Women’s Bhaona in Golaghat:
গোলাঘাট নগৰত যোৱা নিশা প্রদর্শিত হোৱা মহিলা ভাওনাই মন্ত্রমুগ্ধ কৰিলে কে’বা সহস্রাধিক দর্শকক। গোলাঘাট নগৰৰ চান্দমাৰীস্থিত পঞ্চতীর্থ মন্দিৰত এই বর্ণাঢ্য আয়োজন কৰিছিল গোলাঘাটৰ অগ্রণী সাংস্কৃতিক অনুষ্ঠান বৰদৈচিলা সাংস্কৃতিক গোষ্ঠী আৰু হৰগৌৰী সাংস্কৃতিক গোষ্ঠীয়ে। শ্রীকৃষ্ণ ৰাসলীলা উপলক্ষে মহিলা, শিশু, কিশোৰী, যুৱতীৰ দ্বাৰা সাৱলীল ৰূপত অভিনীত ‘কংসবধ’ নাটৰ ভাওনা উদ্বোধন কৰে বিশিষ্ট শিক্ষাবিদ, সমাজকর্মী ড: নৃপেন বৰুৱাই।
বন্তি প্রজ্বলন কৰে জ্যেষ্ঠ সাংবাদিক, অসম সাহিত্য সভাৰ কেন্দ্রীয় সাংগঠনিক সম্পাদক দিগন্ত কুমাৰ ভূঞাই। মন্দিৰ ৰাজবংশীয়ে পৰিচালনা কৰা উদ্বোধনী অনুষ্ঠানত গোলাঘাট প্রেছ ক্লাব সাধাৰণ সম্পাদক প্রবীণ কুমাৰ দাস, বিশিষ্ট আধ্যাত্মিক কর্মী দিলীপ শইকীয়া, সত্ৰীয়া সংস্কৃতিৰ সাধক, শিক্ষক জিতেন কাকতি, সমাজকর্মী মৃদুল দত্ত, মনচুম বৰা, সত্যৰঞ্জন নেওগ, নামাচার্য জুমন বৰা আদিয়ে বিশিষ্ট অতিথিৰূপে অংশগ্রহণ কৰে।
পুৱা গছপুলি ৰোপণ কৰে গোলাঘাট পৌৰসভাৰ উপ-পৌৰপতি সীমান্ত বৰাই। অগ্রণী সাংস্কৃতিক অনুষ্ঠান দুটাৰ মুৰব্বী কৰবী ভট্টাচার্য আৰু মামণি দাসৰ নেতৃত্বত প্রদর্শিত হোৱা মহাপুৰুষীয়া ভাওনাত গোলাঘাট জিলাৰ বিভিন্ন ঠাইৰ প্ৰতিভাৱান শিল্পীসকলে সাবলীল আৰু সুন্দৰ অভিনয় কৰি পঞ্চতীর্থ মন্দিৰ প্রাংগণত ঠাহ খাই থকা কে’বা সহস্রাধিক দর্শকক মন্ত্রমুগ্ধ কৰিবলৈ সক্ষম হয়। ভাওনা শিল্পীসকলৰ সাৱলীল অভিনয়ত মুগ্ধ হৈ দর্শকে বিপুল সঁহাৰি জনাই জাউৰিয়ে- জাউৰিয়ে দিয়া হাত চাপৰিৰ ফলত অনন্য আৰু মুখৰিত পৰিৱেশৰ সৃষ্টি হয়।
উল্লেখ্য যে বৰদৈচিলা সাংস্কৃতিক গোষ্ঠী আৰু হৰগৌৰী সাংস্কৃতিক গোষ্ঠী মহিলাৰ দলে মহাপুৰুষীয়া কৃষ্টি-সংস্কৃতিৰ চৰ্চা, প্ৰসাৰ, প্ৰচাৰৰ লগতে গোলাঘাট জিলাৰ গ্রামাঞ্চলৰ এমুঠি প্রতিভা বুটলি আনি ৰাইজৰ দ্বাৰা প্ৰশংসিত হ’বলৈ সক্ষম হৈছে। বিগত বর্ষতো গোলাঘাট নগৰত বৰদৈচিলা সাংস্কৃতিক গেষ্ঠীয়ে শ্রীকৃষ্ণৰ ৰাসলীলা আয়োজন কৰি ৰাইজৰ বিপুল সঁহাৰি লাভ কৰিছিল।