11th Special Annual Barpujia Conference Of Assam Sahitya Sabha:
অসম সাহিত্য সভাৰ একাদশ বিশেষ বাৰপূজীয়া অধিৱেশনৰ আজি দ্বিতীয় দিন ৷ পুৱা পতাকা উত্তোলনেৰে দ্বিতীয় দিনৰ কাৰ্যসূচী শুভৰাম্ভ কৰে সভাপতি ডঃ সূর্যকান্ত হাজৰিকা ৷
প্রাণ পালে পাঁচোৰজাৰ সমন্বয় ক্ষেত্ৰই ৷ উদুলি-মুদুলি পাঁচোৰজা সমন্বয় ক্ষেত্রত চিৰ চেনেহী মোৰ ভাষা জননী গীতেৰ মাজেৰে অধিৱেশনৰ মূল পতাকাৰ লগতে ১১৭খন পতাকা উত্তোলন কৰে সভাৰ বিষয়ববীয়া সকলে ৷
উল্লেখ্য যে,মৰিগাঁও জিলাৰ বাৰপূজীয়া পাঁচোৰজা সমন্বয় ক্ষেত্ৰত চাৰি দিনীয়াকৈ বর্ণাঢ্য কাৰ্য্যসূচীৰে বুধবাৰৰ পৰা আৰম্ভ হোৱা অধিবেশনৰ আজি দ্বিতীয়টো দিন ।
আনহাতে আজি বিশিষ্ট সাহিত্যিক বলাইৰাম সেনাপতি সোঁৱৰণী সাহিত্য সম্মিলন, স্মৃতিগ্রন্থ আৰু অন্যান্য গ্রন্থ উন্মোচনী অনুষ্ঠান অনুষ্ঠিত হ’ব। অসম সাহিত্য সভাৰ প্ৰাক্তন সভাপতি, বিশিষ্ট সাহিত্যিক- সাংবাদিক কনকসেন ডেকাই উদ্বোধন কৰিবলগীয়া এই সভাত গৱেষক ড°নৰেন কলিতাই স্মৃতিগ্রন্থ উন্মোচন কৰিব।
বিয়লি ভাগত শংকৰদের বঁটাপ্রাপক ইলাৰাম দাস সোঁৱৰণী জাতীয় বৌদ্ধিক সম্মিলন অনুষ্ঠিত হ’ব। মহাপুৰুষ শ্রীমন্ত শংকৰদেৱ বিশ্ববিদ্যালয়ৰ উপাচার্য ড° মৃদুল হাজৰিকাৰ সঞ্চালনাত অনুষ্ঠিত হ’বলগীয়া এই বৌদ্ধিক সম্মিলনত ৰাজ্যৰ বহুকেইগৰাকী চিন্তাবিদ, শিক্ষাবিদ আৰু বুদ্ধিজীৱীয়ে অংশগ্রহণ কৰিব।
\সন্ধিয়া পাঁচ বজাত সাহিত্যিক কিনাৰাম নাথ সোঁৱৰণী প্রতিনিধি সভা আৰু সন্ধিয়া ছয় বজাত মুক্তিযোদ্ধা নন্দীৰাম ডেকা, মোহনসিং ডেকা আৰু লালসিং সোঁৱৰণী মঞ্চত লোক-সংস্কৃতিবিদ ড° নবীন চন্দ্র শর্মা সোঁৱৰণী সাংস্কৃতিক সম্মিলন অনুষ্ঠিত হ’ব।
অসমীয়া থলুৱা গীত-মাত বিষয়ক এই সম্মিলনখন বিশিষ্ট সংগীত শিল্পী ড° ৰাণু বৈশ্যই উদ্বোধন কৰিব। অসমৰ জনপ্রিয় একাংশ শিল্পীৰ সংগীতানুষ্ঠানেৰে নিশা সামৰণি পৰিব বাৰপুজীয়া অধিৱেশনৰ দ্বিতীয়টো দিনৰ কাৰ্যসূচী।
তিনি ফেব্ৰুৱাৰীত সামৰণি পৰিবলগীয়া এই একাদশ বিশেষ বার্ষিক অধিবেশনৰ গ্রন্থমেলাৰ বাকৰিতো প্রতিদিনে ভিন ভিন কার্যসূচী ৰূপায়িত অঞ্চল। সাহিত্যসেৱীক আদৰিবলৈ প্রস্তুত হৈ পৰিছে প্রতিঘৰ গৃহস্থী। ইফালে, সাহিত্য সভাৰ এই বিশেষ বার্ষিক অধিবেশনখনক লৈ এতিয়া উদুলি-মুদুলি হৈ পৰিছে সমগ্র বাৰপূজীয়া ৷
