Advantage Assam 2.O Workshops In Tezpur:
অসম চৰকাৰৰ জলসম্পদ মন্ত্ৰী তথা শোণিতপুৰ জিলাৰ অভিভাৱক মন্ত্ৰী পীযুষ হাজৰীকাই সোমবাৰে তেজপুৰৰ জিলা আয়ুক্তৰ কাৰ্যালয়ৰ সভাকক্ষত এডভাণ্টেজ অসম ২.০ ৰ অধীনত শোণিতপুৰ আৰু বিশ্বনাথ জিলাৰ বাবে আয়োজিত বিশেষ কৰ্মশালাত উপস্থিত থাকে ।
উল্লেখ্য যে অহা ২৫ আৰু ২৬ ফেব্ৰুৱাৰীত গুৱাহাটীত অনুষ্ঠিত হ’বলগা এডভাণ্টেজ অসম ২.০ ৰ সৈতে সংগতি ৰাখি জিলা পৰ্যায়ত উদ্যোগীসকলৰ সৈতে বিশেষ কৰ্মশালাৰ আয়োজন কৰা হৈছে । আজি তেজপুৰত শোণিতপুৰ আৰু বিশ্বনাথ জিলাৰ দুই শতাধিক উদ্যোগীৰ বাবে অনুষ্ঠিত কৰ্মশালাত মন্ত্ৰী হাজৰীকাই মুখ্য অতিথি হিচাপে উপস্থিত থাকি উদ্যোগী সকলক উদ্দেশ্যি বক্তব্য আগবঢ়ায় ।
আজিৰ কৰ্মশালাত জিলা উদ্যোগ আৰু বাণিজ্য বিভাগৰ উদ্যোগত বহুকেইগৰাকী সমল ব্যক্তিয়ে জিলা দুখনৰ উদ্যোগিক সম্ভাৱনাসমূহৰ বিষয়ে বিস্তৃত উপস্থাপন কৰে । অনুষ্ঠানত মন্ত্ৰী হাজৰীকাই দুয়োখন জিলাৰ পৰা অহা উদ্যোগী সকলৰ পৰা তেওঁলোকৰ বাণিজ্যৰ ক্ষেত্ৰত সন্মুখীন হোৱা সমস্যাৰ বিষয়ে বুজ লয় । দুগৰাকী উদ্যোগীৰ মাটিৰ কাগজ পত্ৰৰ সমস্যা হোৱা বুলি জানিবলৈ পাই মন্ত্ৰী হাজৰীকাই জিলা আয়ুক্তক বিষয়টো তাৎক্ষণিকভাৱে চোৱাৰ বাবে নিৰ্দেশনা প্ৰদান কৰে ।
ভাষণ প্ৰসংগত মন্ত্ৰী হাজৰীকাই কয় যে আজি ড: হিমন্ত বিশ্ব শৰ্মাৰ নেতৃত্বত ৰাজ্য চৰকাৰৰ স্বচ্ছ কামসমূহৰ বাবে অসমত এতিয়া দুৰ্নীতিমুক্ত পৰিৱেশ বিৰাজ কৰিছে যাৰ ফলত বিনিয়োগকাৰীৰ পছন্দৰ ৰাজ্য হিচাপে অসমে গুৰুত্বপূৰ্ণ ভূমিকা ল’বলৈ আৰম্ভ কৰিছে । আমাৰ দেশখনে প্ৰধানমন্ত্ৰী নৰেন্দ্ৰ মোদীৰ সবল নেতৃত্বত পৃথিৱীৰ পঞ্চম বৃহত্তম দেশ হিচাপে পৰিগণিত হোৱাৰ সময়ত অসমতো উদ্যোগ আৰু বাণিজ্যৰ বাবে সুষ্ঠিৰ পৰিৱেশ সৃষ্টিৰ বাবে ৰাজ্যখনৰ মুখ্যমন্ত্ৰী ড: হিমন্ত বিশ্ব শৰ্মাই আন্তৰিক প্ৰয়াস অব্যাহত ৰখা বুলি মন্ত্ৰী হাজৰীকাই উল্লেখ কৰে ।
আনহাতে চাহ আৰু মুষ্টিমেয় চৰকাৰী উদ্যোগ দুটামানৰ বাহিৰে অসমত বিগত সময়ত বিশেষ উদ্যোগ থন ধৰি নুঠাৰ অন্তৰালত এসময়ৰ বন্ধ-ধৰ্মঘট আদিৰে অশান্তজৰ্জৰ পৰিৱেশ অন্যতম দায়ী আছিল বুলি মন্তব্য কৰি মন্ত্ৰী হাজৰীকাই কয় যে বিগত চাৰিটা বছৰত মুখ্যমন্ত্ৰী ড: হিমন্ত বিশ্ব শৰ্মাৰ কাৰ্যকালত এবাৰলৈও অসম বন্ধৰ দৰে প্ৰতিবাদ হোৱা নাই। প্ৰধানমন্ত্ৰী নৰেন্দ্ৰ মোডীৰ আদৰ্শৰে অসমতো মুখ্যমন্ত্ৰী গৰাকীৰ নেতৃত্বত “মেনুফেকচাৰিং হাব” হিচাপে গঢ়ি তুলিবলৈ কাম কৰি থকা হৈছে । মন্ত্ৰী গৰাকীয়ে লগতে কয় যে আগন্তুক এডভাণ্টেজ অসমৰ জড়িয়তে ৰাজ্যখনে ভালেমান বিনিয়োগ লাভ কৰিবলৈ সক্ষম হ’ব বুলি তেওঁ বিশ্বাস কৰে ।
আজিৰ অনুষ্ঠানত শোণিতপুৰ আৰু বিশ্বনাথ জিলাৰ আয়ুক্তদ্বয় ক্ৰমে অংকুৰ ভৰালী আৰু মুনিন্দ্ৰ নাথেও বক্তব্য আগবঢ়োৱাৰ লগতে বিধায়কত্ৰয় ক্ৰমে পৃথ্বীৰাজ ৰাভা, গণেশ কুমাৰ লিম্বু আৰু কৃষ্ণকমল তাতীঁ উপস্থিত থাকে ।
