Aap Pressmeet In Guwahati:
হাজাৰ হাজাৰ কোটি টকাৰ কেলেংকাৰি সংঘটিত কৰা বিজেপি নেতাৰ বিৰুদ্ধে কেন্দ্ৰীয় চৰকাৰে ইডি বা চিবিআইৰ প্ৰয়োগ কৰা নাই। ৭০ হাজাৰ কোটি টকাৰ দুৰ্নীতিত লিপ্ত বিজেপি নেতা জে’ললৈ যাবলগীয়া হোৱা নাই। বিজেপিত যোগদান কৰা মুকুল ৰায়, শুভেন্দু অধিকাৰীৰ বিৰুদ্ধে দুৰ্নীতিৰ তদন্ত হোৱা নাই। বৃহৎ কেলেংকাৰি সংঘটিত কৰি বিদেশত বিলাসী জীৱন অতিবাহিত কৰিছে নিৰৱ মোদী, ললিত মোদী, বিজয় মালিয়াৰ দৰে বিজেপি চৰকাৰৰ ঘনিষ্ঠ ব্যক্তি।
অথচ কোনো ধৰণৰ দুৰ্নীতি, অনিয়মৰ প্ৰমাণ নোহোৱাকৈ আপৰ চাৰিগৰাকীকৈ নেতাৰ বিৰুদ্ধে ইডি – চিবিআই লগাই কাৰাগাৰত বন্দী কৰি ৰাখিছিল। সাংসদ সঞ্জয় সিং, মনীষ ছিছ’দিয়া, আপৰ মুৰব্বী অৰবিন্দ কেজৰিৱাল আৰু সত্যেন্দ্ৰ জৈনক অন্যায় ভাৱে ইডি, চিবিআইৰ জৰিয়তে গ্ৰেপ্তাৰ কৰি কাৰাবন্দী কৰি ৰাখিছিল। দুৰ্নীতি বা ধন সৰবৰাহৰ কোনো তথ্য নোপোৱাত আদালতে এজন এজনকৈ আটাইকেইজনকে জামিনত মুক্তি দিয়ে।
দিল্লীৰ প্ৰাক্তন স্বাস্থ্য মন্ত্ৰী সত্যেন্দ্ৰ জৈনক কালি ৰাউছ এভিনিউ আদালতে জামিনত মুক্তি দিয়ে। আম আদমী পাৰ্টিয়ে আদালতৰ ৰায়ক আদৰণি জনাইছোঁ। আজি গণেশগুৰিস্থিত আম আদমী পাৰ্টিৰ ৰাজ্যিক কাৰ্যালয়ত অনুষ্ঠিত সংবাদমেলত এইদৰে মত ব্যক্ত কৰে দলটোৰ ৰাজ্যিক উপ সভাপতি অনুৰূপা ডেকাৰজাই।
দলৰ জ্যেষ্ঠ নেত্ৰী গৰাকীৰ অভিযোগ, যি বিজেপি চৰকাৰে গণতন্ত্ৰৰ সুৰক্ষাৰ কথা কয়, সেই বিজেপিয়ে আপক নিঃশেষ কৰাৰ বাবে অন্যায়ভাৱে ইডি আৰু চিবিআইৰ ব্যৱহাৰ কৰিছে। ভুৱা গোচৰত আমাৰ নেতাসকলক গ্ৰেপ্তাৰ কৰি তেওঁলোকৰ জীৱনৰ বহু মূল্যৱান সময়ৰ অপচয় কৰিছে। যি গৰাকী সত্যেন্দ্ৰ জৈনে স্বাস্থ্য মন্ত্ৰীৰ দায়িত্ব লৈ দিল্লীত মহল্লা ক্লিনিক স্থাপনৰ জৰিয়তে স্বাস্থ্য সেৱাৰ ক্ষেত্ৰত দৃষ্টান্তমূলক কাম কৰিলে তেওঁৰ ওপৰত ভুৱা গোচৰ জাপি দিলে। এয়া বিজেপিৰ ষড়যন্ত্ৰ । ন্যায়ালয়ে দিয়া ৰায়ে কেন্দ্ৰীয় চৰকাৰৰ স্বৰূপ উন্মোচন কৰিলে।
আনহাতে সংবাদমেলত মূল্যবৃদ্ধি নিয়ন্ত্ৰণৰ ক্ষেত্ৰত ৰাজ্য চৰকাৰৰ যোগান বিভাগৰ ব্যৰ্থতাৰ বিৰুদ্ধেও সৰৱ হয় অনুৰূপা ডেকাৰজাই । অত্যাৱশ্যকীয় সামগ্ৰীৰ মূল্য বৃদ্ধি শীঘ্ৰেই ৰোধ কৰিবলৈ দাবী জনায় আপৰ নেত্ৰী গৰাকীয়ে । সংবাদমেলত আপ অসমৰ আন এগৰাকী উপ সভাপতি সৌমিক সেনগুপ্ত, সংবাদ মাধ্যম কোষৰ সমন্বয়ক গুৰপ্ৰীত সিং উপ্পল আৰু যুৱ নেতা জিতু ডেকাও উপস্থিত থাকে ।