India Name :
আজি এক প্ৰেছ বিবৃতিত কামতাপুৰ প্ৰগ্ৰেছিভ পাৰ্টি (কে পি পি) ৰ কেন্দ্রীয় সাধাৰণ সম্পাদক উত্তম কুমাৰ ৰায়ে দেশৰ নাম ইণ্ডিয়া ক লৈ শাসক-বিৰোধীৰ মাজত ৰাষ্ট্ৰ জুৰি তীব্র বিতর্ক চলি থকাৰ মাজতে কেন্দ্র আৰু ৰাজ্যত শাসনাধীন বি জে পি নেতৃত্বাধীন চৰকাৰক চোকা ভাষাৰে সমালোচনা কৰি কয় যে যদি ইণ্ডিয়া নামটো গোলামীৰ প্ৰতীক, তেনে হলে ইংলিছ বা ইংৰাজী ভাষাটোও গোলামীৰ প্ৰতীক।
দেশৰ নাম ইণ্ডিয়া সংবিধানৰ পৰা আঁতৰ কৰাৰ পূর্বে দেশ জুৰি ইংলিছ বা ইংৰাজী ভাষাটো বৰ্জন কৰাৰ ব্যৱস্থা গ্ৰহণ কৰক বুলি মন্তব্য কেপিপিৰ। কিয়নো ইংৰাজী ভাষাটোও দুশ বছৰ ভাৰতক শাসন কৰা ব্ৰিটিছ সকলৰ অৱদান।
লগতে কে পি পিৰ কেন্দ্রীয় সাধাৰণ সম্পাদক উত্তম কুমাৰ ৰায়ে কয় যে দেশৰ বিৰোধী ৰাজনৈতিক দলসমূহে জোটবদ্ধ হৈ I.N.D.I.A (Indian National Developmental Inclusive Alliance) নাম গ্রহণ কৰাৰ ফলত শাসকীয় বিজেপিৰ কেন্দ্রীয় আৰু ৰাজ্যৰ চৰকাৰ ভীতিগ্ৰস্থ হৈছে। বিৰোধী ৰাজনৈতিক দলসমূহে ঐক্যবদ্ধ হৈ I.N.D.I.A নাম লোৱাত শাসকীয় পক্ষই ভাৰতৰ সংবিধানৰ পৰা ইণ্ডিয়া নামটো নাইকিয়া কৰিব বিচৰাটো অতিকৈ দুৰ্ভাগ্যজনক বুলি মন্তব্য কেপিপিৰ।
চৰকাৰৰ এই সিদ্ধান্তক টোগলকী সিদ্ধান্তৰ সৈতে তুলনা কৰিব পাৰি। বৰ্তমান বি জে পি দল নেতৃত্বাধীন কেন্দ্রীয় চৰকাৰে এনেকুৱা টোগলকী সিদ্ধান্ত জৰিয়তে ৰাষ্ট্ৰ জুৰি হোৱা নিবনুৱা সমস্যা, মূল্যবৃদ্ধিৰ সমস্যা, জনগোষ্ঠীয় সমস্যা, স্বাস্থ্য খণ্ডৰ সমস্যা, শিক্ষা খণ্ডৰ সমস্যা, দৰিদ্ৰতাৰ সমস্যা, অবৈধ অনুপ্রবেশৰ সমস্যা, আন্তঃ ৰাজ্যিক সীমা সমস্যা, বিভিন্ন ৰাজ্যৰ আইন শৃঙ্খলাৰ সমস্যা, আন্তর্জাতিক সীমা সমস্যা আদিৰ পৰা জনগণৰ দৃষ্টি আঁতৰাই ৰখাৰ চেষ্টা চলাই আছে।
এক কথাত কবলৈ গলে বৰ্তমান ভাৰতীয় জনতা পার্টিৰ নেতৃত্বাধীন কেন্দ্রীয় চৰকাৰৰ হাতত নতুন কোনো শক্তিশালী ইচ্ছু নাই, এই কাৰণে সংবিধানৰ পৰা INDIA নাম আঁতৰ কৰিব বিচাৰিছে আৰু অহেতুক ৰাষ্ট্ৰ জোৰা এক বিতৰ্কৰ সৃষ্টি কৰিব বিচাৰিছে বুলি মন্তব্য কেপিপিৰ নেতা উত্তম কুমাৰ ৰায়ৰ।
