Ganeshguri Ganesh Mandir:
বহিঃৰাজ্যৰ পৰা অহা আধা ডজন পুৰোহিতৰ মন্ত্রোচ্চাৰণ-হোম যজ্ঞৰে আজি মাজনিশা পর্যন্ত মুখৰিত হৈ ৰ’ল মহানগৰীৰ মাজমজিয়াৰ অসম বিধানসভা সচিবালয়ৰ সম্মুখত থকা গণেশ মন্দিৰ। সাধাৰণতে সন্ধিয়া আঠ বজাত গণেশ মন্দিৰৰ মূল দুৱাৰ বন্ধ কৰি দিয়াৰ পাছত মন্দিৰত নিস্তব্ধতা বিৰাজমান হয় যদিও আজি মাজনিশালৈ যাগ-যজ্ঞৰে বিঘিনি নাশক ধূম্রাবৰ্ণৰ পূজা-অর্চনা চলে।
মন্দিৰ কমিটীৰ সূত্ৰই জনোৱা মতে, আজি সন্ধিয়াৰে পৰা গণেশ মন্দিৰত বিশেষ পূজা আয়োজন কৰা লোকজন হ’ল ৰাজ্যৰ এজন বহুচৰ্চিত ঠিকাদাৰ। মন্দিৰৰ এজন পুৰোহিতে জনোৱা মতে, অভীষ্ট সিদ্ধিৰ বাবে আজি এনেদৰে দাক্ষিণাত্যৰ পৰা বিশেষভাৱে অনা পুৰোহিতৰ দল এটাৰ হতুৱাই সমাপন কৰা হৈছে এই বিশেষ পূজাভাগ। পুৰোহিতৰ মতে, পূজাৰ আয়োজনৰ বাবে আজি সন্ধিয়াৰে পৰা সৰ্বসাধাৰণ ভক্তসকলৰ ক্ষেত্রত কেতবোৰ সীমাবদ্ধতা আৰোপ কৰা হয়। বিশেষকৈ গণেশ দেৱতাৰ মূৰ্তিৰ সোঁফালে থকা ভগৱান শিৱৰ মণ্ডপৰ সম্মুখতে স্থাপন কৰা যজ্ঞ কুণ্ডৰ বাবে মন্দিৰটোৰ ভিতৰভাগৰ একমাত্র গণেশ মূৰ্তিৰ সন্মুখভাগহে সাধাৰণ দর্শনার্থীৰ বাবে সীমিত কৰি ৰখা হয়।
