Batadova Than:
অসমীয়া জাতিৰ প্ৰাণ প্ৰতিষ্ঠাতা মহাপুৰুষ শ্ৰীমন্ত শংকৰদেৱৰ জন্মস্থান নগাঁও জিলাৰ বৰদোৱাত ৰাজ্য চৰকাৰে প্ৰায় ২০০ কোটি টকাৰ ব্যয়েৰে নিৰ্মাণ কৰা ১৬৫ বিঘা ভুমিৰ ” বটদ্ৰৱা প্ৰকল্প”টো অহা ২৯ ডিচেম্বৰত আনুষ্ঠানিকভাৱে ৰাষ্ট্ৰ তথা অসমবাসীৰ বাবে উচৰ্গা কৰিব দেশৰ গৃহমন্ত্ৰী অমিত শ্বাহে। কেন্দ্ৰীয় গৃহমন্ত্ৰী অমিত শ্বাহৰ বটদ্ৰৱা প্ৰকল্পৰ শুভাৰম্ভিৰ অনুষ্ঠানৰ বাবে যাৱতীয় প্ৰস্তুতিৰ বুজ ল’বলৈ আজি দুপৰীয়া ভাগত বটদ্ৰৱা প্ৰকল্পত উপস্থিত হয়হি অসম চৰকাৰৰ ৰাজহ আৰু দূৰ্যোগ প্ৰশমন বিভাগৰ মন্ত্ৰী কেশৱ মহন্ত আৰু জলসম্পদ বিভাগৰ মন্ত্ৰী পীয়ুষ হাজৰিকা।
বটদ্ৰৱা প্ৰকল্পৰ নিৰ্মাণ কাৰ্য, সৌন্দৰ্য বৰ্দ্ধনৰ লগতে অস্থায়ী সভাস্থলী নিৰ্মাণ আদি সন্দৰ্ভত জিলা আয়ুক্ত দেৱাশীষ শৰ্মাৰ লগত মন্ত্ৰীদ্বয়ে আলোচনাত মিলিত হয়। মন্ত্ৰী দুগৰাকীৰ এই পৰিদৰ্শনৰ সময়ত স্থানীয় বিধায়ক ৰূপক শৰ্মা, বঢ়মপুৰ সমষ্টিৰ বিধায়ক জিতু গোস্বামী আৰু ৰহাৰ বিধায়ক শশীকান্ত দাসৰ লগতে জ্যেষ্ঠ চৰকাৰী বিষয়া সকল উপস্থিত থাকে I
