Terror Attack on Narendra Modi’s Aircraft:বিদেশত প্রধানমন্ত্রীৰ বিমানত সন্ত্ৰাসবাদী আক্ৰমণ !
ফোন পোৱাৰ পাছত তৎপৰ মুম্বাইৰ আৰক্ষী, গ্ৰেপ্তাৰ এজন
সন্ত্ৰাসবাদীয়ে উৰুৱাই দিব প্ৰধানমন্ত্ৰী নৰেন্দ্ৰ মোডীৰ বিমান! এই কথা মুম্বাই আৰক্ষীক ফোনযোগে জনাইছে এজন ব্যক্তিয়ে। মঙলবাৰে তেওঁলোকে এই ভাবুকিমূলক ফোন লাভ কৰে।
মুম্বাই আৰক্ষীয়ে বুধবাৰে জনাই যে গোচৰটোৰ সন্দৰ্ভত এজন লোকক গ্ৰেপ্তাৰ কৰা হৈছে।
মুম্বাই আৰক্ষীয়ে জনোৱা মতে, যোৱা ১১ ফেব্ৰুৱাৰীত কণ্ট্ৰল ৰুমলৈ এটা ফোন আহে। ফোনত এজন ব্যক্তিয়ে কয় যে প্ৰধানমন্ত্ৰীৰ বিদেশ ভ্ৰমণৰ সময়ত তেওঁৰ বিমানত আক্ৰমণ হ’ব পাৰে।
উগ্ৰপন্থীয়ে বিমানখনত বোমা বিস্ফোৰণৰ পৰিকল্পনা কৰিছে। খবৰ পোৱাৰ লগে লগে তদন্ত আৰম্ভ কৰা হয়। বিভিন্ন সংগঠনক ভাবুকিপূৰ্ণ কলৰ বিষয়ে অৱগত কৰা হয়।
তদন্তকাৰীয়ে মুম্বাইৰ চেম্বুৰৰ পৰা এজন ব্যক্তিক গ্ৰেপ্তাৰ কৰে। উল্লেখ্য যে,তেওঁ কণ্ট্ৰল ৰুমলৈ ফোন কৰি এই বাৰ্তা প্ৰেৰণ কৰিছিল ।
তেওঁক গ্ৰেপ্তাৰ কৰি ভাবুকি দিয়া ফোনটোৰ সন্দৰ্ভত সোধা-পোছা কৰা হয়। আৰক্ষীৰ সূত্ৰ অনুসৰি তেওঁৰ মানসিক অৱস্থা সুস্থিৰ নহয়।
সোমবাৰে বিদেশ ভ্ৰমণলৈ যায় প্ৰধানমন্ত্ৰীগৰাকী। ফ্ৰান্স ভ্ৰমণৰ অন্তত তেওঁ আমেৰিকালৈ উভতি আহিব। মঙলবাৰে পেৰিছত অনুষ্ঠিত হোৱা এ আই সন্মিলনত অংশগ্ৰহণ কৰে ভাৰতৰ প্ৰধানমন্ত্ৰীগৰাকীয়ে।
তাৰ পাছতে তেওঁ ফ্ৰান্সৰ ৰাষ্ট্ৰপতি ইমানুৱেল মেক্ৰনৰ স’তে ৰাতিৰ আহাৰ গ্ৰহণ কৰে।
উল্লেখ্য যে প্ৰধানমন্ত্ৰীগৰাকী লৈ মৃত্যুৰ ভাবুকিৰ ফোন অহাটো এইটোৱে প্ৰথম নহয়। বিগত বৰ্ষৰ ডিচেম্বৰত, মুম্বাই ট্ৰেফিক পুলিচ নিয়ন্ত্ৰণ কক্ষে এটা ভাবুকিৰ ফোন পাইছিল। আৰক্ষীয়ে এই সন্দৰ্ভত দুজন লোকক গ্ৰেপ্তাৰো কৰে ।
ইয়াৰ পূৰ্বেও, মুম্বাই আৰক্ষীয়ে মোডীৰ জীৱনৰ প্ৰতি ভাবুকি সৃষ্টি কৰাৰ বাবে এজন লোকক গ্ৰেপ্তাৰ কৰিছে ।
