বিৰুদ্ধে সৰ্বোচ্চ ন্যায়ালয়ত দ্বাৰস্থ হয় সংশ্লিষ্ট সংগঠনবোৰে ৷ এই সম্পৰ্কত ন্যায়ালয়ে দীঘলীয়া শুনানী চলাই ৫ ছেপ্তেম্বৰত শুনানি সম্পন্ন কৰে ৷
আনহাতে জম্মু-কাশ্মীৰৰ কোনো আভ্যন্তৰীণ সাৰ্বভৌমত্ব নাছিল। মুখ্য ন্যায়াধীশ গৰাকীয়ে কয় যে দৈনন্দিন কাম-কাজৰ সৈতে জড়িত ৰাষ্ট্ৰপতিৰ ক্ষমতাৰ ন্যায়িক পৰ্যালোচনা হ’ব নোৱাৰে। সংবিধানৰ ৩৫৭ নং অনুচ্ছেদৰ অধীনত ৰাজ্য বিধানসভাৰ কোনো আইন বাতিল বা সংশোধনৰ ক্ষমতা সংবিধানৰ ৪২ সংখ্যক সংশোধনী আইনৰ প্ৰেক্ষাপটত পঢ়িব লাগিব।
মুখ্য ন্যায়াধীশ ডি.ৱাই. চন্দ্ৰচুড়ে ২০২৪ চনৰ ৩০ ছেপ্টেম্বৰৰ পূৰ্বে জম্মু-কাশ্মীৰত বিধানসভা নিৰ্বাচন নিশ্চিত কৰাৰ বাবে নিৰ্বাচন আয়োগক নিৰ্দেশ দিছে। ৰাষ্ট্ৰপতিৰ শাসনকালত কেন্দ্ৰই ৰাজ্য চৰকাৰৰ ঠাইত সিদ্ধান্ত ল’ব পাৰে। ৰাজ্য বিধানসভাৰ ঠাইত সংসদে কাম কৰিব পাৰে।
মনকৰিবলগীয়া যে,জম্মু-কাশ্মীৰ সন্দৰ্ভত সংবিধানৰ ৩৭০ নং অনুচ্ছেদ সপক্ষে অৱস্থান কৰি পুনৰ বাহাল ৰখাৰ দাবী জনোৱা আবেদনকাৰী সকল আছিল অধিবক্তা এম এল শৰ্মা, শ্বোৱেইব কুৰেশ্বী, মুজাফ্ফাৰ ইকবাল খান, ৰিফাত আৰা বুট, ছাকিৰ শ্বাব্বিৰ, ৰাষ্ট্ৰীয় সন্মিলনৰ সাংসদ মহম্মদ আকবৰ ল’ন, হাছনাইন মাছুদী, চি পি আই নেতা মহম্মদ ইউছুফ তাৰিগামি, ইন্দৰজিৎ টিক্কু, সাংবাদিক সতীশ জেকব, প্ৰাক্তন এয়াৰ ভাইচ মাৰ্শ্বাল কপিল কাক, প্ৰাক্তন আই এ এছ হিন্দল হায়দৰ ত্যবজী, অৱসৰপ্ৰাপ্ত মেজৰ জেনেৰেল অশোক মেহতা, অমিতাভ পাণ্ডে, গোপাল পিল্লাইৰ লগতে পিপলছ ইউনিয়ন ফৰ চিভিল লিবাৰ্টিজ, জম্মু কাশ্মীৰ পিপলছ কনফাৰেন্স সহ বহু কেইটা সংগঠন ৷
