Press conference of evicted people of Shilsanko:
মহানগৰীৰ দিছপুৰ প্ৰেছ ক্লাৱত শিলসাঁকোৰ উচ্ছেদিত ৰাইজৰ সংবাদমেল ৷ শণিবাৰে আয়োজিত এই সংবাদমেলত পুনৰ গৰজি উঠিল উচ্ছেদিত ৰাইজৰ নেত্ৰী গায়ত্ৰী বৰী ৷ ২৮ আগষ্টত শিলসাঁকোৰ উচ্ছেদিত ৰাইজৰ পুনৰ সংস্থাপনৰ বিষয়টো চৰকাৰৰ দৃষ্টি আকৰ্ষণৰ বাবে অসম বিধানসভাৰ সন্মুখত উচ্ছেদিত ৰাইজে গণতান্ত্ৰিকভাৱে এক প্ৰতিবাদী কাৰ্যসূচী ৰূপায়ণ কৰা হৈছিল ৷ কিন্ত প্ৰতিবাদী ৰাইজৰ ওপৰত ৰাং কুকুৰৰ দৰে জপিয়াই পৰে আৰক্ষী ৷ বহু প্ৰতিবাদকাৰীক চোচৰাই নিয়াৰ লগতে শিলসাঁকোৰ উচ্ছেদিত ৰাইজৰ নেত্ৰী গায়ত্ৰী বৰীক এগৰাকী মহিলা কনিষ্টবলে পূৰ্ণহতীয়া চৰ সোধাই ৷
পিছত এই ঘটনাৰ বাবে গায়ত্ৰী বৰীয়ে দিছপুৰ থানাত পম্পী দাস নামৰ মহিলা কনিষ্টবল গৰাকীৰ বিৰুদ্ধে এখন এজাহাৰ দাখিল কৰে যদিও আজি পৰ্যন্ত গোচৰটো পঞ্জীভূক্ত নকৰাৰ কথা সংবাদমেলত সদৰি কৰে বৰীয়ে ৷ বৰীয়ে কয় ,অতি শীৰ্ঘেই মহিলা কনিষ্টবল পম্পী দাসৰ বিৰুদ্ধে তাৎক্ষণিক ব্যৱস্থা গ্ৰহণ নকৰিলে দিছপুৰ থানা ঘেৰাও কৰাৰ হুংকাৰ দিয়ে ৷
বৰীয়ে আৰু কয় যে,শিলসাঁকোত উচ্ছেদ কৰা আজি আঢ়ৈ বছৰ উকলি গ’ল যদিও চৰকাৰে পূৰ্বে দিয়া প্ৰতিশ্ৰুতি অনুসৰি পুনৰ সংস্থাপন বিষয়টোৰ প্ৰতি গুৰুত্ব দিয়া নাই ৷ চৰকাৰৰ স’তে ইতিপূৰ্বে দুবাৰকৈ আলোচনাত বহা হৈছে ৷ কিন্ত কোনো ইতিবাচক সহাৰি পোৱা নগ’ল ৷ সেয়েহে চৰকাৰৰ দৃষ্টি আকৰ্ষণৰ বাবে শিলসাঁকোৰ উচ্ছেদিত ৰাইজে সময়ে সময়ে গণতান্ত্ৰিক আন্দোলন কৰি আহিছে ৷ ২৮ আগষ্টত সম্পূৰ্ণ গণতান্ত্ৰিক ভাবে কৰা আন্দোলনকাৰীৰ ওপৰত আৰক্ষীৰ নিৰ্যাতনে কাৰ্যত: মৌলিক অধিকাৰ খৰ্ব কৰিছে ৷
শিলসাঁকোৰ উচ্ছেদিত ৰাইজৰ হৈ গায়ত্ৰী বৰীয়ে কয়,ৰাইজৰ মৰ্মবেদনা চৰকাৰে অনুধাৱন কৰি শীৰ্ঘেই পুনৰ সংস্থাপনৰ দিহা কৰক ৷
