India’s defense production is worth Rs 1.27 lakh Crore:
ভাৰতত ২০২৩-২৪ বিত্তীয় বর্ষত অভিলেখ সংখ্যক প্ৰতিৰক্ষা সা-সামগ্ৰীৰ উৎপাদন হ’ল। উক্ত বিত্তীয় বর্ষত ১.২৭ লাখ কোটি টকা মূল্যৰ অস্ত্র-শস্ত্ৰ আৰু অন্যান্য প্ৰতিৰক্ষা সঁজুলিৰ দেশত নিৰ্মাণ কৰা হৈছিল। প্ৰতিৰক্ষা মন্ত্ৰী ৰাজনাথ সিঙে আজি এই তথ্য সদৰী কৰি কয় যে বর্তমানলৈকে ভাৰতত যোৱা বিত্তীয় বর্ষত সর্বাধিক পৰিমাণৰ প্ৰতিৰক্ষা সা-সামগ্রী উৎপাদন কৰা হৈছিল।
প্ৰতিৰক্ষা মন্ত্ৰীয়ে লগতে কয় যে মেক ইন ইন্ডিয়া অভিযানৰ জৰিয়তে এই অভিলেখ সংখ্যক প্ৰতিৰক্ষা সা- সঁজুলি দেশত তৈয়াৰ কৰা হৈছে। চৰকাৰে ভাৰতক এক শীর্ষ আন্তর্জাতিক প্ৰতিৰক্ষা সামগ্ৰী নির্মাণ কেন্দ্র হিচাপে গঢ়িবলৈ প্রচেষ্টা অব্যাহত ৰাখিছে বুলি সিঙে জানিবলৈ দিয়ে। সিঙে সামাজিক মাধ্যমত এক প’ষ্টত এইদৰে লিখিলে, ‘প্রধানমন্ত্রী নৰেন্দ্ৰ মোদীৰ নেতৃত্বত মেক ইন ইণ্ডিয়া কাৰ্যসূচীৰে প্ৰতি বছৰে এক নতুন মাইলৰ খুঁটি অতিক্ৰম কৰিছে প্ৰতিৰক্ষা উৎপাদন সর্বাধিক গতিত বৃদ্ধি পালে। ২০২৩-২৪ বৰ্ষত ভাৰতত ১,২৬,৮৮৭ কোটি টকা মূল্যৰ প্ৰতিৰক্ষা সামগ্ৰীৰ উৎপাদন হৈছিল। পূৰ্বৰ বিত্তীয় বৰ্ষৰ তুলনাত ২০২৩-২৪ বিত্তীয় বৰ্ষত দেশৰ প্ৰতিৰক্ষা উৎপাদন ১৬.৮ শতাংশ বৃদ্ধি পালে।’ প্ৰতিৰক্ষা মন্ত্ৰীয়ে এই সফলতাৰ বাবে দেশৰ ৰাজহুৱা খণ্ডৰ প্ৰতিৰক্ষা কোম্পানী আৰু প্ৰতিৰক্ষা সামগ্রী উৎপাদন কৰা ব্যক্তিগত খণ্ডৰ কোম্পানীসমূহক অভিনন্দন জনালে।
কেন্দ্রীয় মন্ত্রীজনে লগতে কয় যে প্ৰতিৰক্ষাৰ ক্ষেত্ৰত ভাৰতে আত্মনিৰ্ভৰতা অৰ্জন কৰিবলৈ প্রচেষ্টা অব্যাহত ৰাখিছে আৰু ইতিমধ্যে বিগত বিত্তীয় বর্ষত এই ক্ষেত্রত দেশে যথেষ্ট অগ্রগতি লাভ কৰিলে। ২০২৩- ২৪ বৰ্ষত দেশত যি পৰিমাণৰ প্ৰতিৰক্ষা উৎপাদন হৈছিল, ইয়াৰে ৭৯.২ শতাংশ প্রতিৰক্ষা উৎপাদন চৰকাৰী আৰু অন্যান্য ৰাজহুৱা খণ্ডৰ কোম্পানীৰ দ্বাৰা কৰা হৈছিল বুলিও মন্ত্রীজনে সদৰী কৰে।
কেৱল ২০ শতাংশ প্ৰতিৰক্ষা সামগ্ৰীৰ উৎপাদনহে ব্যক্তিগত খণ্ডৰ জৰিয়তে কৰা হৈছিল। ২০২৩-২৪ বিত্তীয় বৰ্ষত ভাৰতৰ প্ৰতিৰক্ষা ৰপ্তানিৰ পৰিমাণো বৃদ্ধি পাইছিল। উক্ত বিত্তীয় বর্ষত দেশে ২১,০৮৩ কোটি টকা মূল্যৰ প্ৰতিক্ষা সামগ্রী বিদেশলৈ ৰপ্তানি কৰিছিল। ২০২২-২৩ বিত্তীয় বৰ্ষৰ তুলনাত দেশৰ প্ৰতিৰক্ষা ৰপ্তানিৰ পৰিমাণ যোৱা বিত্তীয় বর্ষত ৩২ শতাংশ বৃদ্ধি পাইছিল ।
