Migration Abroad in Search of Employment:
২২ লক্ষাধিক শিক্ষিত পঞ্জীভুক্ত নিবনুৱাবে ভাৰাক্রান্ত অসমৰ পৰা শেহতীয়াকৈ বহিঃৰাজ্যলৈ অভাবনীয় গতিত কর্মসংস্থান বিচাৰি প্রব্রজন কৰিবলৈ লৈছে নিবনুৱা যুৱক-যুৱতীয়ে। কেৱল এটা বছৰতে ৰাজ্যখনৰ পৰা বহিঃৰাজ্যলৈ প্রব্রজন ঘটা ২৩.৭ শতাংশ লোকৰ ভিতৰত ৫৪.৭ শতাংশই ঢাপলি মেলিছে কর্মসংস্থানৰ সন্ধানত।
যি সময়ত ৰাজ্য চৰকাৰে ব্যাপক হাৰত চৰকাৰী চাকৰিত নিযুক্তি আৰম্ভ কৰা বুলি প্রচাৰ চলাইছে, সেই সময়তে চৰকাৰী চাকৰিৰ পৰিসংখ্যা যে এপাচি শাকত এটা জালুকৰ লেখীয়াহে সেই কথা উন্মোচিত কৰিছে প্রতিদিনে কর্মসংস্থান বিচাৰি দেশৰ ভিন্ন ৰাজ্যলৈ প্রব্রজন কৰা শ শ যুৱক-যুৱতীয়ে।
ৰাষ্ট্ৰসংঘৰ আন্তঃৰাষ্ট্ৰীয় শ্রমিক সংস্থা’ৰ ‘ইনষ্টিটিউট ফৰ হিউমেন ডেভলপমেন্ট’ৰ উদ্যোগত শেহতীয়াকৈ প্রকাশ পোৱা ‘ভাৰতৰ নিয়োগ প্রতিবেদন ২০২৪, যুৱ সংস্থাপন, শিক্ষা আৰু দক্ষতা’ শীর্ষক প্রতিবেদনত প্রকাশ পোৱা তথ্য মতে, নিবনুৱাৰ পৰিসংখ্যাৰে দেশৰ আন ৰাজ্যসমূহৰ দৰে অসমৰ স্থিতিও অতি শোচনীয়। অভাৱনীয় হাৰত শিক্ষিত নিবনুৱাৰ সংখ্যা বৃদ্ধিৰ বিপৰীতে সংস্থাপন লাভৰ পথ মুকলি নোহোৱাত দিনে দিনে জটিল ৰূপ ধাৰণ কৰিছে দেশৰ লগতে অসমৰো নিবনুৱা সমস্যাই। এই প্রতিবেদনত প্রকাশ পোৱা তথ্য মতে, সমগ্র দেশতে প্রব্রজিত ২৮.৯ শতাংশ লোকৰ ভিতৰত ৪৯.৬ শতাংশই ইখন ৰাজ্যৰ পৰা আন এখন ৰাজ্যলৈ কর্মসংস্থাপন বিচাৰি ঢাপলি মেলিছে।
আন্তঃৰাষ্ট্ৰীয় শ্রমিক সংস্থাই প্রকাশ কৰা চলিত বৰ্ষৰ ভাৰতৰ নিবনুৱা সমস্যাৰ প্ৰতিবেদনত উল্লেখ কৰা তথ্য অনুসৰি, বিগত ২০২২ লৈ দেশৰ ভিতৰতে সর্বাধিক নিবনুৱাৰে ভাৰাক্ৰান্ত ৰাজ্যখন হৈছে বিহাৰ। দেশৰ ২২ খন বৃহৎ ৰাজ্যৰ ভিতৰত নিবনুৱাৰ সৰ্বাধিক সংখ্যাৰে শীৰ্ষত বিহাৰ চিহ্নিত কৰাৰ বিপৰীতে এই তালিকাখনত শোচনীয়তাৰ ১৩ নম্বৰ স্থানত আছে অসম। প্রতিবেদনৰ মতে, নিবনুৱাক সংস্থাপিত কৰাৰ দিশৰে সফলতা অৰ্জন কৰা ৰাজ্যখন হ’ল দিল্লী। দিল্লীৰ পাছতে সফল ৰাজ্যৰ তালিকাৰ দ্বিতীয় স্থানত আছে হিমাচল প্রদেশ আৰু তৃতীয় স্থানত আছে তেলেংগানা।