উল্লেখ্য যে,সাহিত্যৰর্থীলৈ শ্রদ্ধার্ঘ্য অর্পণেৰে বুধবাৰৰ পৰা চাৰিদিনীয়া কাৰ্যসূচীৰে আৰম্ভ হয় অসম সাহিত্য সভাৰ একাদশ বিশেষ বার্ষিক বাৰপূজীয়া অধিবেশন। নগাঁও-মৰিগাঁও জিলাৰ সীমান্তৱর্তী, মৰিগাঁও জিলাৰ ইতিহাস প্রসিদ্ধ অঞ্চল বাৰপুজীয়াৰ পাঁচোৰজাৰ সমন্বয় ক্ষেত্ৰত বাৰপুজীয়া শতদল শাখা সাহিত্য সভাৰ আতিথ্যত অনুষ্ঠিত এই অধিবেশনৰ প্ৰথমটো দিনৰ কাৰ্যসূচী অনুসৰি ৰসৰাজ লক্ষ্মীনাথ বেজবৰুৱাৰ জন্মস্থান আঁহতগুৰিত থকা সাহিত্যৰথীগৰাকীৰ প্রতিমূৰ্তিত শ্রদ্ধাঞ্জলি জ্ঞাপনেৰে সূচনা হয়।
পূৱা ন বজাত অনুষ্ঠিত এই অনুষ্ঠানত অসম সাহিত্য সভাৰ সভাপতি ড’ সূর্যকান্ত হাজৰিকা, প্রধান সম্পাদক ড’ উপেন্দ্রজিৎ শর্মা আদিকে ধৰি কেন্দ্রীয় আৰু আদৰণি সমিতিৰ বিষয়াবর্গ উপস্থিত থাকে। ইয়াৰ পাছতে পাঁচোৰজাৰ সমন্বয় ক্ষেত্ৰ আৰু মূল তোৰণ উদ্বোধন কৰে অসম সাহিত্য সভাৰ প্রাক্তন উপ-সভাপতি মৃণালিনী দেবীয়ে।
উদ্বোধনী ভাষণ প্রসংগত দেবীয়ে নৱপ্ৰজন্মক অসম সাহিত্য সভামুখী হ’বলৈ আহ্বান জনায়। লগতে বর্ষীয়ান লেখিকাগৰাকীয়ে সম্প্রতি অসম সাহিত্য সভাই সম্মুখীন হোৱা সংকটৰ বিষয়েও দোহাৰে। এই অনুষ্ঠানৰ পাছতেই একাদিক্রমে পাঁচোৰজাৰ সোঁৱৰণত বন্তি প্রজ্বলন, শ্রীমন্ত শংকৰদেৱৰ প্ৰতিচ্ছবিত বন্তি প্রজ্বলন, অসম সাহিত্য সভাৰ প্ৰতিষ্ঠাপক সভাপতি পদ্মনাথ গোহাঞি বৰুৱাৰ প্ৰতিচ্ছবিত মাল্যার্পণ আৰু বস্তি প্রজ্বলন কার্যসূচী অনুষ্ঠিত হয়।
বন্তি প্রজ্বলনৰ কাৰ্যসূচীৰ পাছতে নাট্যমঞ্চ উদ্বোধন, গ্রন্থমেলা আৰু প্রদর্শনীৰ তোৰণ উদ্বোধন, মূল মণ্ডপ উদ্বোধন, গ্রন্থমেলা আৰু প্ৰদৰ্শনীৰ দ্বাৰ উন্মোচন আৰু বাণিজ্যমেলা উদ্বোধন কৰা হয়। ইয়াৰ লগতে দুপৰীয়াৰ ভাগত মে-ডাম-মে-ফী উদযাপন কৰাৰ লগতে অসম সাহিত্য সভাৰ চতুৰ্থ পূর্ণাংগ কার্যনির্বাহক সভা অনুষ্ঠিত হয়।
মৰিগাঁও জিলাৰ আয়ুক্ত দেবাশীষ শর্মাই উদ্বোধন কৰা এই সভাত আদৰণি ভাষণ ‘প্রদান কৰে আদৰণি সমিতিৰ সভাপতি হেমন্ত কুমাৰ দেউৰীয়ে। সন্ধিয়া প্রতিনিধি শিৱিৰ মুকলি কৰে বিশিষ্ট লেখক হৰেন গগৈয়ে। ইয়াৰ পাছতেই প্রতিনিধি শিবিৰত নাম পঞ্জীয়ন আৰম্ভ হয়। অসম সাহিত্য সভাৰ একাদশ বিশেষ বার্ষিক অধিবেশনত সহস্রাধিক প্রতিনিধিয়ে অংশ লোৱাৰ আশা প্রকাশ কৰা হৈছে। নির্ধাৰিত সময়তকৈ কিছু পলমকৈ আৰম্ভ হয় আজিৰ প্ৰথমটো দিনৰ কাৰ্যসূচী।
মনকৰিবলগীয়া যে,বুধবাৰৰ পৰা অনুষ্ঠিত হোৱা অসম সাহিত্য সভাৰ একাদশ বিশেষ বার্ষিক অধিবেশনৰ সন্ধিয়া অনুষ্ঠিত চতুর্থ পূর্ণাংগ কার্যনির্বাহক সভাত এক উত্তপ্ত পৰিস্থিতিৰ সৃষ্টি হয়।
অধিবেশনত যোগদান কৰিবলৈ ৰাজ্যৰ বিভিন্ন প্ৰান্তৰৰ পৰা অহা সাহিত্যিক প্রতিনিধিসকলৰ থকা-শোৱাৰ ব্যৱস্থা আদৰণি সমিতিয়ে সঠিকভাৱে কৰিব নোৱৰাৰ অভিযোগ তুলি কার্যনির্বাহক সমিতিৰ একাংশ সদস্য প্রতিবাদ মুখৰ হৈ পৰে।