Unplanned flyover has brought destruction to businessmen in zooroad:
চৰকাৰৰ পৰিকল্পনাহীন এখন উৰণীয়া সেতুৱে বহু পৰিয়াললৈ অমানিশা কঢ়িয়াই আনিছে। মহানগৰীৰ জু ৰোড-গীতানগৰ সংযোগী উৰণীয়া সেতুখনৰ ফলত উক্ত পথত বছৰ বছৰ ধৰি সৰু সৰু দোকান দি পৰিয়াল পোহপাল দি অহা ব্যৱসায়ী সকলৰ ব্যৱসায় একপ্ৰকাৰ স্তব্ধ হৈ পৰিছে।
‘শ্রদ্ধাঞ্জলি’ নামৰ সেতুখন নিৰ্মাণৰ পাছতে উক্ত অঞ্চলৰ গৰিষ্ঠসংখ্যক ব্যৱসায়িক প্ৰতিষ্ঠানত অস্বাভাৱিক হাৰত গ্ৰাহকৰ সংখ্যা হ্রাস পোৱাৰ ফলত বহুতে ব্যৱসায় এৰি জীৱিকাৰ আন পথৰ সন্ধান কৰিবলৈ বাধ্য হৈছে। কোনোধৰণৰ পৰিকল্পনা নকৰাকৈ উৰণীয়া সেতুখন নিৰ্মাণ কৰা বুলি স্থানীয় ব্যৱসায়ীসকলে ক্ষোভ প্রকাশ কৰি সেতুখনৰ ফলত উপাৰ্জন বন্ধ হৈ পৰা প্ৰায় ৩০ খন দোকান সম্প্রতি বন্ধ হৈ পৰিছে বুলি সদৰী কৰিছে।
এই গুৰুতৰ বিষয়টোক লৈ যোৱা ১৬ নৱেম্বৰত জু ৰোড তিনিআলিত ব্যৱসায়ীসকলৰ মাজত এখন সভাও অনুষ্ঠিত হয়। জু-নাৰেংগী তিনিআলীৰ ব্যৱসায়ী সন্থা, স্থানীয় উন্নয়ন সমিতি, সদৌ গুৱাহাটী ব্যৱসায়ী সন্থা আদিয়ে অংশগ্ৰহণ কৰা বৈঠকখনত বৃহত্তৰ অঞ্চলটো ব্যৱসায়ৰ উপযোগী কৰি তুলিবলৈ চৰকাৰ তথা প্ৰশাসনক ১০ দিনৰ সময়সীমা বান্ধি দিয়া হৈছে।
বিশেষকৈ পথৰ কাষে কাষে আৰু উৰণীয়া সেতুখনৰ তলত গ্ৰাহকৰ বাবে পার্কিঙৰ সুব্যৱস্থা নথকাৰ বাবেই গেলামালৰ পৰা আৰম্ভ কৰি পাণ দোকান, ফলমূলৰ দোকানখনলৈ সকলোৰে ব্যৱসায় বন্ধ হৈ পৰিছে বুলি সংগঠনসমূহে সদৰী কৰিছে। এই সন্দৰ্ভত ব্যৱসায়ীসকলে গুৱাহাটী পৌৰ নিগমৰ মেয়ৰ মৃগেন শৰণীয়াক সাক্ষাৎ কৰি তেওঁলোকৰ ব্যৱসায়সমূহ পুনৰুজ্জীৱিত কৰিবলৈ কে’তবোৰ ব্যৱস্থা গ্ৰহণৰ আহ্বান জনাইছিল যদিও আজিকোপতি কোনোধৰণৰ ব্যৱস্থা গ্রহণ কৰা নহ’ল বুলি তেওঁলোকে ক্ষোভ উজাৰে।
উল্লেখ্য যে ক’ভিডৰ সময়ছোৱাত ব্যৱসায়িক ক্ষেত্ৰখন একপ্ৰকাৰ স্তব্ধ হৈ পৰিছিল। লাহেকৈ পুনৰ ব্যৱসায় আৰম্ভ কৰিবলৈ লওঁতেই জু-নাৰেংগী পথৰ উৰণীয়া সেতুখনৰ নিৰ্মাণ কাৰ্য আৰম্ভ হোৱাত বৃহত্তৰ অঞ্চলটোৰ ব্যৱসায় পুনৰ বন্ধ হৈ পৰে। সেতুখন হৈ উঠাৰ পাছত পুনৰ ভাল দিন ঘূৰি আহিব বুলি ব্যৱসায়ীসকলে ধৈৰ্যৰে দিন অতিবাহিত কৰি শেষত পুনৰ ব্যৱসায় আৰম্ভ কৰিলে যদিও সু-পৰিকল্পিতভাবে সেতুখন নির্মাণ নোহোৱাৰ ফলত তেওঁলোকৰ ব্যৱসায় সম্পূৰ্ণৰূপে বন্ধ হৈ পৰে।