একেদৰে চতুৰ্থ স্থানত উত্তৰাখণ্ড আৰু পঞ্চম স্থানত আছে গুজৰাট। উল্লেখ্য যে এই তালিকাত অতি শোচনীয় অৱস্থাৰ ৰাজ্যকেইখনৰ শীৰ্ষত বিহাৰৰ পাছতে আছে ওড়িছা, ঝাৰখণ্ড, উত্তৰ প্ৰদেশ, মধ্যপ্রদেশ, পশ্চিমবংগ, পঞ্জার, ছত্ৰিশগড় আৰু কর্ণাটক। ইয়াৰ পাছতে তালিকাৰ ১৩ নম্বৰ স্থানত আছে অসম। বৃহৎসংখ্যক নিবনুৱাৰে ককবকাই থকা ৰাজ্যখনত উদ্যোগ, কাৰখানাৰ অভাৱৰ বাবে নিবনুৱাৰ সংস্থাপনৰ হাৰো তুলনামূলকভাৱে দ্রুতগতিত হ্রাস পাইছে
প্রতিবেদনত লগতে প্রকাশ কৰা হৈছে যে অসমত নিবনুৱাৰ সংখ্যা ২০২১ত মুঠ জনসংখ্যাৰ ২৭.৮ শতাংশ থকাৰ বিপৰীতে ২০৩১ত কেৱল ১৫ৰ পৰা ২৯ বছৰ বয়সৰ নিবনুৱাৰ সংখ্যাই ২৪.৮ শতাংশ হ’ব বুলি ঠাৱৰ কৰা হৈছে। আকৌ ২০৩৬ লৈ অসমৰ মুঠ জনসংখ্যাৰ ভিতৰত কেৱল ১৫ৰ পৰা ২৯ বছৰ বয়সৰ নিবনুৱাৰ সংখ্যা ২২.৯ শতাংশ হ’ব বুলিও প্রতিবেদনত আগজাননী দিয়া হৈছে। উল্লেখ্য যে সমগ্ৰ দেশৰ মুঠ জনসংখ্যাৰ ভিতৰত ২০২১ত অসমৰ মুঠ নিবনুৱাৰ ২.৬ শতাংশ থকাৰ বিপৰীতে ২০৩১৩ এই হাৰ ২.৭ শতাংশলৈ বৃদ্ধি পাব বুলি আগজাননী দিয়া হৈছে। প্রতিবেদনত এই কথাও উল্লেখ কৰা হৈছে যে ২০২২ত অসমৰ উচ্চ শিক্ষিত নিবনুৱাৰ হাৰ আছিল ৩৫.৪ শতাংশ।
ইফালে, ৰাজ্যখনত যুৱকৰ নিযুক্তিৰ হাৰেৰে ২২ খন ৰাজ্যৰ ভিতৰত ষষ্ঠ স্থানত আছে অসম। আকৌ যুৱতীৰ নিযুক্তিৰ হাৰেৰে তালিকাৰ অষ্টম স্থানত আছে অসম। একেদৰে নিয়মীয়া আনুষ্ঠানিক শ্ৰমিকৰ হাৰেৰে (১৫ বছৰৰ ঊর্ধ্বৰ) দেশৰ আন ৰাজ্যসমূহৰ ভিতৰত অসমৰ স্থান হ’ল নৱম। তালিকা মতে, মুঠ শ্রমিকৰ ১২.৮৮ শতাংশইহে নিয়মীয়া আনুষ্ঠানিক কর্মচাৰীৰূপে কার্যনির্বাহ কৰিছে অসমত।
