Union Minister Sarbananda Sonowal:
কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী তথা ডিব্ৰুগড় লোকসভা সমষ্টিৰ সাংসদ সর্বানন্দ সোণোৱালে মঙলবাৰে ডিব্ৰুগড় চহৰত উপস্থিত হৈ কৃত্রিম বানে শেহতীয়াকৈ সৃষ্টি কৰা সমস্যা তথা অসুবিধাৰ বিতং বুজ লয়। ইয়াৰ পূৰ্বেও যোৱা ২০ জুলাইত সর্বানন্দ সোণোৱালে সমগ্ৰ ডিব্ৰুগড় চহৰৰ বিভিন্ন অঞ্চল তথা সমীপৱৰ্তী অঞ্চলবোৰ পৰিদৰ্শন কৰি কৃত্রিম বানে সৃষ্টি কৰা সামগ্রিক অৱস্থাৰ বুজ লৈছিল।
সমস্যাবোৰৰ স্থায়ী সমাধানৰ পথ ক্ষিপ্ৰতাৰে প্রশস্ত কৰাত তেখেতে গুৰুত্ব দিয়ে। তেখেতে জনায় যে- আইআইটি গুৱাহাটীয়ে শীঘ্রেই ডিব্ৰুগড়ৰ কৃত্রিম বানৰ কাৰকসমূহ অধ্যয়ন কৰি মাষ্টাৰপ্লেন প্ৰস্তুত কৰিব আৰু চৰকাৰক কাৰিকৰী পৰামৰ্শ তথা সহযোগিতা আগবঢ়াব। এই সন্দৰ্ভত ৰাজ্য চৰকাৰে আইআইটিলৈ লিখিতভাৱে পত্ৰ প্ৰেৰণ কৰাৰ কথা তেখেতে উল্লেখ কৰে। আইআইটি গুৱাহাটীৰ পৰামৰ্শৰ আধাৰত চৰকাৰে যাৱতীয় পদক্ষেপ গ্ৰহণ কৰিব বুলি সোণোৱালে উল্লেখ কৰে।
আনহাতে চাবুৱা নগৰৰ নৰ্দমা ব্যৱস্থাপনাৰ বাবেও আইআইটি গুৱাহাটীৰ পৰামৰ্শ লোৱা হ’ব বুলি তেখেতে উল্লেখ কৰে, যাতে ডিব্ৰুগড় চহৰ আৰু চাবুৱা নগৰৰ খহনীয়া, কৃত্রিম বান পৰিস্থিতিৰ স্থায়ী সমাধানৰ পথ প্রশস্ত হয় আৰু বহনক্ষম উন্নয়ন ত্বৰান্বিত হয়। এইক্ষেত্রত কেন্দ্রীয় আৰু ৰাজ্য চৰকাৰে যৌথভাৱে পদক্ষেপ গ্রহণ কৰি যাব বুলি সোণোৱালে মন্তব্য কৰে।
আনহাতে হৰ ঘৰ তিৰংগা অভিযানৰ অংশ হিচাপে দেশৰ গৌৰৱময় ৭৮তম স্বাধীনতা দিৱসৰ প্ৰাকক্ষণত ডিব্ৰুগড় জিলা বিজেপি আৰু যুৱ মৰ্চাৰ উদ্যোগত আয়োজিত বাইক ৰেলী- তিৰংগা যাত্রাত কেন্দ্রীয় মন্ত্ৰী সৰ্বানন্দ সোণোৱালেও অংশগ্ৰহণ কৰে। তাৰ পূৰ্বে তেখেতে ডিব্ৰুগড়স্থিত শ্বহীদ কুশল কোঁৱৰৰ প্ৰতিমূর্তিত পুষ্পাঞ্জলি অর্পণেৰে শ্ৰদ্ধা জ্ঞাপন কৰে। তেখেতে উল্লেখ কৰে, “দেশৰ স্বাধীনতা সংগ্রামত শ্বহীদ কুশল কোঁৱৰৰ অতুলনীয় ত্যাগ, সাহস আৰু সক্রিয় ভূমিকা ~ এক অবিস্মৰণীয় অধ্যায়। ডিব্ৰুগড়ত ‘তিৰংগা যাত্ৰা’ত ভাগ লোৱাৰ পূৰ্বে মহান শ্বহীদগৰাকীৰ প্ৰতিমূর্তিত সতীর্থসকলৰ সৈতে গভীৰ শ্ৰদ্ধাঞ্জলি জ্ঞাপন কৰোঁ। শ্বহীদ কুশল কোঁৱৰৰ স্বদেশপ্রেম আৰু মাতৃভূমিৰ হকে আগবঢ়োৱা সমর্পিত সেৱাই দেশবাসীক উদ্বুদ্ধ কৰি যাব।”
