বিকাশৰ ১২ দিন’ শীর্ষক কাৰ্যসূচী উপলক্ষে আজি মৰিগাঁও জিলাখনৰ মেধাৱী শিক্ষার্থীসকলক উৎসাহিত কৰাৰ উদ্দেশ্যে কেইবাখনো আঁচনিৰ শুভাৰম্ভ কৰে জলসম্পদ আৰু জনসংযোগ মন্ত্ৰী পীযুষ হাজৰিকাই ৷
মৰিগাঁও জিলা প্ৰশাসনৰ সহযোগত তৰুণৰাম ফুকন খেলপথাৰত শিক্ষা, উদ্যোগ, বিত্ত আৰু ৰাজহ বিভাগৰ আঁচনিৰ সম্ভাৰেৰে আয়োজিত এই কাৰ্যসূচীত অংশ লৈ মন্ত্ৰী গৰাকীয়ে কয়, মুখ্যমন্ত্রী ড: হিমন্ত বিশ্ব শৰ্মাৰ নেতৃত্বত অসম চৰকাৰৰ অন্যতম মুখ্য উদ্দেশ্য হৈছে ৰাজ্যৰ সামগ্রিক বিকাশ আৰু জনসাধাৰণৰ জীৱন-যাপনৰ মান উন্নীত কৰা। ইয়াৰ সৈতে সংগতি ৰাখি মুখ্যমন্ত্রীৰ নেতৃত্বত সমগ্ৰ ৰাজ্যতে ‘বিকাশৰ ১২ দিন‘ শীর্ষক এক বিকাশ যাত্রা আৰম্ভ হৈছে। এই বিশেষ উদ্যোগৰ জৰিয়তে মুখ্যমন্ত্ৰীৰ বিশেষ আঁচনিৰ অধীনত ৰাজ্যৰ বিভিন্ন জিলাত উন্নয়নমূলক কাৰ্যসূচী ৰূপায়ণ কৰা হ’ব। আজিৰ অনুষ্ঠানত উপস্থিত সকলো ছাত্ৰ-ছাত্ৰী সুনাগৰিক হিচাপে প্ৰতিষ্ঠা লাভ কৰক, কঠোৰ পৰিশ্ৰম, অদম্য মনোবল, আত্মবিশ্বাসেৰে আগবাঢ়ি যাওক, তাৰেই কামনা কৰিছোঁ আৰু সকলোকে আন্তৰিক শুভেচ্ছা তথা অভিনন্দন জনাইছোঁ।
উল্লেখ্য যে প্ৰজ্ঞান ভাৰতী আঁচনিৰ ড° বাণীকান্ত কাকতি মেধা বঁটাৰ অধীনত জিলাখনৰ বিগত উচ্চতৰ মাধ্যমিক শিক্ষান্ত পৰীক্ষাত ৭৫ শতাংশৰ অধিক নম্বৰ লাভ কৰা ছাত্ৰ আৰু ৬০ শতাংশৰ অধিক নম্বৰ লাভ কৰা ছাত্ৰীক সামৰি মুঠ ১০৮৬গৰাকী ছাত্র-ছাত্রীক স্কুটাৰ প্ৰদান কৰাৰ বিপৰীতে মুখ্যমন্ত্ৰীৰ বিশেষ আঁচনিৰ অধীনত জিলাখনৰ নৱম শ্ৰেণীত অধ্যয়নৰত ১২,১২৮গৰাকী ছাত্র-ছাত্রীলৈ বিনামূলীয়াকৈ চাইকেল প্ৰদান কৰে মন্ত্ৰী হাজৰিকা আৰু মৰিগাঁৱৰ বিধায়ক ৰমাকান্ত দেউৰীয়ে ৷
আনহাতে জিলাখনত চলিত বৰ্ষৰ হাইস্কুল শিক্ষান্ত পৰীক্ষাত ৭৫ শতাংশতকৈ অধিক নম্বৰ লাভ কৰা মুঠ ৬২২গৰাকী ছাত্ৰ-ছাত্ৰীক এই বছৰৰ আনন্দৰাম বৰুৱা বঁটা (নগদ ধন ১২,৫০০ টকাকৈ) ডিবিটিযোগে প্রদান কৰা হয় ৷
আজিৰ এই কাৰ্যসূচীত মৰিগাঁৱৰ বিধায়ক ৰমাকান্ত দেউৰী, তিৱা স্বায়ত্তশাসিত পৰিষদৰ মুখ্য কাৰ্যবাহী সদস্য জীৱন চন্দ্ৰ কোঁৱৰ অসম যুৱ আয়োগৰ সদস্য ৰাতুল শৰ্মাৰ লগতে বহুকেইগৰাকী বিশিষ্ট ব্যক্তি উপস্থিত থাকে।