ইয়াৰ বিপৰীতে অনিয়মীয়া বা অস্থায়ীভাৱে কৰ্মৰত শ্ৰমিকৰ দিশেৰে দেশৰ ২২ খন ৰাজ্যৰ ভিতৰৰ্ত অসমৰ স্থান হ’ল ১১ নম্বৰ। ৰাজ্যখনৰ ২০.৬১ শতাংশ শ্রমিকে অস্থায়ী ৰূপত কৰ্মৰত অৱস্থাত আছে। লক্ষ্যণীয় যে দেশৰ ২২ খন বৃহৎ ৰাজ্যৰ ভিতৰত অসমত স্বনিয়োজনৰে জীৱন নিৰ্বাহ কৰাসকলৰ ভিতৰত অধিকাংশই দৰিদ্ৰ সীমাৰেখাৰ তলত বসবাস কৰিবলগীয়া হৈছে।
সাধাৰণ কোনো ব্যৱসায়-বাণিজ্যৰে জীৱনৰ প্ৰত্যাহ্বান নেওচি অগ্ৰসৰ হ’বলৈ চেষ্টা কৰাসকলৰ ভিতৰত ২২.১৫ শতাংশই দৰিদ্ৰ সীমাৰেখাৰ তলত বসবাস কৰে উল্লেখ্য যে ব্যৱসায়-বাণিজ্য বা আন কোনো অসংগঠিত খণ্ডৰে জড়িত হৈ আত্মসংস্থাপন লাভ কৰাসকলৰ ভিতৰত বৃহৎসংখ্যকেই দৰিদ্ৰ সীমাৰেখাৰ তলত বসবাস কৰিবলগীয়া হোৱাৰ হাৰেৰে দেশৰ আন ৰাজ্যসমূহৰ তালিকাত চতুর্দশ স্থানত আছে অসম। উল্লেখ্য যে আত্মসংস্থাপনবে সফলতা অর্জন কৰা অতি কমসংখ্যক অর্থাৎ ২.৬৮ শতাংশ স্বনিয়োজিত কর্মীহে দৰিদ্ৰ সীমাৰেখাৰ তলত বসবাস কৰা ৰাজ্যখন হ’ল দিল্লী।
ইফালে, তালিকাৰ ২২ নম্বৰ স্থানত আছে ছত্ৰিশগড়। আকৌ অসংগঠিত খণ্ডত অস্থায়ী শ্রমিকৰূপে কৰ্মৰত শ্ৰমিকসকলৰ মাহিলি গড় মজুৰি হ’ল ১০,২৯৯ টকা সাম্প্রতিক মুদ্রাস্ফীতিৰ ঊর্ধ্ব হাৰে মধ্যবিত্ত শ্রেণীকে ঢোকে ঢোকে পানী খুওৱাৰ সময়ত মাহিলি ১০,২৯৯ টকাৰে পৰিয়াল পোহপাল দিবলগীয়া হৈছে অসমৰ অস্থায়ী ভিত্তিত নিয়োজিত একো একোজন শ্রমিকে।
প্রতিবেদনত দেশৰ আটাইকেইখন ৰাজ্যৰ ১৫ৰ পৰা ২৯ বছৰ বয়সৰ শিক্ষিত নিবনুৱাৰ হাৰৰ দিশেৰে ২০২২ পর্যন্ত অসমৰ স্থান হ’ল ১১। পৰিসংখ্যা মতে, ৰাজ্যখনত ২০২২ লৈ শিক্ষিত নিবনুৱাৰ হাৰ আছিল ২৩.৬৬ শতাংশ। ইয়াৰে ভিতৰত ১৮.৯৮ শতাংশ যুৱক আৰু ৩৬.৩০ শতাংশ যুৱতী। ইফালে, ৰাজ্যখনৰ ১৫ৰ পৰা ২৯ বছৰ বয়সৰ শিক্ষা বা কোনো ধৰণৰ প্ৰশিক্ষণ নথকা নিবনুৱাৰ হাৰ হ’ল ৩৩.৭৩ শতাংশ।