দৈনন্দিন কাম-কাজ তথা কথা-বতৰাত ভাৰতৰ ৬৬.২ কোটি লোকে হিন্দী ভাষা ব্যৱহাৰ কৰে । ইয়াৰ ফলত হিন্দী ভাষাটো বিশ্বৰ তৃতীয় সৰ্বাধিক ব্যৱহৃত ভাষালৈ পৰিণত হৈছে । শেহতীয়াকৈ এক সমীক্ষা অনুসৰি সমগ্ৰ বিশ্বৰ কমেও ডেৰশ কোটি লোকে ইংৰাজী ভাষা কয়, দৈনন্দিন বিভিন্ন কামত ইংৰাজী ভাষা ব্যৱহাৰ কৰে । এই ডেৰশ কোটি লোকৰ মাজত ব্ৰিটেইনৰ লোকৰ লগতে বিশ্বৰ বিভিন্ন দেশৰ লোক আছে ।
দৈনন্দিন বিভিন্ন কাম-কাজত ইংৰাজী ভাষা ব্যবহাৰ কৰে। ভাষাৰ ক্ষেত্ৰত ইংৰাজীয়ে একপ্ৰকাৰ আধিপত্য বৰ্তাই ৰখাৰ কাৰণ ৰূপে চিহ্নিত হৈছে আন্তর্জাতিক মঞ্চ বা যোগাযোগ, চৌদিশে ব্যৱসায়-বাণিজ্য আৰু শিক্ষাত ইয়াৰ বহুল ব্যৱহাৰ। তদুপৰি ব্রিটেইনৰ বাহিৰেও আন বহু দেশে ইংৰাজীক চৰকাৰী ভাষাৰ মৰ্যাদা প্রদান কৰিছে। আন্তর্জাতিক সংবাদ মাধ্যম আৰু ইণ্টাৰনেটেও ইয়াৰ ব্যৱহাৰকাৰীৰ সংখ্যা বৃদ্ধি কৰিছে।
সমীক্ষা অনুসৰি, অনলাইনত উপলব্ধ তথ্যপাতি বা লেখামেলাৰ অর্ধেকেই হৈছে ইংৰাজী ভাষাত লিখিত। আনহাতে, বিশ্বৰ দ্বিতীয় সর্বাধিক কথিত বা দৈনন্দিন কাম-কাজত ব্যৱহৃত ভাষা হৈছে চীনৰ মাণ্ডাবিন ভাষা। দুর্বোধ্য বা অতি কঠিন মাণ্ডাৰিন ভাষা কোৱা বা দৈনন্দিন কাম-কাজত ইয়াক ব্যৱহাৰ কৰা লোকৰ সংখ্যা ১১০ কোটি। লক্ষ্যণীয়ভাৱে মাণ্ডাৰিনেই হৈছে স্বদেশত বহুলভাবে ব্যৱহৃত বিশ্বৰ একমাত্র ভাষা। চীনৰ ৯০ কোটি লোকে এই ভাষা কয়।
শেহতীয়াকৈ আন্তর্জাতিক বাণিজ্য আৰু সাংস্কৃতিক বিনিময়তো মাণ্ডাৰিন ভাষাই গুৰুত্বপূৰ্ণ ভূমিকা ল’বলৈ লৈছে। লক্ষ্যণীয় যে মাণ্ডাৰিন ভাষাৰ জৰিয়তে চীনৰ চহকী সাংস্কৃতিক ঐতিহ্যও প্রতিফলিত হয়। অৱশ্যে এই ভাষা আয়ত্ব কৰাটো এক অতি কঠিন কার্য। ইয়াৰ কাৰণ হৈছে ভাষাৰ সুৰ আৰু এটা আখৰ বা প্রতীকেৰে একোটা শব্দ বুজায়।
আনহাতে, বিশ্বৰ তৃতীয় স্থানৰ সৰ্বাধিক কথিত ভাষাৰ স্বীকৃতি অৰ্জন কৰা হিন্দী মূলতঃ ভাৰতত ব্যৱহৃত হয়। দেশৰ বিভিন্ন অঞ্চলৰ লোকৰ মাজত ই সংযোগী ভাষাৰ ভূমিকাও পালন কৰি আহিছে। আনহাতে, বিশ্বৰ সৰ্বাধিক ১০টা কথিত ভাষাৰ তালিকাত বাংলাও স্থান লাভ কৰিছে। সমীক্ষা অনুসৰি, ২৭.৩ কোটি লোকে বাংলা ভাষা কয় । পশ্চিমবংগ, ত্ৰিপুৰাকে ধৰি ভাৰতৰ বিভিন্ন ৰাজ্যৰ লগতে বাংলাদেশতো বাংলা ভাষা প্ৰচলন আছে ।
বিশ্বৰ ১০ টা সৰ্বাধিক কথিত ভাষাৰ মাজত স্থান লাভ কৰা আন ছয়টা ভাষা হৈছে স্পেনিচ (৫৫.৯ কোটি ব্যৱহাৰকাৰী), ফৰাচী (৩১.০ কোটি ব্যৱহাৰকাৰী), আৰবী (মানক, ২৭.৪ কোটি), পৰ্তুগীজ(২৬.৪ কোটি), ৰাছিয়ান (২৫.৫ কোটি) আৰু উৰ্দু (২৩.২ কোটি) । উৰ্দু ভাষাৰ ব্যৱহাৰকাৰী ভাৰতৰ উপৰি পাকিস্তানটো আছে ।
লক্ষ্যণীয় যে ব্ৰিটিছ, ফৰাচী, পৰ্তুগীজ আৰু স্পেনিছসকলে একালত বিভিন্ন স্থানত উপনিৱেশ প্ৰতিষ্ঠা কৰাৰ বাবে এই দেশসমূহৰ ভাষাই ব্যাপক প্ৰচাৰ লাভ কৰে । সেয়েহে এই ভাষাসমূহৰ বুজনসংখ্যক ব্যৱহাৰকাৰী আছে ।
