State Bjp Pressmeet :
শেহতীয়াকৈ লোকসভাৰ সদ্যসমাপ্ত অধিবেশনৰ সময়ৰ পৰা আজি পৰ্য্যন্ত কংগ্ৰেছ দলৰ নেতা সকলে ভাৰতীয় জনতা পার্টি আৰু কেন্দ্ৰীয় গৃহ মন্ত্রী অমিত শ্বাহক আক্রমন কৰি সংবিধান প্রনেতা বি আৰ আম্বেদকাৰ সন্দৰ্ভত যি অভিযোগ উত্থাপন কৰি আহিছে সেয়া সম্পূর্ণ ৰূপে ভিত্তিহীন। দশক দশক ধৰি কংগ্ৰেছৰ আমোলত সংবিধান প্রনেতা গৰাকীক মাথো অৱমাননা কৰিহে অহিছিল। শেহতীয়া কৈ কংগ্ৰেছে দেশজুৰি ৰূপায়ন কৰা আম্বেদকাৰ যাত্রা দলটোৰ নাটকবাজী হে মাথো” | এই বক্তব্য ভাৰতীয় জনতা পাৰ্টিৰ ৰাজ্যিক সভাপতি ভবেশ কলিতাৰ।
আজি ৰাজ্যিক বিজেপিৰ বশিষ্ঠস্থিত অটল বিহাৰী বাজপেয়ী ভৱনত অনুষ্ঠিত হোৱা এখন সংবাদমেলত সভাপতি কলিতাই কয় যে কংগ্রেছ দলে ১৯৫২ চনৰ সাধাৰণ নিৰ্বাচনত আৰু ১৯৫৪ চনৰ উপ-নির্বাচনত সংবিধান প্রনেতা বি আৰ আম্বেদকাৰক হৰুৱাবৰ কাৰণে ষড়যন্ত্ৰ কৰি তেখেতক অৱমাননা কৰে, আনকি কংগ্ৰেছৰ এনে স্থিতিৰ বাবে আম্বেদকাৰে কেন্দ্ৰীয় চৰকাৰৰ আইন মন্ত্ৰীৰ পদৰ পৰাও পদত্যাগ কৰিবলৈ বাধ্য হৈছিল।
সংসদৰ পৰম্পৰা অনুসাৰে যিকোনো এগৰাকী মন্ত্রী পদত্যাগৰ পিছত সংসদত তেখেতৰ বক্তব্য উপস্থাপন কৰিবলৈ দিয়াতো এক প্ৰকাৰৰ নিয়ম। কিন্তু আম্বেদকাৰৰ ক্ষেত্ৰত কংগ্ৰেছ নেতৃত্বৰ ষড়যন্ত্র ইমানেই তীব্র আছিল যে আম্বেদকাৰক পদত্যাগৰ পিছত নিজৰ বক্তব্যও সংসদত প্রকাশ কৰিব দিয়া নাছিল।
আনকি সংবিধান প্রনেতা আম্বেদকাৰৰ পদত্যাগ পত্রখনো কংগ্রেছে ৰাজহুৱা কৰা নাছিল। এই ধৰণে কংগ্ৰেছ দলক তীব্র ভাবে সমালোচনা কৰি সভাপতি কলিতাই শেহতীয়াকৈ অসমতো কংগ্ৰেছ নেতা গৌৰব গগৈ, ৰকিবুল হুছেইন, প্রদ্যুৎ বৰদলৈ, ভূপেন বৰাকে ধৰি বিভিন্ন জনে আম্বেদকাৰ অৱমাননা কৰা অভিযোগ উত্থাপন কৰা কাৰ্য্যক বাতোলতাৰ হে নামান্তৰ বুলি অভিহিত কৰে।
দলৰ মুখ্য মুখপাত্র মনোজ বৰুৱাই আঁতধৰা সংবাদমেল খনত সভাপতি কলিতাই কংগ্ৰেছৰ এনে ষড়যন্ত্রই অসমৰ তথা দেশৰ জনসাধাৰণক বিভ্রান্ত কৰিব নোৱাৰে বুলি স্পষ্ট কৰি দিয়ে। আনকি সংবিধান প্রনেতা আম্বেদকাৰক ভাৰতৰত্ন প্ৰদানৰ কথা উল্লেখ কৰি সভাপতি কলিতাই কয় যে ১৯৮৯ চনত ভাৰতীয় জনতা পাৰ্টিৰ সমৰ্থিত ৰাষ্ট্ৰীয় মৰ্চাৰ চৰকাৰত হে আম্বেদকাৰক ভাৰতৰত্ন প্রদান কৰা হৈছিল।
ইয়াৰ পূৰ্বে সংবিধান প্রনেতা গৰাকীক সর্বোচ্চ সন্মান প্রদান কৰাৰ ক্ষেত্ৰত কংগ্রেছ দলে কোনো পদক্ষেপ গ্রহণ কৰা নাছিল। যিখিনি সময়ত বিমানবন্দৰ, ৰাজপথ, চিকিৎসালয়, উচ্চ শিক্ষাৰ কেন্দ্ৰ সমূহ সেই সকলোবোৰ গান্ধী, নেহেৰুৰ নামত উচৰ্গা কৰা হৈছিল তেখেতসকলৰ তেতিয়া আম্বেদকাৰলৈ মনত পৰা নাছিল বুলি ভবেশ কলিতাই উল্লেখ কৰে। সেয়েহে আজিৰ সময়ত কংগ্ৰেছে আম্বেদকাৰৰ নামত কৰা ক্ৰন্দনক ঘৰিয়ালৰ চকুপানি বুলি কলিতাই অভিহিত কৰে আৰু এনেধৰণৰ কুৎসাৰতনা আৰু ভিত্তিহীন অভিযোগ উত্থাপনৰ পৰা বিৰত থাকিবলৈ কংগ্ৰেছক বিজেপিৰ ৰাজ্যিক সভাপতি গৰাকীয়ে সকীয়াই দিয়ে।