25,000 for father-son post-mortem in Bishwanath:
মৰণোত্তৰ পৰীক্ষাৰ বাবদ মৃতকৰ পৰিয়ালৰ পৰা স্বাস্থ্য বিভাগৰ বিষয়া-কর্মচৰীয়ে ২৫ হেজাৰ টকা সৰকোৱাৰ এক অভিযোগে জোঁকাৰিছে বিশ্বনাথ জিলাক। ইতিমধ্যে মৃতকৰ আত্মীয়ৰ অভিযোগৰ ভিত্তিত জিলা প্ৰশাসন আৰু আৰক্ষী প্রশাসনে ঘটনাৰ তদন্ত নির্দেশ জাৰি কৰিছে।
উল্লেখ্য যে যোৱা সাত নৱেম্বৰত গহপুৰত মৃগাংক শইকীয়া নামৰ এজন লোকে নিজৰে সাত বছৰীয়া পুত্ৰক হত্যা কৰি পাছত চিপজৰী লৈ আত্মহত্যা কৰে। পৰৱৰ্তী সময়ত পিতা-পুত্ৰৰ মৰণোত্তৰ পৰীক্ষাৰ নামত মৃতকৰ আত্মীয়ই দুখন এম্বুলেন্সক ১৪ হেজাৰ টকা, মৰণোত্তৰ পৰীক্ষা কৰা চিকিৎসক আৰু ছুইপাৰক ১১ হেজাৰ টকাসহ সৰ্বমুঠ ২৫ হেজাৰ টকা আদায় দিবলগীয়া হোৱাৰ অভিযোগ উত্থাপিত হৈছে।
অভিযোগ অনুসৰি এই ধন বিহালী খণ্ড প্রাথমিক চিকিৎসালয়ৰ চিকিৎসক আৰু ছুইপাৰে সৰকায়। এই অভিযোগ কৰি মৃত মৃগাংক শইকীয়াৰ পিতৃ চিদানন্দ শইকীয়া প্ৰশাসনৰ দ্বাৰস্থ হৈছে। তেওঁৰ এই অভিযোগৰ ভিত্তিত বিশ্বনাথৰ জিলা আযুক্ত মুনীন্দ্র নাথ ভাটেই এক দণ্ডাধীশ পৰ্যায়ৰ তদন্ত ঘোষণা কৰিছে। জিলা আয়ুক্তই সাত দিনৰ ভিতৰত তদন্ত প্রতিবেদন দাখিল কৰিবলৈ দণ্ডাধীশলৈ নিৰ্দেশ জাৰি কৰিছে। বিশ্বনাথ আৰক্ষীয়েও ঘটনাৰ সুকীয়া তদন্ত ঘোষণা কৰিছে।
এজন অতিৰিক্ত আৰক্ষী অধীক্ষকক এই তদন্তৰ দায়িত্ব দিয়া হৈছে। তদুপৰি চিকিৎসকৰ বিৰুদ্ধে অভিযোগ উত্থাপিত হোৱাত স্বাস্থ্য বিভাগেও ঘটনাৰ তদন্ত আৰম্ভ কৰিছে বুলি বিশ্বনাথ জিলা যুটীয়া স্বাস্থ্য সঞ্চালক ডাঃ যোগেন্দ্র চন্দ্র বেই জানিবলৈ দিছে।
আনহাতে, মৃতকৰ আত্মীয়ৰ পৰা ধন লোৱাৰ অভিযোগত অভিযুক্ত হোৱা ছুইপাৰ দীপক তাঁতীয়ে মাত্র তিনি হেজাৰ টকা লোৱা বুলিহে সাংবাদিকৰ আগত প্রকাশ কৰে।