Situation In Bangladesh :
পুনৰ এক ৰাজনৈতিক অস্থিৰতাৰ দিশে বাংলাদেশ অগ্ৰসৰ হোৱা বুলি আন্তর্জাতিক স্তৰত ব্যাপক চর্চা হৈছে। সূত্ৰৰ মতে, যোৱা বছৰৰ মাজভাগৰ পৰা ৰাজনৈতিকভাৱে অস্থিৰ হৈ থকা দেশখন এইবাৰ সামৰিক শাসনৰ অধীনলৈ যোৱাৰ সম্ভাৱনা প্রবল হৈছে।
শেহতীয়াভাবে বাংলাদেশ সেনাবাহিনীত একাধিক মেৰুৰ সৃষ্টি হৈছে। এনে এক মেৰুক নেতৃত্ব দিয়া কঠোৰ ইছলামপন্থীৰূপে পৰিচিত লেফটেনেন্ট জেনেৰেল মহম্মদ ফাইজুৰ ৰহমানে সেনাবাহিনীক সম্পূর্ণৰূপে নিজৰ অধীনলৈ নিয়াৰ উদ্দেশ্যে সক্রিয় হৈ উঠিছে বুলি সূত্রই সদৰী কৰিছে। শীর্ষ সেনা বিষয়াজনৰ এনে সক্ৰিয়তাৰ উদ্দেশ্য দেশখনত সামৰিক শাসন বলবৎ কৰা বুলি সূত্ৰই প্ৰকাশ কৰিছে।
উল্লেখ্য যে যোৱা জুলাই-আগষ্টত গণ অভ্যুত্থানৰ ফলত শ্বেইখ হাছিনা চৰকাৰ উৎখাত হোৱাৰ পাছত দেশখনক ড: মহম্মদ ইউনুছ নেতৃত্বাধীন অনিৰ্বাচিত চৰকাৰে শাসন কৰি আছে। ড° ইউনুছ চৰকাৰৰ শাসনত দেশখনত ব্যাপক হাৰত সংখ্যালঘু নির্যাতনৰ ঘটনাও সংঘটিত হৈছে। এনে অৱস্থাতে সামৰিক বাহিনী একাধিক মেৰুত বিভাজিত হৈছে। ফলস্বৰূপে দেশখনত সামৰিক শাসন প্ৰৱৰ্তনৰ সম্ভাৱনা বৃদ্ধি পোৱা বুলি সূত্রই সদৰী কৰিছে।
ইয়াৰ পৰিপ্ৰেক্ষিতত ভাৰত চৰকাৰে প্ৰতিবেশী দেশখনৰ পৰিস্থিতি সূক্ষ্মভাৱে নিৰীক্ষণত ৰাখিছে। সূত্ৰৰ মতে, হঠাতে সেনাবাহিনীক সম্পূৰ্ণৰূপে নিজৰ নিয়ন্ত্ৰণলৈ নিবলৈ সক্রিয় হৈ উঠা লেফটেনেন্ট জেনেৰেল ৰহমান যোৱা সপ্তাহত কুখ্যাত পাকিস্তানী গুপ্তচৰ সংস্থা আইএছআইৰ প্ৰতিনিধিৰ স’তে এক বৈঠকত মিলিত হয়।
শীর্ষ সেনা বিষয়াজনে সামৰিক অভ্যুত্থানৰ পৰিকল্পনা কৰা বুলিও চৰ্চা হৈছে। ইয়াৰ অংশৰূপে তেওঁ সেনাৰ অভ্যন্তৰৰ সমর্থন সংগ্ৰহ কৰিবলৈ চেষ্টা অব্যাহত ৰাখিছে। তদুপৰি সমৰ্থন সংগ্ৰহৰ উদ্দেশ্যে তেওঁ বাংলাদেশৰ চোৰাংচোৱা সংস্থাৰ স’তেও যোগাযোগ অব্যাহত ৰাখিছে।
ইপিনে, দীর্ঘদিনীয়া বন্ধু ৰাষ্ট্ৰ ভাৰতৰ স’তে সুসম্পর্ক অটুট ৰাখিবলৈ বিচাৰি নতুন দিল্লীলৈ বাৰ্তা প্ৰেৰণ কৰিছে বাংলাদেশৰ সেনা মুৰব্বী জেনেৰেল ৱাকাৰ উজ জামানে। বাংলাদেশ সেনাৰ মুৰব্বীজনৰ এই বার্তাক নতুন দিল্লীয়ে গুৰুত্ব সহকাৰে লৈছে বুলি সূত্রই সদৰী কৰে।
সূত্ৰৰ মতে, শেহতীয়াভাবে ভাৰতীয় সেনাৰ মুৰব্বী জেনেৰেল উপেন্দ্ৰ দ্বিবেদীয়ে প্ৰকাশ কৰিছে যে ঢাকাৰ স’তে নতুন দিল্লীৰ ‘চমৎকাৰ’ সামৰিক সম্পর্ক বর্তি আছে। সম্প্রতি চুবুৰীয়া দেশখনৰ পৰিস্থিতিত সামৰিক বাহিনী আৰু ৰাজনৈতিক নেতৃত্বৰ যে গুৰুত্ব বহু সেই সম্পর্কেও অৱগত ভাৰতৰ প্ৰতিৰক্ষা বিভাগ।
ইয়াৰ পৰিপ্ৰেক্ষিতত দেশখনৰ পৰিস্থিতি সূক্ষ্মভাৱে নিৰীক্ষণ কৰি আছে নতুন দিল্লীয়ে। আনহাতে, কূটনৈতিক মহলত হোৱা চৰ্চা অনুসৰি, এই মুহূৰ্তত বাংলাদেশ সেনাৰ মুৰব্বী চাপত আছে। দেশখনৰ পৰিৱৰ্তিত ৰাজনৈতিক পৰিস্থিতিত সেনা মুৰব্বীজনে ভাৰসাম্য ধৰি ৰখাৰ উদ্দেশ্যে মধ্যমস্থান ল’লেও তেওঁৰ বিৰুদ্ধে সেনাৰ অভ্যন্তৰতে কেতবোৰ শক্তি সক্রিয় হৈছে। ফলত তেওঁৰ ওপৰত চাপ সৃষ্টি হৈছে।
কূটনৈতিক সূত্ৰৰ তথ্য অনুসৰি, কঠোৰ ইছলামপন্থী লেফটেনেন্ট জেনেৰেল মহম্মদ ফাইজুৰ ৰহমানে জামাতপন্থী সেনা বিষয়াবৰ্গ আদিৰ সমর্থন ইতিমধ্যে লাভ কৰিছে। তদুপৰি তেওঁ আইএছআইৰ মিত্ৰত পৰিণত হ’বলৈও সক্ষম হৈছে বুলি সূত্রই সদৰী কৰিছে। এনে পৰিৱৰ্তিত পৰিস্থিতিয়ে দেশখনত ভাৰতবিৰোধী বাতাবৰণ সৃষ্টি কৰাৰ আভাসো স্পষ্ট হৈছে। লক্ষ্যণীয়ভাৱে এইবাৰ বাংলাদেশস্থিত ভাৰতীয় দূতাবাসত গণৰাজ্য দিৱস পালিত নহ’ল।