সম্প্ৰতি অঞ্চলটোৰ গৰিষ্ঠ সংখ্যক সৰু-বৰ ব্যৱসায়িক প্ৰতিষ্ঠানে কৰ্মচাৰীৰ সংখ্যা হ্রাস কৰিবলৈ বাধ্য হৈ পৰাৰ লগতে বহুজনে ব্যৱসায় বন্ধ কৰিছে। এই সন্দৰ্ভত জু-নাৰেংগী তিনিআলিৰ ব্যৱসায়ী সন্থাৰ সভাপতি দ্বিজেন ভট্টাচার্যই ‘দৈনিক অগদূত’ৰ আগত কয় যে এই সেতুখন বহুজনৰ কাৰণে অভিশাপ হৈ পৰিছে। বিশেষকৈ যানবাহনৰ পার্কিঙৰ সুব্যৱস্থা নথকা আৰু আৰক্ষীৰ অত্যাচৰৰ বাবে সম্প্রতি দোকানসমূহলৈ গ্রাহক আহিবলৈ এৰি দিছে।
তেওঁ কয়, ‘এখন পাণ খাবলৈ আহিলে যদি পার্কিঙৰ নামত ২০ টকা দিবলগীয়া হয়, ক্ষন্তেক বাহনখন পথৰ কাষত শৃংখলিতভাৱে ৰাখিলে যদি আৰক্ষীক দুহেজাৰ টকা জৰিমনা দিবলগীয়া হয়, দোকানলৈ কোন আহিব? এই দোকানসমূহৰ জৰিয়তে যে বহু পৰিয়াল চলি আছে, কাৰোৱেই সেই চিন্তা নাই। চৰকাৰক কেৱল টকা লাগে।’ তদুপৰি, অ’ত-ত’ত উৰণীয়া সেতু নির্মাণত ব্যৱহৃত সামগ্ৰী পেলাই ৰাখি এক বিশৃংখল পৰিৱেশ কৰি ৰাখিছে বুলি মন্তব্য কৰি তেওঁ উৰণীয়া সেতুৰ তলত থকা পার্কিং স্থানসমূহো কেতবোৰ অনুষ্ঠান-প্রতিষ্ঠানে দখল কৰি ৰাখিছে বুলি অভিযোগ তোলে।
তেওঁ কয়, ‘উৰণীয়া সেতুখনৰ তলত পার্কিঙৰ ব্যৱস্থা কৰা হৈছে যদিও সেয়া সাধাৰণ জনতাই ব্যৱহাৰ কৰিব নোৱাৰে। একাংশ অনুষ্ঠান-প্রতিষ্ঠানে সেতুখনৰ তলত থকা পার্কিং স্থানসমূহ দখল কৰি ৰাখিছে। পৌৰ নিগমক টকা লাগে কেৱল, বাকী কথা ভাবিবলৈ সময় নাই। আজি যদি সেই পার্কিং স্থানসমূহ সাধাৰণ জনতাই ব্যৱহাৰ কৰিব পাৰিলেহেঁতেন, অন্ততঃ স্থানীয় ব্যৱসায়ীসকলে কিছু হ’লেও সকাহ পালেহেঁতেন।
লগতে সেতুখনৰ তলত যি এটা-দুটা স্থান খালী আছে, তাকো লীজত দিয়া হৈছে। আনহাতে, সেতুখনৰ তলৰে যোৱা পথছোৱা যথেষ্ট বহল যদিও পথৰ কাষে কাষে থকা দোকানসমূহলৈ অহা গ্রাহকে বাহন ৰখাব নোৱাৰে। ৰখালেই মুহূৰ্ততে দুহেজাৰ টকাৰ জৰিমনাৰ বাৰ্তা আহে ম’বাইললৈ । ফলত ব্যৱসায় প্রায় স্তব্ধ। ইতিমধ্যে বহু পুৰণি প্রায় ৩০খন দোকান গৰাকীয়ে বন্ধ কৰি গুচি গৈছে।’ এই সন্দৰ্ভত ব্যৱসায়ীসকলে যোৱা ১৬ নৱেম্বৰত এক বৈঠকত মিলত হয় বুলি তেওঁ মন্তব্য কৰি সংশ্লিষ্ট স্থানৰ পৰা পার্কিং মাচুল তোলা বন্ধ কৰা, আৰক্ষীৰ অত্যাচাৰ বন্ধ কৰা, পার্কিং স্থানসমূহ সাধাৰণ জনতাৰ বাবে মুকলি কৰি দিয়াৰ সিদ্ধান্ত গ্রহণ কৰি জিলা প্ৰশাসন আৰু পৌৰ নিগমক ১০ দিনৰ সময়সীমা বান্ধি দিছে বুলি জনায়।
এই নির্দিষ্ট দিনৰ ভিতৰত যদি কোনোধৰণৰ ব্যৱস্থা গ্রহণ কৰা নহয়, ব্যৱসায়ীসকল ৰাজপথলৈ ওলাব বুলিও তেওঁ হুংকাৰ প্ৰদান কৰে। উল্লেখ্য যে উৰণীয়া সেতুখন নির্মাণ হোৱাৰ পাছতে ব্যৱসায় বেয়া হোৱাত সংশ্লিষ্ট স্থানত থকা ‘ভি-মার্ট’ নামৰ শ্বপিং মলখন সম্পূর্ণৰূপে বন্ধ হৈ পৰে। তদুপৰি গ্ৰাহকৰ অভাৱত কে’বাখনো শ্বপিং মল বন্ধ হৈ যোৱাৰ দিশলৈ গতি কৰিছে বুলি স্থানীয় ব্যৱসায়ীসকলে অভিযোগ কৰিছে ৷