দেশৰ ১৪০ কোটি নাগৰিকৰ মাজত লাখ লাখ সমস্যা আছে কিন্ত সেই সমস্যা সমাধানৰ কাৰণে কেন্দ্রীয় চৰকাৰ আজি ব্যৰ্থ হৈছে। দেশৰ দৰিদ্ৰ জনতা আজি ভয়াবহ ভাৱে দিন অতিবাহিত কৰিবলগীয়া হৈছে। দৰিদ্ৰ ৰাষ্ট্ৰৰ তালিকাত ভাৰতবৰ্ষ আজি বিশ্ব জুৰি ১২১ খন ৰাষ্ট্ৰৰ ভিতৰত ১০৭ নম্বৰত অৱস্থান কৰিছে।
দৰিদ্ৰ জনগণৰ মনৰ কথা শুনিবলৈ চৰকাৰৰ যেন কোনো সময় নাই,তাৰ বিপৰীতে দেশৰ প্ৰধানমন্ত্ৰী নৰেন্দ্ৰ মোদীয়ে কোটি কোটি টকা ব্যয় কৰি শুনাই আছে নিজৰ মন কী বাত বুলি মন্তব্য কেপিপিৰ কেন্দ্রীয় সাধাৰণ সম্পাদক উত্তম কুমাৰ ৰায়ৰ। কে পি পিৰ কেন্দ্রীয় সাধাৰণ সম্পাদক উত্তম কুমাৰ ৰায়ে ইণ্ডিয়া নাম সংবিধানৰ পৰা আঁতৰ কৰিব বিচৰা প্ৰসঙ্গত আৰু কয় যে দেশৰ স্বাধীনতাৰ অমৃত সন্ধিক্ষণতো বৃহত্তৰ কোচ-ৰাজবংশী বা কমতাপুৰী সমাজে ৰাজনৈতিক ভাৱে অমৃত পান কৰাৰ পৰিবৰ্তে বিষ ভক্ষণ কৰিবলগীয়া হৈছে।
আজিও কামতাপুৰী সমাজে ৰাষ্ট্ৰ ব্যৱস্থাৰ পৰা ন্যায় নাপালে। ঐতিহাসিক কামতাপুৰৰ উত্তৰবঙ্গত শাসক-বিৰোধীৰ মাজৰ সংঘাতৰ ফলত দেশীয় কামতাপুৰী সমাজে ৰাজনৈতিক হিংসাৰ স্বীকাৰ হবলগীয়া হৈছে। কামতাপুৰী সমাজ আজিও ৰাজনৈতিক ষড়যন্ত্রৰ স্বীকাৰ তাৰ ফলত তেওঁলোকে ভাষিক, সাংস্কৃতিক, সামাজিক, অৰ্থনৈতিক, শৈক্ষিক আদি প্ৰতিটো ক্ষেত্রতে প্ৰতাৰনা আৰু প্ৰবঞ্চনাৰ স্বীকাৰ হৈছে।
ইয়াৰ পিছতো ভাৰতবৰ্ষক বিশ্ব গুৰুৰ আসনত অধিষ্ঠিত কৰিব বিচৰা প্ৰধানমন্ত্ৰী নৰেন্দ্ৰ মোদীয়ে আমাক ন্যায় দিয়াত ব্যৰ্থ হৈছে বুলি মন্তব্য কেপিপিৰ নেতা উত্তম কুমাৰ ৰায়ৰ। স্বাধীনতাৰ পাঁচ দশকত কৈ (৫০ বছৰ ধৰি) অধিক সময় জনজাতিকৰণৰ দাবীত আন্দোলন কৰাৰ পিছতো অসমৰ কোচ-ৰাজবংশী সকলৰ এই সামান্যতম সমস্যা আজিও সমাধান নহ’ল বুলি দুখ প্ৰকাশ কেপিপিৰ নেতা উত্তম কুমাৰ ৰায়ৰ।